بایدن: ڕێنماییم داوە گواستنەوەی دەسەڵات بۆ ترەمپ ئاسان بكرێت
جۆ بایدن سه‌رۆكی ئه‌مه‌ریكا
سبه‌ی
له یه‌كه‌م وتاریدا دوای سه‌ركه‌وتنی دۆناڵد تره‌مپ له هه‌ڵبژاردنی سه‌رۆكایه‌تیی ئه‌مه‌ریكادا، جۆ بایدن سه‌رۆكی ئه‌مه‌ریكا پیرۆزبایی له تره‌مپ كرد و ڕایگه‌یاند، "ڕێنماییم داوە بە ئیدارەكەم گواستنەوەی دەسەڵات بۆ دۆناڵد ترەمپ ئاسان بكەن و دامه‌زراوه‌كانمان ناخه‌ینه‌ژێر گومانه‌وه".
كه‌مێك له‌مه‌وبه‌ر جۆ بایدن سه‌رۆكی ئه‌مه‌ریكا، وتارێكی پێشكه‌شكرد و ماوه‌ی سه‌رۆكایه‌تیی خۆی به مێژوویی ناوبرد و ئاماژه‌ی بۆ مێژووی 200 ساڵه‌ی ئه‌مه‌ریكا له هه‌ڵبژاردن و دیموكراسیدا كرد و وتی، "متمانه‌مان به دامه‌زراوه‌كانی وڵاته‌كه‌مان هه‌یه و به دۆڕاندنمان له هه‌ڵبژاردن، دامه‌زراوه‌كانمان ناخه‌ینه‌ژێر گومانه‌وه".
بایدن، ئاماده‌یی ته‌واوی خۆی بۆ خێرا گواستنه‌وه‌ی ده‌سه‌ڵات بۆ سه‌رۆكی هه‌ڵبژێردراو ڕاگه‌یاند و وتی، "ڕێنماییم داوە بە ئیدارەكەم كارەكانی گواستنەوەی دەسەڵات بۆ دۆناڵد ترەمپ ئاسان بكەن".
له‌باره‌ی شكستهێنانی پارته‌كه‌ی له هه‌ڵبژاردنی سه‌رۆكایه‌تیدا، جۆ بایدن ئاماژه‌ی بۆ ئه‌وه كرد كه سه‌رباری ئه‌وه‌ی دیموكراتخوازه‌كان شكستیانهێناوه، ده‌توانن جارێكی دیكه هه‌ڵبستنه‌وه و ڕێز له‌و هه‌لومه‌رجه‌ی دوای هه‌ڵبژاردن ده‌گرن و وتی، "پۆستی سه‌رۆكایه‌تی بۆ هه‌موو ئه‌مه‌ریكییه‌كانه و پێویستیمان به به‌رده‌وامبوون و باوه‌ڕه".