ئەزموونی تیرۆرکردنی سەرکردەکانی حیزبوڵڵا لە یەمەن دوبارە دەبێتەوە؟

سبەی

گرووپی حوسییەکان لە گۆڕانکارییەکی بەرچاودا دانیان بە تیرۆرکردنی سەرۆک وەزیران و ژمارەیەک لە وەزیرەکانیان لە سەنعای پایتەختدا نا، ئەم دانپێدانانە سەرسوڕهێنەرە پرسیارێکی قووڵ دەوروژێنێت سەبارەت بە ڕادەی دزەکردنی هەواڵگری ئیسرائیل لە پێکهاتەی ئەمنی و سیاسی حوسییەکان و ئایا سەنعا چووەتە قۆناغێکی هاوشێوەی ئەوەی بەسەر حیزبوڵڵای لوبنان لە گەڕەکەکانی باشوری بەیروت هات کە تێیدا تیرۆرکردنی فەرماندە باڵاکانی حیزبوڵڵا بووە هەنگاوێکی سەرەکی بۆ شکستی ئەو گروپە چەکدارییە بەهێزە؟

گرووپی حوسییەکان بە فەرمی ڕایگەیاند: لە ئەنجامی هێرشەکانی ئیسرائیلدا ئەحمەد ئەلڕەحوی سەرۆک وەزیران و ژمارەیەک وەزیر تیرۆرکراون، ئەمە جگە لەوەی بەرپرسانی دیکەش برینداربوون، هاوکات حوسییەکان ئاماژەیان بە دەستنیشانکردنی محەمەد ئەحمەد میفتاح وەک سەرۆکوەزیرانی نوێ بۆ جێنشینی ئەلرەحوی کرد، هەنگاوێک کە ڕەنگدانەوەی ڕەوتێکی توندڕەوترە لەناو گروپەکەدا.

ئەم دانپێدانانە دوای ڕەتکردنەوەی سەرەتایی هەواڵەکە هات لەلایەن حوسییەکانەوە، کە ڕەنگدانەوەیەک بوو لە ئاڵۆزی و سەرلێشێواوی ناوخۆیی و هاوکات هەوڵێک بوو بۆ ئارامکردنەوەی ئەو شۆکە سەرەتاییەی تووشی لایەنگرانی حوسییەکان بوو.

سەرچاوەکان پشتڕاستیان کردووەتەوە کە ئیسرائیل کۆبوونەوەیەکی سەرکردە دیارەکانی حوسییەکانی کردووەتە ئامانج، هەروەها بڕیاری ئەنجامدانی ئەو هەڵمەتە بە خێرایی لە ئاستە سیاسییە باڵاکانی تەلئەڤیڤ دراوە دوای ئەوەی زانیاری ورد و پشتڕاستکراوە سەبارەت بە کات و شوێنی  کۆبوونەوەی سەرکردە باڵاکانی حوسییەکانیان بەدەستهێناوە.

سەنعا لەسەر هێڵی باشوری بەیروت .. قۆناغی کوشتن دەستی پێکردووە؟

چاودێران ئاماژە بەوە دەکەن، ئەوەی لە سنعا ڕوویدا، زۆر لە ئەزموونی ئیسرائیل دەچێت لەگەڵ حیزبوڵڵای لوبنان لە گەڕەکی زاحیە لە باشووری بەیروت ئەنجامیدا کە لە بە ئامانجگرتنی ژێرخانەکانەوە گواسترایەوە بۆ تیرۆرکردنی سەرکردە مەیدانی و سیاسییەکانی ئەو گروپە.

میدیا ئیسرائیلییەکان پشتڕاستیان کردووەتەوە کە لە هێرشە سەربازییەکان بۆ سەر حوسییەکان ئامانجە خوازراوەکانی حوسییەکان بەدەست نەهاتووە، ئەمەش وایکردووە ئیسرائیل دەستبکات بە کۆکردنەوەی لیستی تیرۆر کە تێیدا دیارترین سەرکردەکانی گروپەکە لەخۆدەگرێت، وەک عەبدولمەلیک ئەلحوسی سەرکردەی حوسییەکان، محەمەد عەبدولکەریم ئەلغمەری سەرۆکی ئەرکانی سوپای حوسییەکان، محەمەد ئەلعەتیفی، وەزیری بەرگری و یەحیا سەریع وتەبێژی سەربازی حوسییەکان.

حوسییەکان ڕێوشوێنی ئاسایشی دەگرنەبەر

دوابەدوای ئەو هەڵمەتە سەربازییانە چەندین سەرچاوەی حوسییەکان بە سکای نیوزی عەرەبیان راگەیاندوە کە ڕێنمایی توندی خۆپارێزیی و ئەمنیان دەرکردوە کە تێیدا هەڵسوکەوتە سیاسی و سەربازییەکانیان سنووردار کردوە. بۆ نموونە ڕێگری دەکەن لە هەر گردبوونەوەیەکی گەورە و ڕێگای هاتوچۆ و جموجۆڵەکانیان گۆڕیوە و بەکارهێنانی مۆبایل بۆ پەیوەندیکردنیان سنوردار کردوە. ئەم ڕێوشوێنانە ڕەنگدانەوەی دۆخێکی نیگەرانکەرە سەبارەت بە ئەگەری دزەپێکردنی ئیسرائیل لەناو سەرکردە باڵاکانی حوسییەکان.

هێرشێکی ئەلیکترۆنی هاوشێوەی ئۆپەراسیۆنی پەیجەر بەڕێوەیە؟

هانی مەسهور، ڕۆژنامەنووسی یەمەنی، لە لێدوانێکیدا بۆ سکای نیوز عەرەبی دەڵێت: ئەوەی ڕوویدا زیاترە لە هێرشێکی سەربازیی"، ئاماژەی بەوەکرد مانگی ئاب شایەتحاڵی هێرشە ئەلیکترۆنیەکان بووە کاریگەرییەکی زۆری لەسەر سیستمی پەیوەندییەکانی حوسییەکان هەبووە و لەوانەیە ئەم هێرشانە زەمینەی بۆ ئۆپەراسیۆنی سەربازی خۆش کردبێت، مەسهور دەشڵێت: ئەوەی ڕوویدا بە "ئۆپەراسیۆنی پەیجەر 2" بەراورد دەکرێت، هەر وەک ئەو جۆرەی لەو ئۆپەراسیۆنەدا ئەندامەکانی حیزبوڵڵای لوبنان کرانە ئامانج".

لە نێوان خۆبەزلزانین و دزەکردندا

مەسهور پێیوایە حوسییەکان لە دوای روبەڕوبوونەوەیان لەگەڵ ئەمەریکا لە چەند مانگی ڕابردوودا زیادەڕۆییان لە هەڵسەنگاندنی تواناکانیان کردوە و ئەمەش وایکردووە بچنە قۆناغێکی لووتبەرزی و متمانە بەخۆبوونی لە ڕادەبەدەرەوە، بەڵام مەسهور ئاماژەی بەوەداوە کە هێرشەکەی ئەم دواییەی ئیسرائیل لاوازییەکی ئەمنی بێوێنەی دەرخستوە، کە ڕەنگە هۆکارەکەی یان دزەیەکی ئەلیکترۆنی ئاڵۆز یان دزەکردنێک بێت لە ناو خودی گروپەکەوە، کە دەرگای گومان لەنێو سەرکردەکانیدا دەکاتەوە.

ئیسرائیل بەدوای بە ئامانجگرتنی دوا قۆڵی ئێرانە لە ناوچەکەدا

شیکارییەکی فراوانتر ئاماژە بەوەدەکات کە ئیسرائیل لە بۆشاییدا کارناکات،  ئێستا حوسییەکان چالاکترین قۆڵی ئێرانن لە ناوچەکەدا، بەتایبەت دوای لاوازبوونی گروپەکانی دیکەی سەر بە ئێران لە سوریا، عێراق و لوبنان.

ئەگەر ئیسرائیل بەردەوام بێت لە لێدانی سەرکردەکانی حوسییەکان، ئەوا بە شێوەیەکی کاریگەر ئێران ناچار دەکات لە پێگەیەکی لاوازتردا بگەڕێتەوە بۆ سەر مێزی دانوستانی ئەتۆمی، بەڵام ئەم سیناریۆیە ئەگەری مەترسیداریش لە دەریای سوور و باب ئەلمەندەب دەکاتەوە، کە تێیدا روبەڕوبوونەوەی ڕاستەوخۆی ئیسرائیل و حوسییەکان هەڕەشە لە کەشتیوانی نێودەوڵەتی و ئاسایشی ڕێڕەوێکی گرنگی گواستنەوەی جیهانی دەکات.

ئایا واشنتن گۆڕەپانەکە بۆ تەلئەڤیڤ بەجێدەهێڵێت ؟

مەسهور جەخت لەوە دەکاتەوە لەوەی کە ئەمەریکا ناتوانێت ڕێگە بە ئیسرائیل بدات کە روبەڕوبوونەوەیەکی تاکلایەنە لە یەمەن ئەنجام بدات، چونکە ئەمە دەتوانێت ناوچەکە بۆ شەڕێکی فراوانتر ڕابکێشێت، ئەو پێیوایە، واشنتۆن دەبێت ڕاستەوخۆ بەشداری ئاسایشی دەریای سوور بکات بە سەرکردایەتیکردنی هاوپەیمانییەکی نێودەوڵەتی هاوشێوەی ئەو هاوپەیمانییەی کە ڕوبەڕوی داعش بووەوە لە سوریا و عێراق، جەخت لەوە دەکاتەوە کە هەر ڕوبەڕوبوونەوەیەک لەگەڵ حوسییەکان تەنیا شەڕێکی ئەمنی نابێت، بەڵکو ڕەهەندی سیاسی و ئابووری و ستراتیژیی گەورەتری دەبێت.

ئێران و پڕۆژەی ئەتۆمی: خاڵی بێ گەڕانەوە؟

چاودێران ئەو پەرەسەندە سەربازییە لە دژی حوسییەکان بە ڕێڕەوی بەرنامە ئەتۆمییەکەی ئێرانەوە دەبەستنەوە کە تێیدا بە داڕمانی زیاتری بەرەی سەر بە ئێران لە ناوچەکە، تاران زیاتر بەدواداچوون دەکات بۆ بەکۆتایی گەیاندنی بەرنامە ئەتۆمییەکەی وەک دوا ڕێگەی دەربازبوونی وڵاتەکەی لە داڕمانی یەکجاری.

پێدەچێت هەر جۆرە لێدانێکی گەورە لەدژی حوسییەکان بتوانێت پێشەکییەک بێت بۆ قۆناغێکی نوێی ڕووبەڕووبوونەوەی پرۆژە ئەتۆمییەکەی ئێران کە تاران کە بە پرسێکی وجودی وڵاتەکەی پێناسەی دەکات.

هێرشی ئیسرائیل کە بووە هۆی کوژرانی سەرۆک وەزیرانی حوسییەکان و وەزیرە دیارەکانی، تەنیا ئۆپەراسیۆنێکی سەربازی نەبوو نوێنەرایەتی گۆڕانکارییەکی چۆنایەتی دەکرد لە ململانێیەکاندا کە تێیدا لاوازی پێکهاتەی ئەمنی گروپێکی ئاشکرا کرد کە لە مێژە خۆیان بەبەهێز دەزانن و دەرگای بە ڕووی قۆناغێکی تیرۆرکردندا کردەوە کە دەتوانێت ڕەهەندەکانی ململانێی یەمەن و ناوچەکە بگۆڕێت.