تورکیا و داعش؛ دوو مەترسی گەورە بۆ سەر کورد لە حەڵەب و کۆبانێ

سبەی

ئاژانسی مێزۆپتامیا لە راپۆرتێکدا سەبارەت بە دوایین گۆڕانکارییەکانی سوریا بڵاویکردەوە لە حەڵەب و باکوری سوریا زنجیرەیەک ئۆپراسیۆنی سەربازی، زانیاری و ستراتیجی لەلایەن تورکیاوە دەستپێکراوە.

بە گوێرەی دوایین راپۆرتە مەیدانییەکان ئەم جموجۆڵانە بە ئامانجی بەهێزکردنی هەژموونی ئەنقەرە و لە ڕێگەی بەکارهێنانی بۆشاییە ئەمنییەکان بە مەبەستی دروستکردنی زەمینەیەک بۆ گەڕانەوەی گروپە چەکدارەکان لەوانەش داعش ئەنجام دەدرێت.

بە گوێرەی راپۆرتەکە، کۆبوونەوەی هەواڵگری گرنگ لە کامپی هەندراتە نزیک لە زیندانی ناوەندیی لە حەلەب بەڕێوەچووە کە تێیدا بەرپرسانی باڵای هەواڵگری تورکیا (میت) و فەرماندە باڵا سەربازییەکانی سورای بەشداریان تێدا کردوە.

بەشداریی هێزە ناوچەییەکان لەوانەش گەنجانی عەرەب لە کۆبوونەوەکاندا ئەوە دەردەخات کە تورکیا هەوڵ دەدات لە ڕێگەی پەروەردەکردن و ڕێکخستنی هێزە خۆجییەکان هەژموونی خۆی لە ناوچە کوردنشین و شوێنە ستراتیژییەکانی سوریا پەرەپێبدات.

هاوکات پلانی راهێانی سەربازی لە دوو ناوەندی دیاریکراو، لەوانەش ئاکادیمیای سەربازی لە دەورووبەری حەڵەب و ئاکادیمیای حومس ماوەی سی مانگە بەردەوامە و لە ژێر چاودێری راستەوخۆی تورکیا بەڕێوەدەچێت.

ئەم بەرنامانە نەک تەنها پەرە بە لێهاتوویی و شارەزاییی سەربازی بەشداربوان دەدات، بەڵکو بۆ تورکیا دەرفەتی ڕێکخستنی ئەم گروپانەیە بۆ بەکارهێنانیان بۆ بەدەستهێنانی ئامانجەکانی.

لە لایەکی دیکەوە سەرهەڵدانەوەی دووبارەی شانەکانی داعش لە حەڵەب بە تایبەت ناوچەی شیعار، لاوازی چاودێری هێزە ئەمنییەکان بۆسەر شانەکانی داعش دەردەخات.

بە گوێرەی راپۆرتەکە هەندێک لە ناوچەکان لە ڕێگەی داعشەوە کۆنترۆڵ دەکرێن و ئەم گروپە بەنیازی بڵاوکردنەوەی بوونی خۆی لە ناوچەکانی دیکەیە لەوانەش لەناو دانیشتوان و ناوچە کوردنشینەکان.

بوونی ئەم گرووپانە مەترسی گەورەی بۆ دانیشتوانی ناوچەکە دەخوڵقێنێت و بووەتە هۆی بڵاوکردنەوەی ترس و قەدەغەکردنی فرۆشتنی جگەرە و سنووردارکردنی بەکارهێنانی هەندێک لە ئامرازە گشتییەکان.

ئامانجەکانی تورکیا جگە لە سەپاندنی هەژموونی سەربازی و زانیاری، بریتییە لە بەئامانجگرتنی ناوچە ستراتژییەکانی کورد لەوانەش شێخ مەقسود و ئەشرەفییە لە حەڵەب و شاری کۆبانێ.

شێخ مەقسود و ئەشرەفییە بە هۆی ئەوەی زۆرینەی دانیشتوانەکەیان کوردە و لە رووی سیمبولییەوە گرنگییەکی زۆریان هەیە و هاوکات کۆبانێ کە بە بەرخۆدانی ساڵەکانی 2014-2015 لەبەرانبەر داعش دەناسرێتەوە، وەک ئامانجی درێژ خایەن لەبەرچاو گیراون.

میزپۆتۆمیا لە کۆتایی راپۆرتەکەیدا جەخت لەوە دەکاتەوە کە ستراتیژی تورکیا لە سوریا پەیوەستە بە بوونی بەرفراوانی زانیاری و سەربازی، ڕێکخستنی هێزە خۆجییەکان و بەکارهێنانی بۆشاییە ئەمنییەکانە و ئەمەش لە کۆتاییدا نەک تەنها دەبێتە هۆی ناسەقامگیری لە ناوچەکانی ژێر کاریگەری تورکیا، بەڵکوو دەبێتە هۆی بەرزبوونەوەی هەڕەشە و گوشاری نوێ بۆسەر دانیشتوانی ناوچەکە بە تایبەت دانیشتوانی کورد.