24 ئەوەندەی بۆمبەکەی هێرۆشیما بەهێزترە .. ئەمەریکا بۆمبێکی ئەتۆمی نوێ دروست دەکات

سبەی

بەرپرسانی ئاسایشی نەتەوەیی ئەمەریکا ئاشکرایان کرد؛ لە هەنگاوەکانی کۆتایی بۆ بەرهەمهێنانی بۆمبێکی ئەتۆمی نزیک بونەتەوە، کە زۆر لە بۆمبەکانی سەردەمی جەنگی جیهانیی دووەم بەهێزترە و 24 هێندەی ئەو بۆمبەی کە هێرشیمای لە ژاپۆن پێکرایە ئامانج بەهێزتر و وێرانکارترە.

تۆڕی فۆکس نیوز، پشت بەستن بە زانیاریی بەرپرسانی ئیدارەی نیشتیمانی ئاسایشی ئەتۆمی بڵاوی کردەوە، بۆمبەکە لە جۆری (B61-13)ـەیە و بەمنزیکانە تەواودەکرێت و رادەستیان دەکرێت.

بەپێی ئەو سەرچاوانە بڕیاربوو بۆمبە ئەتۆمییەکە تا کۆتای ساڵ تەواو بکرێت، بەڵام پەلەیان کردووە لە تەواوکردنی و 7 مانگ پێش وادەی خۆی ئامادەی دەکەن.

پرۆسەی دروستکردن و پەرەپێدانی بۆمبەکە لەسەردەمی دەسەڵاتی جۆ بایدن و لە ساڵی 2023 دەست بە پەرەپێدانی کراوە، کە چەندین تایبەتمەندی بۆ زیادکراوە، لەوانە، بە ئامانجگرتنی ئامانجی سەربازیی وردو و دیاریکراو و ئامانجی قورس و ناوچەی بەرفراوان.

بۆمبە نوێیەکە، کۆپییەکی پەرەپێدراوی بۆمبی (B61)ـی ناسراوە و تواناکەی 360 کیلۆ تۆنە، لەکاتێکدا ئەو بۆمبەی لە هێروشیمای پێدرا تواناکەی 15 کیلۆ تۆن و بۆمبەکەی ناکازاکیش 21 کیلۆتۆن بوو.

تاقیگەکانی ساندیای نیشتیمانی کە بۆمبە ئەتۆمییەکەیان پەرەپێداوە، رایانگەیاندووە: پرۆگرامی بۆمبی (B61-13) پێش وادەی دیاری کراوی خۆی تەواو دەکرێت و رادەستی لایەنی پەیوەندیداری ئەمەریکا دەکرێت.

ئاماژەیان بەوەکردووە؛ پڕۆژەکە بە هاوبەشی لەگەڵ تاقیگەی لۆس ئەلامۆسی نیشتیمانی و ئیدارەی نیشتیمانی ئاسایشی ئەتۆمی پەرەپێدراوە و ئاڵنگارییەکی یەکلاکەرەوە و پێداویستییەکی گرنگی نیشتیمانیی بووە و لە کۆتاییدا توانیویانە ئامانجەکەیان بەدەستبهێنن.