ئۆپەراسیۆنێکی هاوبەش لە حەسەکە دژی داعـ.ـش دەستیپێکرد

سبەی

لە بەرەبەیانی ئەمڕۆوە ئۆپەراسیۆنێکی هاوبەشی ئاسایش و هەسەدە دژی داواکراون و تۆمەتبارانی سەر بە داعش لە شاری حەسەکە دەستیپێکردووە.

ئاژانسی هەواڵی نۆرس پرێس بڵاوی کردەوە، هێزەکانی ئاسایشی رۆژئاوای کوردستان و شەڕڤانانی هەسەدە بەرەبەیانی ئەمڕۆ شەممە (30ـی ئابی 2025) ئۆپەراسیۆنێکی بەرفراوانیان لە شاری حەسەکە دەستپێکردووە، بۆ گەڕان بە شوێن داواکراون و تۆمەتباران و ئەو کەسانەی سەر بە شانەکانی داعشن.

هیزەکانی ئاسایش دەروازەکانی شاری حەسەکەیان داخستووە و رێگا بە چوونە دەرەوە و هاتنە ناوەوەی هیچ ئۆتۆمبێلێک نادەن و هێزێکی زۆر لە ناو شارەکە بڵاوکراونەتەوە.

تائێستا ئاسایشی رۆژئاوای کوردستان و هێزەکانی سوریای دیموکرات هیچ راگەیەندراوێکی فەرمییان لەسەر پرۆسەکە و ئامانجەکەی بڵاونەکردوەتەوە.

شایەتحاڵان و دانیشتوانی حەسەکە رایانگەیاندووە: شەوی رابردوو دەیان ئۆتۆمبێلی سەربازیی و هێزی پشتیوانی لەسەر رێگای نێودەوڵەتی بینراون کە بەرەو حەسەکە بە رێگاوە بوون.