چات جی پی تی پەرەی زیاتری پێدرا، ئێستا توانای لێکدانەوەی بۆ وێنە و دەنگ هەیە

سبەی

چات جی پی تی ئێستا دەتوانێت لێکدانەوە بۆ وێنە و دەنگ بکات، تواناکانی بە گشتی بەرەوپێشەوەبراوە.

کۆمپانیای ئۆپن ئەی ئای (OpenAI) نوێکارییەکی بەرچاوی بۆ تەکنەلۆژیای بەناوبانگی زیرەکیی دەستکردی چات جی پی تی ئەنجامداوە، کۆمپانیاکە دەڵێت ئەم نوێکارییە بێبەرامبەرە و بۆ هەموو بەکارهێنەرانە. مۆدێلە نوێیەکە بەناوی GPT-4oـەوەیە، هاوشێوەی مرۆڤە.

ئەم نوێکارییەیی ئۆپن ئەی ئای تەنها ڕۆژێک پێش ڕاگەیاندنەکەی گوگڵ دێت سەبارەت بە زیرەکیی دەستکردەکەی جێمنای (Gemini) کە ڕکابەری چات جی پی تی دەکات. سام ئاڵتمان بەڕێوەبەری جێبەجێکاری کۆمپانیای OpenAI خۆشحاڵی خۆی دەربڕی سەبارەت بە بڵاوکردنەوەی GPT-4o بۆ بەکارهێنەرانی، ئاڵتمان تیشکی خستە سەر توانای تێگەیشتن و وەڵامدانەوەی فەرمانەکان لە سەرانسەری فۆرماتە جیاوازەکاندا، لەوانەش دەنگ، دەق و وێنە.

چی نوێی تێدایە GPT-4o؟

جگە لە بەهێزکردنی تواناکانی بۆ پرۆسێسکردن و خوێندنەوەی دەقەکان، چەند تایبەتمەندییەکی نوێی بۆ زیادکراوە وەک توانای تێگەیشتنی فرەزمان، شرۆڤەکردنی دەنگ، و شیکاری بۆ وێنە.

ئەم مۆدێلە نوێیە دەتوانێت وەرگێڕان ئەنجامبدات بۆ زمانەکان، لێکدانەوە بۆ دەربڕینی دەموچاو و تەنانەت ڕێنماییکردنی بەکارهێنەران لە کێشە ئاڵۆزەکان بکات. GPT-4o دەتوانێت شیکردنەوەی بۆ ژینگەیی بەکارهێنەرەکە بکات لە ڕێگەی کامێرای مۆبایلەوە هاوشێوەی یاریدەدەری زیرەکیی دەستکردی ناو فیلمی "Her".

بە کورتی ئەم نوێکردنەوەیە توانای لێکدانەوەی وێنە و دەنگی بۆ چات جی پی تی زیاکردووە بە شێوەیەکی پێشکەوتوو و جیاواز لە ڕکابەرەکانی؛ هاوکات بێبەرامبەریش بەردەست دەبێت.

کۆمپانیاکە هاوشانی مایکرۆسۆفت و گوگڵ و مێتا بەردەوامە لە نوێکردنەوە و بەرەوپێشبردنی ئامڕازەکانی زیرەکیی دەستکردەکەی؛ هەموویان کێبڕکێ دەکەن بۆ باڵادەستی لە بواری زیرەکیی دەستکردا.

سەرچاوە: ئاژانسی هەواڵی فەرەنسی