کاردانەوەی هێرشەکەی واشنتن؛ ئەمەریکا داوای مافی پەنابەری بۆ ئەفغانییەکان رادەگرێت
- لەکاردانەوەی هێرشەکەی واشنتنی نزیک لە کۆشکی سپی، کە تێیدا دوو پاسەوانی نیشتمانی برینداربوون، ئەمەریکا لە هەنگاوێکی بەپەلەدا داوای مافی پەنابەری بۆ ئەفغانییەکان راگرت. هاوکات دۆناڵد ترەمپ سەرۆکی ئەمەریکا هێرشێکی توندی کردە سەر کۆچبەران و بەگەورەترین هەڕەشە و مەترسی بۆ سەر وڵاتەکەی ناوی بردن.
سبەی
لەکاردانەوەی هێرشەکەی واشنتنی نزیک لە کۆشکی سپی، کە تێیدا دوو پاسەوانی نیشتمانی برینداربوون، ئەمەریکا لە هەنگاوێکی بەپەلەدا داوای مافی پەنابەری بۆ ئەفغانییەکان راگرت. هاوکات دۆناڵد ترەمپ سەرۆکی ئەمەریکا هێرشێکی توندی کردە سەر کۆچبەران و بەگەورەترین هەڕەشە و مەترسی بۆ سەر وڵاتەکەی ناوی بردن.
ئیدارەی دۆناڵد ترەمپ راگرتنی دەستبەجێی سەرجەم داواکارییەکانی پەنابەری بۆ هاووڵاتیانی ئەفغانی راگەیاند. ئەویش لە کاردانەوەی هێرشە چەکدارییەکەی نزیک کۆشکی سپی، کە لەلایەن هاووڵاتییەکی ئەفغانییەوە ئەنجامدرا.
خزمەتگوزاری رەگەزنامە و کۆچبەری ئەمەریکا (USCIS) لە پۆستێکیدا لەسەر پلاتفۆرمی X رایگەیاند: بڕیارەکە راستەوخۆ کاری پێکراوە و مامەڵەی ئەو ئەفغانیانەیان هەڵپەساردووە، کە داوای مافی پەنابەریان پێشکەش کردووە.
لای خۆیەوە دۆناڵد ترەمپ هێرشێکی توندی کردە سەر کۆچبەران و بەگەورەترین هەڕەشە و مەترسی بۆ سەر ئەمەریکا وەسیفکردن. هاوکات رایگەیاند:ئەنجامدەری هێرشەکە لە ساڵی 2021 لە ئەفغانستانەوە هاتووەتە ئەمەریکا و یەکێکە لەو ملیۆنان کەسانەی، کە لەلایەن ئیدارەی جۆ بایدن سەرۆکی پێشووی ئەمەریکا، بەبێ پشکنین رێگەیان پێدراوە بێنە ناو ئەمەریکاوە. سەرۆکی ئەمەریکا ئیدارەی پێشووی تۆمەتبارکرد، بەوەی ئاسانکاری کردووە بۆ هاتنی 20 ملیۆن کەسی بیانی نەناسراو بۆ ئەمەریکا. جەختیشی لەوە کردەوە، دەبێت پشکنینی دووبارە بۆ هەموو ئەو کەسانە بکرێتەوە، کە لە ئەفغانستانەوە هاتوونەتە وڵاتەکەی.
بەپێی زانیارییەکانی ئاژانسی سی ئێن ئێن، تۆمەتبارەکە لە ساڵی 2024 داوای مافی پەنابەری پێشکەش کردووە، بەڵام داواکارییەکەی لە مانگی نیسانی 2025 لەلایەن ئیدارەی ترەمپەوە پەسەندکراوە.
لە بارەی ناسنامەی تەقەکەرەوە، کەناڵی سی بی ئێس نیوز بڵاویکردووەتەوە ئەو کەسە خەڵکی ئەفغانستانە و تەمەنی 29 ساڵە. ئێن بی سی نیوز ئاشکرایکردووە، 10 ساڵ لە سوپای ئەفغانستان و هێزەکانی ئۆپەراسیۆنە تایبەتەکانی ئەمەریکا لە ئەفغانستان خزمەتی کردووە، پێش ئەوەی خۆی بگەیەنێتە ئەمەریکا.
هاوکات پیت هیگسێت وەزیری جەنگی ئەمەریکا بڵاوەپێکردنی 500 ئەندامی سەر بە پاسەوانی نیشتمانی لە واشنتۆنی پایتەخت راگەیاند، بەوەش ژمارەیان بۆ 2500 سەرباز بەرزدەبێتەوە. هیگسێت لە کاتی راگەیاندنی بڕیارەکەیدا وتی، "هێرشەکە ئیرادەمان بەهێزدەکات، بۆئەوەی واشنتن بکەینە شوێنێکی ئارام و سەلامەتتر".