کارگەیەکی دەرمانی شێرپەنجە کرایەوە .. عێراق دەرمان هەناردەی دەرەوە دەکات

سبەی

کارگەیەکی گەورەی بەرهەمهێنانی دەرمانی شێرپەنجە لە عێراق کرایەوە و بەردی بناغەی کارگەیەکی دیکەی بەرهەمهێنانی ڤاکسین و پێکوتەی ڤایرۆسی نەخۆشیەکانی جگەر و ئەنفلۆنرا و ئیفلیجی و سورێژە دانرا، لەکاتێکدا تەنها ساڵی 2023 بەبەهای زیاتر لە 4 ملیار دۆلار دەرمان و چارەسەری پزیشکی لە دەرەوە هاوردە کراوە.  

ئەمڕۆ شەممە (29ـی تشرینی دووەمی 2025) محەمەد شیاع سودانی سەرۆک وەزیرانی عێراق، کارگەی بەرهەمهێنانی چارەسەری شێرپەنجەی لە بەغداد کردوەوە بە تێچووی 45 ملیۆن دۆلار، لە کارگەی مۆدێرن بۆ بەرهەمهێنانی دەرمان، بەردی بناغەی پڕۆژەی بەرهەمهێنانی ڤاکسین و پێکوتەی ڤایرۆسی نەخۆشییەکانی (هەورکردنی جگەر، ئەنفلۆنزا، پێکوتەی سیانی، ئیفلیجی و سوریژەی منداڵانی)ـی دانا کە تێچووەکەی 70 ملیۆن دۆلارە.

لە مەراسیمی کردنەوەی کارگەکەدا، سودانی رایگەیاند: کارگەکە بە ستانداری بەرزی جیهانی و ئامێری نوێ و پێشکەوتووی پێشکەوترین دامەزراوەکانی جیهان کاردەکات، بەوەش دەبێتە نوێترین کارگە لە رۆژهەڵاتی ناوەڕاست و رۆڵی دەبێت لە دابینکردنی ئاسایشی دەرمان و چارەسەری پزیشکی.

ئاماژەی بەوەکرد، سێ ساڵ لەمەوبەر بەردی بناغەی کارگەکەیان داناوە، بۆ پاڵپشتی بەرهەمهێنان و کەرتی تایبەت، وەک کۆمپانیای راستەقینە بۆ دەستەبەرکردنی پێداویستی ناوخۆ لە دەرمان و چارەسەر پزیشکی.

بڕیارە ئاستی بەرهەمهێنانی کارگەکە قۆناغ بە قۆناغ بەرزبکرێتەوە بۆ دابینکردنی دەرمان و پێداویستییە پزیشکییەکان و پێداویستییەکانی ناوخۆ، لەئێستادا 2000 جۆری دەرمان و 40%ـی پێداویستییە کیمیاییەکان لە ناوخۆ دابین دەکرێت.

بەپێی ئامارەکانی حکومەتی عێراق، ساڵی 2023 بە بەهای 4 ملیار و 189 ملیۆن دۆلار دەرمان و کەرەستە و پێداویستی پزیشکی لە دەرەوەی وڵات هاوردەکرداوە، بەوتەی سودانی زیادبوونی ئاستی هاوردەکردنی دەرمان ئاماژەی مەترسیدارە و دەیانەوێت لە رێگەی پاڵپشتی کەرتی تایبەتەوە ئاستی هەناردەی دەرمان بەشێوەیەکی بەرچاو کەمبکەنەوە.

سەرۆک وەزیرانی عێراق رایگەیاند: دابینکردن و بەرهەمهێنانی دەرمانی چارەسەر شێرپەنجە لە ناوخۆی عێراق، ئازار و ناڕەحەتییەکانی نەخۆشان کەمدەکاتەوە و پێداویستییەکانی ناوخۆ دابین دەکات، پلانیان هەیە لە قۆناغی داهاتوودا دەست بە هەناردەکردنی دەرمان بکەن، لە رێگەی زیادکردنی ژمارەی کارگەکان بە پێشکەوتووترین تەکنیک و تایبەتمەندی.

بەپێی راگەیەندراوی کۆمپانیاکەش، کارگەی بەرهەمهێنانی دەرمانی شێرپەنجە دەستی بە بەرهەمهێنان کردووە، پێداویستییەکانی ناوخۆ لە چارەسەری شێرپەنجە دابین دەکات و لە قۆناغی یەکەمدا حەب و کەپسول بەرهەمدەهێنێت بەتایبەتی بۆ توشبوانی شێرپەنجەی کۆئەندامی هەرس، سییەکان، گورچیلە، لەگەڵ شێرپەنجەی دەم و غودەکان.

قۆناغی دووەمی پڕۆژەی کارگەکە پێش ساڵی 2026 دەکەوێتە کار کە هەشت جۆری دیکەی دەرمان و چارەسەری شێرپەنجە بەرهەمدەهێنێت و بۆ ئەوەش لەگەڵ کۆمپانیا جیهانیی و دەرەکییەکان گرێبەستی کردووە.