توێژینەوەیەکی نوێ؛ زیرەکیی دەستکرد دەبێتە ئامڕازێکی بەکارهێنانی رۆژانە

سبەی

کۆمپانیای Slack  ئەنجامی توێژینەوەیەکی لەسەر زیرەکیی دەستکرد ئاشکراکردووە، دەرکەوتووە کە (AI) دەبێتە ئامڕازێکی بەکارهێنانی رۆژانە و زۆرترین بەکارهێنانەکانیش لەلایەن گەنجانی نێوان 28 بۆ 43 ساڵە.

بە پێی توێژینەوەکە لە هەر سێ کارمەندێکی ئەم گروپە، یەک کارمەند رۆژانە ئامرازەکانی زیرەکیی دەستکرد بەکاردەهێنێت، لەکاتێکدا نزیکەی چارەکێکیان هەفتەی چەند جارێک ئامرازەکانی AI بەکاردەهێنن.

ئەم ژمارانە تەنها رەنگدانەوەی جۆش و خرۆشێک نین بۆ تەکنەلۆجیایەکی نوێ، بەڵکو پشتڕاستیدەکەنەوە کە گەنجەکان هێزی بزوێنەری گۆڕانکارییەکی قووڵی کولتوورین، لە شێوازی بەکارهێنانی تەکنەلۆجیای کۆمپانیاکان، بەتایبەتی کاتێک باس لە زیادکردنی بەرهەمهێنان و ئۆتۆماتیککردنی ئەرکەکان و فراوانکردنی بازنەی بەرپرسیارێتییەکانی کارمەندان دەکرێت.

پێشکەوتنی AI بەردەوامە

سەرەڕای پێشکەوتنی رواڵەتی نەوەی دوو هەزارەکان، نەوەی پێشووتر زۆر لە دواوە نییە، بەڵام جیاوازی سەرەکی ئەوەیە، کە نەوەی پێشووتر زیاتر مەیلی بۆ بەکارهێنانی ئەم ئامرازانە بۆ مەبەستی پەروەردەیی یان کەسی هەیە، لە کاتێکدا دوو هەزارەییەکان راستەوخۆ لە کارەکانی رۆژانەیاندا سوودی لێ وەردەگرن.

لوکاس پۆنتی توێژەر لە کۆمپانیای Slack روونی دەکاتەوە، کە هێشتا نەگەیشتووین بە قۆناغی بەکارهێنانی بەردەوامی AI لە شوێنی کاردا. 

سەرچاوەی راهێنانی نافەرمی

توێژینەوەکە رەهەندێکی دیکە ئاشکرا دەکات، کە رەنگە دوو هەزارییەکان نوێنەرایەتی گرنگترین سەرچاوەی راهێنانی ناوخۆیی بۆ کۆمپانیاکان بکەن لە ماوەی داهاتوودا. بە ئەزموونی بەرفراوانیان لە ژینگەکانی کارکردن و گەشەسەندنی ئاشنابوونیان بە تواناکانی AI.

جێنی سیمێنس، بەرێوەبەری دامەزراوەی سەیلزفۆرس روونی دەکاتەوە: دەبێت کارمەندانی نوێ بزانن کەی متمانەیان بە AI هەبێت و کەی پرسیاری لێبکەن، ئەمەش پێویستی بە ئەزموونی قووڵی پراکتیکی هەیە لەم بوارەدا.

هاوسەنگکردنی متمانە و چاودێری

یەکێک لە گرنگترین ئاڵنگارییەکانی ئەمڕۆ کە رووبەڕووی کۆمپانیاکان دەبێتەوە، دانانی سنورێکی روونە لە دەوری بەکارهێنانی AI. لە کاتێکدا ئەم ئامرازانە توانایەکی گەورە پێشکەش دەکەن، هێنانە ناوەوەی داتا هەستیارەکان بەبێ کۆنتڕۆڵکردن بۆ ناو سیستمەکان، دەتوانێت دەرگا بەڕووی مەترسییە بەرچاوەکاندا بکاتەوە. لێرەدایە کە کارمەندانی بە ئەزموونتر دێنە ناوەوە، تێدەگەن کە چ داتایەک دەبێت هاوبەش بکرێت و چ داتایەک دەبێت پارێزراو بێت. 

AI رێگایەکی نوێ بۆ گەشەکردن

زۆرێک لە شارەزایان دووپاتی دەکەنەوە، کە ئەم تەکنەلۆجیایە رێگەی نوێ بۆ گەشەکردن و فێربوون دەکاتەوە. جێما کوین، کارمەندی باڵا لە کۆمپانیای Salesforce  روونی دەکاتەوە، AI کارە ئاست نزمەکان لەناو نابات، بەڵکو بەرزیان دەکاتەوە. بەهۆی ئەم ئامرازانەوە، کارمەندان دەتوانن ئەرکی زۆر زیاتر لە چەند ساڵێک لەمەوبەر ئەنجام بدەن، ئەمەش چانسی پێشکەوتنی پیشەکەیان زۆر بە خێرایی زیاددەکات.