ئیلهام ئەحمەد بانگهێشتی تورکیا دەکرێت

سبەی

بۆ بەشداریی کردن لە کۆنفرانسێکی تایبەت بە ئاشتی و کۆمەڵگەی دیموکراتی ئیلهام ئەحمەد بانگهێشتی تورکیا دەکرێت و پێشبینی دەکرێت سەرەتای مانگی داهاتووی بچێتە ئیستانبوڵ.

تەیب تەمەل، جێگری هاوسەرۆکی پارتی یەکسانی و دیموکراسی گەلان (دەم پارتی) ئاشکرای کرد، بۆ بەشداریی کردنی لە کۆنفرانسی نێودەوڵەتی ئاشتی و کۆمەڵگەی دیموکراتی بانگهێشتیان ئاڕاستەی ژمارەیەک کەسایەتی دیار کردووە، لە ناویاندا ئیلهام ئەحمەد هاوسەرۆکی پەیوەندییەکانی دەرەوەی ئیدارەی خۆسەر و هیوادارن بەربەستەکان لاببرێن و بتوانێت ئامادە دەبێت.

جێگری هاوسەرۆکی گشتی دەم پارتی بە ئاژانسی هەواڵی میزۆپۆتامیای راگەیاندووە: بە رژدی کاردەکەن بۆ ئەوەی ئیلهام ئەحمەد هاوسەرۆکی پەیوەندییەکانی دەرەوەی ئیدارەی خۆسەر لە باکور و رۆژهەڵاتی سوریا بەشداری کۆنفرانسەکە بکات و بۆ ئەوەش هەوڵی تەواو دەدەن مەرجەکان جێبەجێبکرێن و ئیلهام ئەحمەد بەناوی ئیدارەی خۆسەرەوە بەشداریی کۆنفرانسەکە بکات.

ئاماژەی بەوەکرد، کارەکانیان لە دوای کۆنفرانسەکە بەردەوام دەبێت، چونکە پرۆسەیەکی نێودەوڵەتی دەستی پێکردووە، ئەنجامەکانی کۆنفرانسەکە بۆ بەردەوامیدانە بە خەباتی دیپلۆماسی و داوا لەو کەسانە دەکەن کە بانگهێشتیان کردوون بەشداری کۆنفرانسەکە بکەن. 

لەلایەکی دیکەوە بەپێی چەند سەرچاوەیەکی رۆژنامەوانی ئەگەری زۆرە رۆژانی 6 و 7ـی ئەم مانگە، ئیلهام ئەحمەد بە یەکەم سەردانی فەرمی خۆی و لەسەر بانگهێشتی دەم پارتی سەردانی ئیستانبوڵ بکات بۆ بەشداریی کردن لەو کۆنفرانسەدا.

ئیلهام ئەحمەد: بەرژەوەندی هاوبەشمان لەگەڵ تورکیا هەیە 

رۆژی (21ـی تشرینی دووەمی 2025) لە چاوپێکەوتنێکیدا لەگەڵ ئاژانسی هەواڵی میزۆپۆتامیا، ئیلهام ئەحمەد هاوسەرۆکی پەیوەندییەکانی دەرەوەی ئیدارەی خۆسەری باکور و رۆژهەڵاتی سوریا رایگەیاند: تورکیا ساڵانێکە کورد لە سوریا وەک هەڕەشەیەک دەبینێت. ئەوەش پەیوەندی بەو سیاسەتە ناوخۆییەوە هەبوو کە دژی کورد پەیڕەو دەکرا. لە پرۆسەی ئاشتی و کۆمەڵگای دیموکراتیدا کاتی ئەوە هاتووە تورکیا هەڵوێستی خۆی بەرامبەر بە کورد بگۆڕێت.

وتیشی: "نەدوێنێ و نە ئەمڕۆ هیچ دوژمنایەتییەکمان بەرامبەر تورکیا نیشان نەداوە. هیچ نیازێکمان نییە سبەینێ دوژمنایەتی تورکیا بکەین، هیچ نیازێکمان نییە لە دژی ئەوان شەڕ بکەین. بەپێچەوانەوە دەڵێین بەرژەوەندی هاوبەشمان هەیە. لە بابەتی سەقامگیری سوریادا؛ ئەمەش کاریگەری لەسەر سەقامگیری تورکیا هەیە. پەیوەندییەکان لەم چوارچێوەیەدان، هیوادارین لە ڕۆژانی داهاتوودا لەگەڵ پێشکەوتنی پرۆسەکەدا هەنگاوی ئەرێنی بنرێت."

ئیلهام ئەحمەد رایگەیاند: پرۆسەی چارەسەری پرسی کورد لە تورکیا، کاریگەری ئەرێنی لەسەر باکور و ڕۆژهەڵاتی سوریاش دەبێت. ئێستا زەمینەی گفتوگۆ رەخساوە، بۆ ئەوەی هەندێک کێشە لە ڕێگەی دیالۆگەوە چارەسەر بکرێن. لە داهاتوودا دەتوانرێت گفتوگۆ لەسەر بەرژەوەندییە هاوبەشەکان بکرێت.

وتیشی: "ئێمە کراوەین بەڕووی چارەسەرێکی گشتیدا. بەشێکین لە سوریا، دەتوانین وەک بەشێک لە سوریا ڕاوێژ لەگەڵ تورکیا بکەین."

مەزڵوم عەبدی: بەلامەوە ئاساییە سەردانی تورکیا بکەم

سێ رۆژ دواتر و لە (24ـی تشرینی دووەمی 2025) مەزڵوم عەبدی فەرماندەی گشتی هێزەکانی سوریای دیموکرات رایگەیاند: دوای ئەو پرۆسەیەی لە تورکیا دەستی پێکردووە، پەیوەندییان لەگەڵ تورکیا هەبووە، کەناڵی کراوەی پەیوەندی لەنێوانیاندا هەیە، بەڵام نەگەیشتووەتە ئاستی دانوستان و پێشبینی دەکەن ئەو پەیوەندییانە بەرفراوانتر بێت و بگاتە ئاستی رێککەوتن لەسەر ژمارەیەک پرس و بابەت.

سەبارەت بە کاریگەری پرۆسەی ئاشتی و کۆمەڵگەی دیموکراتیک لە تورکیا لەسەر کورد لە سوریا، مەزڵوم عەبدی رایگەیاندووە: ئەو پرۆسەیە کاریگەری راستەوخۆی هەیە. لە ئێستادا ئاگربەست لەگەڵ سوپای تورکیا هەیە، بەهۆی ئەو پرۆسەیەوە بەدەستهاتووە و هیوادارن ببێتە ئاگربەستی هەمیشەیی. وەک هەسەدە ئامادەی گفتوگۆ و دانوستانن. دەیانەوێت لایەنێکی یارمەتیدەری پرۆسەکە بن، چونکە پێیانوایە دۆخی تورکیا و باکوری کوردستان کاریگەری لەسەر چارەسەرکردنی پرسی کورد لە سوریا هەیە.

فەرماندەی گشتی هەسەدە، ئاشکرای کرد لەماوەی رابردوودا لە رێگەی نامەوە پەیوەندییان لەگەڵ عەبدوڵڵا ئۆجەلان رێبەری پەکەکە هەبووە، روانگەی ئیمرالیان وەرگرتووە و ئەوانیش روانگەی خۆیان گەیاندووە، وتیشی: "ئێمە دەمانەوێت هەندێک بابەت گفتوگۆی لەسەر بکەین کە تەنها ئیمرالی دەتوانێت چارەسەری بکات".

فەرماندەی گشتی هەسەدە بە پێویستی دەزانێت، پەیوەندی ڕاستەوخۆ هەبێت بۆ چارەسەرکردنی بەشێک لە کێشەکان، پەیوەندی لەنێوان ڕۆژئاوای کوردستان و ئیمرالی دروست بکرێت. ئەو پەیوەندییە دروست بکرێت کاریگەریی دەبێت لەسەر پرۆسەی ئاشتی و دۆخی باکوری کوردستان و چارەسەری کێشەی کورد لە باکور و ڕۆژهەڵاتی سوریا.

لەبارەی سەردانی ئیمرالی، مەزڵوم عەبدی فەرماندەی گشتی هەسەدە ئاشکرای کرد؛ لە رێگەی ئەو شاندانەی سەردانی ئیمرالی دەکەن، ئۆجەلان خواستی خۆی نیشانداوە بەرپرسانی ڕۆژئاوای کوردستان سەردانی بکەن، هەروەها ئەوانیش ئەوە بەپێویست دەزانن و پێیانوایە کاریگەریی دەبێت.

وتیشی: "پێویست ناکات تورکیا لە پەیوەندی و سەردانی ڕۆژئاوای کوردستان بۆ ئیمرالی بترسێت، چونکە ئەوە لە بەرژەوەندی تورکیاشە".

لەبارەی ئەگەری سەردانی بۆ تورکیا، عەبدی نەیشاردەوە هیچ کێشەیەکیان لەو سەردانە نییە و رۆڵی دەبێت لە چارەسەرکردنی کێشەکانی نێوان هەردوولادا.