چۆن دەنگۆى مردنی ترەمپ تۆڕە کۆمەڵایەتییەکانى تەنى؟

سبەی

ئەمڕۆ شەممە (30ـی ئابی 2025)، سۆشیاڵ میدیا پڕ بوو لە دەنگۆى مردنی دۆناڵد ترەمپ سەرۆکی ئەمەریکا، ئەوەش دوای ئەوەی کەسێکی باڵا لە ئیدارەکەی رایگەیاند ئامادەیە جێگەی بگرێتەوە، ئەگەر کۆچى دوایی بکات.

رۆژی چوارشەممەى رابردوو (27ـی ئابی 2025)، جەیدی ڤانس، جێگری سەرۆکی ئەمەریکا، بەشداریی بەرنامەیەکی کرد و رایگەیاند، ئەگەر "تراژیدیایەکی خراپ" مەبەستی مردنی ترەمپ بوو، رووبدات ئامادەیە جێگەی سەرۆکی ئەمەریکا بگرێتەوە.

کاتی قسەکەی جێگری سەرۆکی ئەمەریکا بووە هۆی دروستکردنی مشتومڕێکی زۆر لە تۆڕە کۆمەڵایەتییەکان، چونکە لە ماوەکانی رابروودا، ژمارەیەک وێنەی دۆناڵد ترەمپ بڵاوبوونەوە، تیایدا دەرکەوتووە رەنگی بەشێک لە دەستی راستی سەرۆکی ئەمەریکا گۆڕاوە، ئەوەش بووە هۆی دروستبوونی مشتومڕ لەسەر تەندروستی ترەمپ.

دۆناڵد ترەمپ بەهۆی زۆرى تەمەنییەوە هۆشداریی لەسەر تەندروستی دەدرێت، لەگەڵ بڵاوبوونەوەی وێنەکانی دەستی راستی و قسەکانی جەیدی ڤانس، دەنگى مردنی زیاتر لە تۆڕەکۆمەڵایەتییەکان بووە جێگەى باس.

ترەمپى تەمەن 79 ساڵ بەتەمەنترین سەرۆکی ئەمریکایە، لەکاتێکدا ڤانس سێیەم گەنجترین جێگری سەرۆکی ئەمریکایە لە مێژووی ئەو وڵاتەدا.

بڵاوبوونەوەى شەپۆلی دەنگۆکان سەبارەت بە مردنى ترەمپ لەکاتێکدایە ماوەى چەند رۆژێکە ترەمپ دەرنەکەوتووە.

ئەم دەنگۆیانە لە کاتێکدابوون کە لە پەخشی ڕاستەوخۆی فەرمی کۆشکی سپیدا، پەیامێکی نائاسایی لەسەر شاشەکە بڵاوکرایەوە کە لەسەری نووسرابوو: "چاوەڕوان بن - بەم زووانە بە شێوەیەکی ڕاستەوخۆ دەگەڕێینەوە."

زۆرێک لە پۆستەکان تەندروستی ڕاستەقینەی ترەمپیان خستە ژێر پرسیارەوە. هەندێک لە بەکارهێنەران پەڵەکەی دەستییان بەستەوە بە پەڵەی هاوشێوە کە لەسەر دەستی شاژن ئەلیزابێسی دووەم پێش مردنی دەرکەوتووە. 

هەرچەندا ئەمساڵ، کۆشکی سپی راپۆرتی پزیشکی دۆناڵد ترەمپیان بڵاوکردەوە، بەپێی راپۆرتەکە هێچ مەترسییەک لەسەر ژیانی نییە، بەڵام هێشتا ژمارەیەکی زۆر لە هاوڵاتییانی ئەمەریکی گومانیان لە راپۆرتە پزیشکییەکە هەبوو.

ئیدارەی ئەمریکا بە دەنگۆی مردنی ترەمپ ڕەتدەکاتەوە و دووپاتیکردەوە کە تەندروستی باشە و کۆشکی سپی بەجێدەهێڵێت بۆ هاوینەهەواری خۆی لە ڤێرجینیا بۆ یاری گۆڵف.

دەنگۆکان و زنجیرەى سیمپسۆن

دەنگۆکان لەبارەى مردنى ترەمپ دواى ماوەیەکى کەم دێن لە دوایین قسەکانى مات گرۆنینگ، دەرهێنەرى زنجیرەى سیمپسۆن کە کۆتایی هاتنى زنجیرەکەى بەستەوە بە مردنى یەکێک لە کەسایەتییەکانەوە.

ئەمە یەکەمجار نییە کە دەنگۆ سەبارەت بە مردنی ترەمپ بڵاودەکرێنەوە. لە ساڵی 2023 هەژماری تویتەری دۆناڵد ترەمپ جونیۆر هاک کرا و هاککەرەکە پەیامێکی بڵاوکردەوە و تیایدا باس لەوە دەکات باوکی مردووە و خۆی بۆ پۆستی سەرۆکایەتی ئەمەریکا کاندید دەکات. 

بەپێی دەستووری ئەمەریکا، جێگری سەرۆک لە کاتی مردن، بێتوانایی، یان دەستلەکارکێشانەوەی سەرۆک دەستبەجێ دەبێتە سەرۆک. پاشان سەرۆکی نوێ جێگری سەرۆکی نوێ کاندید دەکات، کە دەبێت رەزامەندی زۆرینەی هەردوو ئەنجومەنی پیران و کۆنگرێس وەربگرێت، دواتر هەڵبژاردنی پێشوەختە ئەنجام دەدرێت بۆ هەڵبژاردنی سەرۆکی نوێ.