" پەكەكە نە چەك دادەنێت و نە تەسلیم دەبێت"؛ هاوسەرۆكی كەجەكە: بۆ پرۆسەی ئاشتی هیچ هەنگاوێكی روون نەنراوە

سبەی

هاوسەرۆكی كەجەكە سەبارەت بە پرۆسەی ئاشتی رەخنەی توند لە دەوڵەتی توركیا دەگرێت، دەڵێت " بەم نزیكایەتییە پەكەكە نە چەك دادەنێت و نە تەسلیم دەبێت، بۆ پرۆسەی ئاشتی هیچ هەنگاوێكی روون نەنراوە".

لە كۆتایی ساڵی رابردوەوە بە دەستپێشخەری دەوڵەت باخچەلی سەرۆكی "مەهەپە" پرۆسەیەك لە توركیا دەستیپێكردووە، عەبدوڵڵا ئۆجەلان رێبەری زیندانیكراوی پەكەكە لە ئیمراڵیەوە بانگەوازی چەك دانان و هەڵوەشاندنەوەی پەكەكەی كرد و پەكەكەش شەڕی راگرت و خۆی هەڵوەشاندەوە، بەڵام تائێستا لە توركیا هیچ هەنگاوێكی یاسایی نەنراوە و ناوبەناو توركیا بەردەوامە لە هێرشەكانی بۆسەر گەریلاكانی پەكەكە.

بەسێ هۆزات، هاوسەرۆكی كۆنسەی بەڕێوەبەری كەجەكە لە چاوپێكەوتنێكدا لەگەڵ "میدیا خەبەر" رایگەیاند:"پێناسەكردنی ئەم پڕۆسەیە وەك "پڕۆسەی بێ تیرۆر" كە لە لایەن دەسەڵاتدارییەوە دەكرێت، زۆر هەڵەیە، ناوی ئەم پڕۆسەیە روونە، پڕۆسەی ئاشتی و كۆمەڵگەی دیموكراتیكە، ڕێبەر ئاپۆ لە 27ی شوبات بانگەوازی ئاشتی و كۆمەڵگەی دیموكراتیكی كرد، ئەم بانگەوازە بە هاوكاری شاندێكی دەوڵەت و ڕێكەوتنی هاوبەش پەرەی پێدرا، پێویستە پێناسەی "توركیایەكی بێ تیرۆر" لاببرێت، گەر نا گفتوگۆی ڕاست پەرەناسێنێت و پێشكەوتنی ڕاست لە پڕۆسەكەدا بە دی نایەت".

"لەگەڵ شەڕی ئیسرائیل و ئێراندا زیاتر بەها و گرنگی ئەم پڕۆسەیە دەركەوت"

وتیشی:"لەگەڵ شەڕی ئیسرائیل و ئێراندا زیاتر بەها و گرنگی ئەم پڕۆسەیە دەركەوت، لە ئێستادا هەرێمەكە لە دۆزەخێكی گەورەدایە، ئێدی نۆرەی توركیا هاتووە، هەرێمەكە سەرلەنوێ دیزایندەكرێتەوە، لەبەر ئەمەش دەبێت گفتوگۆی تەندروست بكەین، پێویستە دەوڵەت و حكومەت لەم بابەتەدا هەنگاوی روون بنێن، وەك تەڤگەر، ئەو هەنگاوانەی دەبوو لە لایەن ئێمە بنرێت، نامان".

بەسێ هۆزات دەشڵێت "بە شێوەیەكی ئەرێنی لە بانگەوازی ڕێبەر ئاپۆ نزیك بووینەوە، لە یەكی ئادار ئاگربەستمان ڕاگەیاند، دوای ئەوە لە پێنجی ئایار كۆنگرەی 12ی پەكەكەمان بەست، ئێستا كۆتاییمان بە شەڕی چەكداری لە بەرانبەر توركیا هێناوە، دەبێت دەوڵەتی توركیا لە بەرانبەر ئەمەدا هەنگاو بنێت، دەبێت گۆڕەپانی سیاسی بكرێتەوە بۆ ئەوەی ئەوكەسانەی چەك لە دژی توركیا بەكاردەهێنن بچن و لە توركیا سیاسەت بكەن".

"تاوەكو ئێستا هیچ هەنگاوێك لەسەر ئەم بابەتە نەنراوە"

"تاوەكو ئێستا هیچ هەنگاوێك لەسەر ئەم بابەتە نەنراوە، ئەم دۆخە بەم شێوەیە بەرەوپێش ناچێت، تاوەكو گۆڕانكاری یاسایی نەكرێت، چۆن گەریلا لە چیاوە دابەزێت؟ چۆن دەتوانن لە دەشتەكاندا خەریكی سیاسەت بن؟، دەسەڵاتدار بەڕاستی چارەسەری بوێت، ڕاستەوخۆ دوای ئەوەی پەكەكە دەستبەرداری شەڕی چەكداری بوو، هەنگاوی دەنا، لە ڕۆژی دووەمدا كۆمیسیۆنێكی دروست دەكرد، پەرلەمانی كۆدەكردەوە و گفتوگۆی دەستپێدەكرد. یاسای پێویستی دەردەكرد، ڕێسای یاسایی تایبەتی بۆ پەكەكە دروست دەكرد. مافی سیاسیی پێدەبەخشی و گەرەنتی دەستووری بۆ دابین دەكرد. بەم شێوەیە گەریلا چەكەكانیان دادەنا و دەچوونە شار و بەشداری سیاسەتی یاسایی دەبوون". هاوسەرۆكی كەجەكە وا دەڵێت.

بەسێ هۆزات دەپرسێت "چەنێك بەسەر 12 ی ئایاردا تێپەڕیوە؟ خۆشی وەڵام دەداتەوە و دەڵێت " ئێستا مانگی حوزەیرانە، كۆتایی مانگی حوزەیران، هێشتا هیچ نییە، ئەمەش قبوڵ ناكرێت".

"بەم نزیكایەتییە پەكەكە نە چەك دادەنێت و نە تەسلیم دەبێت"

هەروەها دەشڵێت "لە ئێستادا هێشتا هیچ هەنگاوێكی ڕوون نەنراوە. ناتوانین بڵێین بە تەواوی وەستاوە، بەڵام ناتوانین بڵێین لەسەر ڕێگەی خۆیدا بەڕێوەدەچێت، نزیكایەتی دەسەڵاتداری بۆ چارەسەری دیموكراتیكی پرسی كورد و دیموكراتیزەكردنی توركیا نییە، دەڵێت پەكەكە چەك دادەنێت، تەسلیم دەبێت، بەم نزیكایەتییە پەكەكە نە چەك دادەنێت و نە تەسلیم دەبێت، ئەم ڕۆژەڤانە بە توندی ڕەخنە دەكەین، ڕەتی دەكەینەوە، ئەم دەسەڵاتە دەبێت جدی بێت".

هاوسەرۆكی كەجەكە باس لە دانانی قەییوم و فشارەكان لە توركیا دەكات و دەڵێت "لە كوردستان بینیمان، پێشتر لە ڕێگەی قەیوم دەستیان بەسەر شارەوانییەكانی هەدەپەدا گرتبوو، ئێستاش هەمان سیاسەت بەردەوامە، چیتر ناتوانی كورد فریو بدەیت. ناتوانی بە فرت و فێڵ كورد فریو بدەیت، ئەوكاتە بەسەر چوو، ئەوكاتە تەواو بوو، وەرە سەر ڕێگەی ڕاست، فرت و فێڵ مەكە".

 دەربارەی ڕۆژهەڵاتی كوردستان بەسێ هۆزات بەم شێوەیەیە دەدوێت: "لە بەرانبەر ئەم دۆخەدا كورد هەڵوێستی خۆی دیاریكردووە، بێگومان كورد پشت بە هێزی خۆبەڕێوەبەری دەسپێرێت، ڕێكخستنی خۆبەڕێوەبەری و پاراستنی خۆبەڕێوەبەری، كورد بە متمانە، پشتبەستن چاوەڕێكردی هێزێكی دیكە ناتوانێ هەبوون و ئازادی خۆی مسۆگەر بكات و بپارێزێت".

"هەربۆیە لە ڕاگەیەندراوەكەی پەژاكدا ئەمە بە ڕوونی دیاریكرابوو، بە ستراتیژێكی وەها تێكۆشان بەڕێوەدەبەین، بۆیە هەوڵ دەدەین لەگەڵ هەموو گەلانی ئێران و كوردستاندا تێكۆشانێكی هاوبەش، رێكخستنێكی هاوبەش و خۆپاراستنێكی هاوبەش بەڕێوەببەین. تەنها بەم شێوەیە دەتوانن خۆیان بپارێزن و هەبوون و ئازادی خۆیان مسۆگەر بكەن. ئەمە گرنگە".