ساڵانە بە بەهای یەک ملیار و 500 ملیۆن دۆلار پێداویستییەکانی ناوماڵ بە ڕێگای نایاسایی رەوانەی ئێران دەکرێت

سبەی

محەمەد ڕەزا شاهیدی بە میدیاکانی وڵاتەکەی ڕاگەیاندوە ساڵانە بە بەهای یەک ملیار و 500 ملیۆن دۆلار پێداویستییەکانی ناو ماڵ بە ڕێگای نایاسایی دەهێندرێتە ئێران و ژمارەی ئەو تەلەڤزیۆنانەی بەو ڕێگەیە هێندراونەتە ئێران گەیشتوەتە 700 هەزار.

ناوبراو ڕەخنەی لەوە گرت کە لایەنە پەیوەندیدارەکان تەنها لەسەر کاغەز کار بەو یاسایانە دەکەن کە بۆ ڕێگەگرتن لە هاتنی پێداویستی و کەلوپەلی بە ڕێگای نایاسایی دەرچوون، دەڵێت: "بۆیە تا دێت هاتنی پێداویستی لە دەرەوە بە ڕێگای نایاسایی زیاتر دەبێت. لە کاتێکدا بە ڕێژەی لە سەدا 30 باج لەسەر بەرهەمهێنانی کەلوپەل و پێداویستییەکانی ناوخۆ داندراوە، کەچی هیچ باجێک لەسەر پێداویستی و کەلوپەلی بە قاچاخ هێندراو وەرناگیرێت".

ناوبراو ئاماژەی بەوە دا کە ئێستا هاوردەکردنی کەلوپەل و پێداویستی دەرەوە بە ڕێگای نایاسایی زۆر لەوە زیاترە کە پێشتر بەپێی یاسای هاوردەکردن کەلوپەل و پێداویستی بۆ ئێران هاوردە دەکرا. بۆ ئەمە نمونەی بەوە هێنایەوە کە لە 2017 شەش هەزار و 400 تەلەڤزیۆن هاوردەی ئێران کراون کەچی ئێستا 500 تاکوو 700 هەزار تەلەڤزیۆن بە ڕێگای نایاسایی هێندراونەتە ئێران. 

محەمەد ڕەزا شاهیدی گوتیشی: "لە کاتێکدا بانکی ناوەندیی ئێران چاودێری پارەی تەواوی ئێرانییەکان دەکات، خێرە چاودێری ئەو پێداویستی و کەلوپەلانە ناکات کە بە شێوەی قاچاخ دەهێندرێنە ئێران؟ تەنانەت فەرمانگەی وەرگرتنی باجیش تەقەی سەری دێت لەوەی پێداویستی و کەلوپەلی قاچاخ لە بازاڕ و بە شێوەی ئۆنلاین دەفرۆشرێت".