جەنگی دژ بە تیرۆر؛ ئۆپەراسیۆنی ئاسایشی هەمیشەیی گەلان بە دەستگیرکردنی 51 ئەندامی داعش کۆتاییهات

سبەی

دوای 14 کاتژمێر و بەشداریکردنی سێ هەزار ئەندامی هێزە جۆراوجۆرەکانی رۆژئاوای کوردستان، ئۆپەراسیۆنی "ئاسایشی هەمیشەیی گەلان" بە دەستگیرکردنی 51 ئەندامی شانەکانی داعش و دەستبەسەرداگرتنی چەندین جۆری چەک و تەقەمەنی لە شاری حەسەکەی رۆژائاوای کوردستان کۆتاییهات.  

هێزەکانی ئۆپەراسیۆنی "ئاسایشی هەمیشەیی گەلان"، لە راگەیەندراوێکدا کۆتایی هاتنی ئۆپەراسیۆنەکەی لە شاری حەسەکە راگەیاند. لە راگەیەندراوەکەدا هاتووە، لە چوارچێوەی جەنگی بەردەوامی دژی رێکخراوی تیرۆریستی داعش و بە پشتبەستن بە ئەرکە ئەخلاقی و نیشتمانییەکانیان بەرامبەر بە گەلی سوریا، هێزەکانی سوریای دیموکرات، هێزەکانی ئاسایشی ناوخۆی باکور و رۆژهەڵاتی سوریا، یەکینەکانی پاراستنی ژنان (یەپەژە)، ئۆپەراسیۆنی ئاسایشی هەمیشەیی گەلانیان لە چەند گەڕەکێکی شاری حەسەکە دەستپێکرد. 

ئەم ئۆپەراسیۆنە هاوکاتە لەگەڵ جموجۆڵە چڕەکانی رێکخراوەکە لە سەرانسەری سوریادا، کە دۆخی ئاژاوەگێڕی و بۆشایی ئەمنی لە زۆرێک لە ناوچەکانی بادیە و ناوخۆی سوریادا دەقۆزێتەوە. ئەمەش وا دەکات شانە تیرۆریستییەکان بە شێوەیەکی کاریگەر کۆنترۆڵی ئەو ناوچانە بکەن، بەتایبەتی لە باکور و رۆژهەڵاتی سوریا، کە زیندان و کەمپەکانی تێدایە.

بە وتەی هەسەدە، ئۆپەراسیۆنەکە پرۆسەیەکی پێشوەختەیە لە دژی هەوڵەکانی رێکخراوی تیرۆریستی داعش بۆ خۆڕێکخستنەوە و پێکهێنانی شانە تیرۆریستییەکان بۆ ئەنجامدانی هێرشی پلان بۆ داڕێژراو بۆ سەر ئەو زیندانانەی کە ئەندامان و سەرکردەکانی تێدا نیشتەجێیە، لە کاتێکیشدایە کە داعش دەیەوێت حەسەکە بکاتە ناوەندێک بۆ ئۆپەراسیۆنە تیرۆریستییەکانی، بەتایبەتی لە گەڕەکەکانی نزیک بەندیخانەی سناعە و گەرەکەکانی دەوروبەری شارەکە.

هەر بەپێی راگەیەندراوی هەسەدە، دوای نزیکەی 14 کاتژمێریش لە ئۆپەراسیۆنی بەرفراوان، کە زیاتر لە سێ هەزار ئەندامی هێزە جۆراوجۆرەکان تێدا بەشداربوون، سەرجەم ئامانجەکانیان پێکاوەو 51 تیرۆریستی داواکراویشیان دەستگیرکردووە، لەنێویاندا تیرۆریستانی بەشداربوو لە هێرشکردنە سەر هاوڵاتیانی مەدەنی و ناوەندە ئەمنی و خزمەتگوزارییەکان. هەروەها تۆڕە تیرۆریستییە مەترسیدارەکانیشیان هەڵوەشاندەوە، لەوانە ئەوانەی پلانیان بۆ هێرشکردنە سەر زیندانی سناعە و کەمپی هۆل دانابوو.

 هاوکات دەستیان بەسەر کۆگاکانی چەک و تەقەمەنی تیرۆریستییەکاندا گرتووە، لەوانە:

50  کڵاشینکۆف

 16 دەمانچە

  یەک  BKC

پێنج  نارنجۆکی دەستی

لە کۆتایی راگەیەندراوەکەدا هاتووە: کۆتایی هاتنی ئۆپەراسیۆنەکە، هەنگاوێکی گرنگە بۆ بەرزکردنەوەی ئاسایش و سەقامگیری ناوچەکە و چڕکردنەوەی ئۆپەراسیۆنەکانی بەرەنگاربوونەوەی تیرۆریش لە هەموو ئاستەکاندا دووپات دەکەینەوە.