چەکدارانی داعش لە گوندێکی سنوری ناحیەی شوان دەردەکەونەوە

سبەی

بەڕێوەبەری ناحیەی پردێ ئاشکرای دەکات، ژمارەیەک چەکداری داعش لە سنوری ناحیەی شوان جموجوڵیان دەستپێکردووە و گومانی زۆر دەکرێت چەکداری داعش بن.

عەبدولموتەڵیب نەجمەدین بەڕێوەبەری ناحیەی پردێ لە پارێزگای کەرکوک ئەمڕۆ شەممە (30ـی ئابی 2025) رایگەیاند: جموجوڵی ژمارەیەک چەکدار لە یەکێک لە گوندەکانی سەر بە ناحیەی شوان لە باکوری رۆژئاوای کەرکوک بینراوە، گومانەکان زیاتر بۆ چەکدارانی داعشە.

بەڕێوەبەری ناحیەی پردێ، بە سایتی شەفەق نیوزی راگەیاندووە: ئەو زانیارییانەی لە دانیشتوانی گوندی دارەمانەی سنوری شوانەوە بەدەستمان گەیشتووە، شەش چەکداری نەناسراو چونەتە ماڵێکی گوندەکە و داوای خوادن و خواردنەوەیان کردووە، پێشئەوەی ناوچەکە بەجێبهێڵن.

وتیشی: "دوای ئاگادارکردنەوەی هێزە ئەمنییەکان دەستبەجێ گەیشتونەتە ناوچەکە و دەستیان بە لێکۆڵینەوە و گەڕان و کێوماڵی ناوچەکە کردووە، چاودێریی چالاکیی و جوڵەی ئەو چەکدارانەیان کردووە.

ئەوە لەکاتێکدایە لەماوەی رابردوودا، جوتیارێکی سنوری ناحیەی پردێ لەلایەن ژمارەیەک چەکدارەوە رفێنرا، دواتر بەرامبەر بڕە پارەیەک ئازاد کرا.

بەڕێوەبەری ناحیەی پردێ رایگەیاندووە: زنجیرە ناوچەکان کە لە سنوری ناحیەی پردێ دەستپێدەکات و تا دەگاتە قەزای دبس پێویستی بە چاودێریی بەردەوام و زیاتر هەیە لە رووی ئاسایشەوە. بۆ رێگریی کردن لە هەر کردەوە و چالاکییەکی تیرۆریستی یان جوڵەی گوماناوی کە مەترسی لەسەر ئاسایش و گیانی هاوڵاتیان ناوچەکە درووست بکات.

لەلایەکی دیکەوە، حسێن خالید شیکرەوەی ئاسایشی پێیوایە، ئەوەی لە گوندی دارەمانە بینراوە ئاماژەیەکی روونە کە هێشتا چەکدارانی داعش لە سنورەکە چالاکییان هەیە و بۆشایی ئەمنی لە ناوچەکە هەیە. داواکردنی خواردن و پارە بۆ درووستکردنی فشاری دەرونییە لەسەر دانیشتوانی ناوچەکە، بۆ درووستکردنی پێشێویی و کۆنترۆڵی گریمانەییە بەسەر ناوچەکەدا.

ئاماژەی بەوەکردووە؛ ئەو گروپە ئێستا پشت بە جوڵەی گروپی بچوک دەبەستن بۆ ئەوەی خۆیان لە چاودێری ئاسمانی و زەمینی بپارێزن، سروشتی ناوچەکەش کە سەختە یارمەتیدەریانە بۆ چالاکییەکانیان.

بەپێویستی دەزانێت بۆ کۆنترۆڵکردنی ناوچەکە یەکەی جێگیر لە گوندەکانی ناوچەکە دابنرێت و هەماهەنگی سەربازی و هەواڵگریی و ئاسایش لەنێوان هێزەکان زیاتر بکرێت.

لەماوەی رابردوودا، لە سنوری پارێزگای کەرکوک، شانەکانی داعش دەستیان بە جموجوڵ کردووە بەتایبەتی لە سێگۆشەی سنوریی نێوان کەرکوک، سەڵاحەدین و دیالە و سنورەکانی نێوان پارێزگای کەرکوک و هەولێر و ناوچە دوورە دەستەکان.

ئەو گروپە بۆشایی ئەمنی و هەڵکەوتەی جوگرافیی ناوچەکەیان قۆستوەتەوە بۆ جموجوڵەکانیان و ناو بەناویش هێرش و کردەوەی سەربازیی دژی خەڵکی ناوچەکە و هێزە چەکدارەکان ئەنجام دەدەن.

سوپای عێراق و دەزگای دژەتێرۆریش لەماوەی رابردوودا ژمارەیەک ئۆپەراسیۆنی ئاسمانیی و هەڵمەتی سەربازییان لە ناوچەکە ئەنجامدا و ژمارەیەک چەکداری ئەو گروپەیان کوشت، بەڵام هێشتا نەتوانراوە بە تەواوەتی رێگریی لە چالاکییەکانیان بکرێت.