ئۆجەلان: ئاشتیی ڕاستەقینە تەنها بە بێدەنگبوونی چەکەکان و کۆتاییهێنان بە پێکدادانەکان بەدی نایەت

سبەی

عەبدوڵڵا ئۆجەلان لە نوێترین پەیامیدا سەرنج دەخاتە سەر ئەوەی ئاشتی تەنها شتێک نییە ئاواتی بۆ بخوازرێت، بەڵکوو ڕاستینەیەکی کردارییە کە بۆ بونیادنانی پێویستی بە ڕەخساندنی دەرفەتێکی بەهێز و هەنگاونانی جیدی کردەیی هەیە.

عەبدوڵڵا ئۆجەلان بە بۆنەی یەکی ئەیلوول ڕۆژی جیهانیی ئاشتییەوە پەیامێکی بڵاوکردووەتەوە و جەخت لەوە دەکاتەوە ئاشتیی ڕاستەقینە بە هێنانەدی ئازادی، دیموکراسی و دادپەروەری کۆمەڵایەتی لە تەواوی بوارەکانی ژیان بەدی دێت و ئەمە ئەرکی سەرەکی قۆناغی نوێی ئەم وەرچەرخانە کۆمەڵایەتییە دەبێت.

پەیامەکەی ئۆجەلان ئەمڕۆ (31ـی ئابی 2025) لە میانی "کەرنەڤاڵی ئاشتی" لە ئیستانبوڵ خوێندرایەوە و لەلایەن ئامادەبووانیشەوە بە چەپڵەڕێزان پێشوازی لێ کرا.

ئۆجەلان لە پەیامەکەیدا ئاماژەی بەوەداوە کە داواکاری ئەوان بۆ چارەسەرکردنی کێشەکان بە ڕێگاچارەی ئاشتییانە و دیموکراسییانە، هەڵمەتێکی ئاسایی سیاسی نییە، بەڵکوو هەنگاوێکی ستراتیجی و خاڵێکی وەرچەرخانی مێژوویییە.

ئۆجەلان سەرنج دەخاتە سەر ئەوەی بەم داواکارییە تا هەتایە دەرگا بە ڕووی قۆناغێکی نوێ دەکرێتەوە کە دیموکراسییەتی پشتبەستوو بە ئاشتییە و لە تورکیا و خۆرهەڵاتی ناوەڕاست جێی شەڕوشۆڕ و کاولکاری دەگرێتەوە.

 ئۆجەلان سەرنج دەخاتە سەر ئەوەی کە ئەمە تەنها ئاواتێک نییە بەڵکوو ڕاستینەیەکی کردارییە کە بۆ بونیادنانی پێویستی بە ڕەخساندنی دەرفەتێکی بەهێز و هەنگاونانی جیدی کردەیی هەیە و دەڵێت: "ئاشتی ڕاستەقینە تەنها بێدەنگبوونی چەکەکان و کۆتاییهێنان بە پێکدادانەکان بەدی نایەت. بەڵکوو ئاشتیی ڕاستەقینە بە هێنانەدی ئازادی، دیموکراسی و دادپەروەری کۆمەڵایەتی لە تەواوی بوارەکانی ژیان بەدی دێت و ئەمە ئەرکی سەرەکی قۆناغی نوێی ئەم وەرچەرخانە کۆمەڵایەتییە دەبێت".

ئۆجەلان سەرنج دەخاتە سەر ئەوەی کە بە خەباتی گەلان بە دڵنیاییەوە بەهاکانی ئازادی، دیموکراسی و ئاشتی ڕەگ دادەکوتن و دەڵێت: "لە ژیانی کۆمەڵایەتیدا ڕەنگ دەداتەوە و ئیدی ئەم وڵاتە دەبێتە نیشتمانی ئەوانەی ئاشتی و دیموکراسی هەم وەک ماف و هەم وەک ئەرک دەبینن".

 ئۆجەلان داواش لە گەلانی تورکیا دەکات بە بۆنەی ڕۆژی جیهانیی ئاشتییەوە داکۆکی لەو ئەرکە مێژووییە بکەن و بەگوڕتر و بەرفراوانتر بەشداری لە ڕێپێوانەکانی ئاشتی و ئازایدا بکەن.

عەبدوڵڵا ئۆجەلان سەرنج دەخاتە سەر ئەوەی کە پێویستە هەموو کەسێک بەخۆیدا بچێتەوە و لە جیدیەتی ئەم قۆناغە تێ بگات و بە ڕۆحیەتێک کە خزمەتی ئاشتی دەکات هەڵسوکەوت بکات و سڵاو لە هەموو لایەکیش دەکات و خۆشەویستی بێپایانی خۆیان بۆ دەردەبڕێت. 

لە کەرنەڤاڵەکەی ئەمڕۆ پۆستەری وێنەی ئۆجەلان کرایەوە