باڵیۆزخانەی ئەمەریکا: هەواڵی کشانەوەی تەواوەتی هێزەکانمان لە بەغداد زۆر ورد نییە

سبەی

باڵیۆزخانەی ئەمەریکا لە بەغداد ئەو هەواڵانە رەتدەکاتەوە کە باس لە کشانەوەی هێزەکانیان دەکەن لە سبەینێ شەممەوە.

وتەبێژی باڵیۆزخانەی ئەمەریکا لە بەغداد لە بەیاننامەیەکدا رایگەیاند: ئەو هەواڵانەی کە  باس لەوە دەکەن هێزەکانی ئەمەریکا سبەینێ بە تەواوەتی لە بەغداد دەکشێنەوە زۆر وورد نین.

ئاماژەی بەوەکردووە؛ وەک لە بەیاننامە هاوبەشەکەی رۆژی (27ـی ئەیلولی 2024) هاتووە خشتەی کاتی بۆ کۆتایی هێنان بە ئەرکی سەربازیی هاوپەیمانی نێودەوڵەتی بۆ تێکشکاندنی داعش لە عێراق دیاریکراوە، هێزەکانی ئۆپەراسیۆنە هاوبەشەکان و ئیرادەی تۆکمە، تائێستا لەسەر کارەکانی بەردەوامە، بەپێی ئەو ئەرکەی لە خشتەکە بۆی دانراوە، ئەو رێککەوتنە کارایە تا کۆتایی هاتنی ئەرکە سەربازییەکان.

ئاماژەی بەوەکردووە، ئەوەی لە راگەیەندراوە هاوبەشەکەدا هاتووە، پەیوەندییە هاوبەشەکانی هاوپەیمانی نێودەوڵەتی لە عێراق بە ئاڕاستەی پەیوەندی ئاسایشی هاوبەش دەچێت.

سەبارەت بە ووردەکاریی پلانەکەیان و پرۆسە سەربازییەکان وەزارەتی بەرگری ئەمەریکا رونکردنەوەی زیاتری لایە.

ئەو راگەیەندراوە دوای ئەوە هات، بەپێی چەند سەرچاوەیەکی هەواڵی عێراقی و عەرەبی، سبەینێ شەممە (30ـی ئابی 2025) هێزەکانی ئەمەریکا لە بارەگای فەرماندەیی ئۆپەراسیۆنە هاوبەشەکان لە بەغداد دەکشێنەوە.

هەر بەپێی سەرچاوەکان، جگە لە چۆڵکردنی فەرماندەیی ئۆپەراسیۆنە هاوبەشەکان، سبەینێ هێزەکانی ئەمەریکا لە ناوچەی سەوز و فڕۆکەخانەی بەغدادیش دەست بە کشانەوە دەکەن.

رۆژی ( 17ـی ئابی 2025) سەرچاوەیەک لە حکومەتی عێراق ئاشکرای کرد: هێزەکانی ئەمەریکا لە مانگی ئەیلوولەوە لە سێ بنکەى سەرەکى فڕۆکەخانەى بەغداد، فەرماندەیی پڕۆسە هاوبەشەکان و بنکەى عەین ئەسەد دەکشێنەوە بە ئاڕاستەى هەولێر.

هاوکات بەپێی راپۆرتێکی رۆژنامەى شەرقولئەوسەت، هێزەکانی ئەمەریکا لە عێراق دەستیان بە جوڵاندنی هێز و کەرەستە سەربازییەکانیان کردووە، ئەوەش وەک وەڵامدانەوەک بۆ پەرەسەندنی ئاڵۆزییەکانی نێوان ئێران و ئیسرائیل.

بەرپرسێکی باڵای ئەمەریکا پشتراستی کردووەتەوە، هێزەکان و کەرەستە سەربازییەکانی ئەمەریکا لە بنکەی عەین ئەسەد لە عێراق جێگایان گۆڕدراوە، کەرەستەکان سیستمی هەستیاری وەک رادار لە خۆدەگرێت.

خشتەی کشانەوەی هێزەکانی ئەمەریکا لە عێراق

 پێشتر "سبەی" لە راپۆرتێکیدا لە زاری چەندین سەرچاوەی ئاگاداری سیاسی و سەربازییەوە بڵاوی کردەوە، لەماوەی رابردوودا راوێژکارێکی باڵای حکومەتی عێراق سەردانی واشنتنی کردووە و لەگەڵ بەرپرسانی ئەمەریکا کۆبووەتەوە، ئەوانیش ئاگاداریان کردووەتەوە  پێشبینی دەکەن مانگی داهاتوو بەشێک لە هێزەکانیان لە بنکەی عەین ئەسەد بکشێننەوە.

ئەوە لە کاتێکدایە کە بڕیاری کشانەوەی بەشێک لە هێزەکانی ئەمەریکا لە مانگی داهاتوو بەپێچەوانەی ئەو خشتەیە دێت پێشتر هەردوو لایەن لەسەری رێککەوتنیان کردبووە، بەپێی رێککەوتنەکە بڕیار بوو دوای هەڵبژاردنی پەرلەمانی عێراق ئەنجام بدرێت، بەشێک لە شارەزایانی سەربازی و سیاسیش دەڵێن ئەو هەنگاوەی ئەمەریکا پێشبینی نەکراو بووە.

بە گوێرەی سەرچاوەکەی عەربی جەدید بەرپرسانی ئەمەریکی بە راوێژکارەکانی سودانیان راگەیاندووە کە حکومەتی عێراق نەیتوانیوە بەڵێنەکانی خۆی سەبارەت بە  چەکداماڵینی گروپەکانی ناو حەشدی شەعبی جێبەجێ بکات و رێگریی لە بەهێزبوونیان بکات، ئەمە جگە لەوەی حکومەتەکەی سودانی نەیتوانیوە وڵاتەکە لە پشتبەستن بە غازی ئێران رزگار بکات، رێگری بکات لەو هێرشە مووشەکیانەی لەلایەن میلیشیاکانەوە ئەنجام دەدرێت، هەروەها  نەیتوانیوە رێگریی لە هێرشە مووشەکییەکان بۆ سەر ناوچەکانی هەرێمی کوردستان و دیاریکردنی چارەنوسی هاوڵاتییەکی رفێنراوی روسی- ئیسرائیلی ئاشکرا بکات.

ئەو سەرچاوانە ئاماژەیان بەوەکردووە، "بەرپرسانی ئەمەریکی دەسەڵاتدارانی عێراقیان ئاگادارکردووەتەوە، دەبێت سەرۆک وەزیران پڕۆژەیاسای حەشدی شەعبی  لە پەرلەمان بکشێنێتەوە.