کوژرانی ئەبو عوبەیدە پشتڕاستکرایەوە؛ ئەو پیاوەی 15 ساڵە ئیسرائیل بەدوایدا دەگەڕێت و سێجار هەوڵی كوشتنی داوە

سبەی

چارەنووسی ئەبو عوبەیدەی وتەبێژی كەتیبەكانی قەسام بەفەرمی یەكلایی کرایەوە و ئیسرائیل کوژرانی راگەیاند، بە پێی خەمڵاندنەكانی سوپای ئیسرائیل لە هێرشێكی بۆ سەر باڵەخانەیەك لە غەززە كوژراوە، هاوكات سەرچاوەیەكی فەڵەستینی كوژرانی لە هێرشەكەدا دوپاتكردۆتەوە.

كاتێك جەنگ دەستیپێكرد، وتەبێژی كەتیبەكانی قەسام (باڵی سەربازی حەماس)، خۆی ون كرد، ئاستێكی گۆشەگیریی بەرزتر لە گۆشەگیرییەكەی سنوار، بەڵام دواتر ئەبو عوبەیدە لە گۆشەگیریەكەی هاتەدەرەوە و بەرگەكەی ئاشكرا بوو.

ئیسرائیل کوژرانی پشتڕاستکردەوە

زۆر پێش جەنگ و هێرشەكەی 7ی ئۆكتۆبەری 2023، ئەفسەرانی فەرماندەیی باشوور پێداگرییان لەسەر ئەوە دەكرد، كە ئەبو عوبەیدە، ئامانجێكی سەرەكییە بۆ چاودێری و تیرۆركردن.

كاتێك جەنگی غەززە دەستیپێكرد، ئەبو عوبەیدە وەك ئەوەی هەرگیز بوونی نەبووبێت، ون بوو، ئاستێكی زۆر گۆشەگیریی تەنانەت بەرزتر لە یەحیا سینوار، محەمەد زەیف، محەمەد سینوار و مەروان عیسای پەیڕەوكرد.

سەرچاوە ئەمنییەكانی ئیسرائیل، هەڵسەنگاندنیان بۆ ئەوە كردووە، كە لە كاتی جەنگی غەززەدا لە شوێنێكدا دەرفەتێكی نزیك هەبووە بۆ لەناوبردنی، بەڵام تێكەڵەیەك لە ترس لە زیانگەیاندن بە كەسانی بێ لایەن و مەدەنی، لە كۆتاییدا یارمەتی دەربازبوونی داوە.

ناوبانگی ئەبو عوبەیدە

ماڵپەڕی والای ئیسرائیلی دەڵێت بەدرێژایی ساڵان ئەبو عوبەیدە بووەتە هێمایەكی ڕاستەقینە لە جیهانی عەرەبیدا، هێمایەك كە قسەكانی لە سەرانسەری جیهانی عەرەبیدا دەنگ دەداتەوە، هەروەها بووەتە كەسایەتییەكی ناودار لە توركیا.

لە قۆناغی یەكەمدا هەواڵگری ئیسرائیل ناوی راستەقینەی ئاشكراكرد، كە حوزەیفە كەحلوتە، بۆ ئەوەی فشارەكانی لەسەر زیاد بكات، بەو هیوایەی هەڵەیە بكات و لەكاتێكی گونجاودا تیرۆری بكات.

سەرچاوەیەكی ئەمنی روونی كردەوە، ئەو تێگەیشتنێكی قوڵی هەیە لە جەنگی دەروونی و توخمێكی سەرەكییە لە جەنگی ئایدیۆلۆژیی حەماس لەدژی ئیسرائیل. 

ئاشكرابوونی ئەبو عوبەیدە

بەپێی سەرچاوە هەواڵگرییەكان، ئەبو عوبەیدە چیتر لە گۆشەگیریدا نییە و خۆی ئاشكراكردووە.

گرنگترین پرسیار: ئایا هەر لەوێ بووە، كاتێك بۆمبەكە لەناو بیناكەدا تەقییەوە؟

سەرچاوەیەكی ئەمنی رایگەیاند، شتێك روون و ئاشكرایە، لە كۆتاییدا هەموو كەسێك هەڵە دەكات و ئەنجامدانی ئەو هەڵەیەش تەنها پەیوەستە بە كاتەوە.

هەرچەندە پێشتر دامەزراوە ئەمنییەكانی ئیسرائیل چاوەڕوانی پشتڕاستكردنەوەی ئەنجامی هێرشەكە بوون، بەڵام ئەمرۆ یسرائیل کاتز وەزیری بەرگریی ئیسرائیل کوژرانی پشتراستکردەوە، ئەوەش دوای ٢٤ کاتژمێر لە بە ئامانجگرتنی. هەوڵی تیرۆركردنەكەش دوای ئەوە بوو کە دەزگای شین بێت (دەزگای ئاسایشی ئیسرائیل) زانیاریی هەواڵگری وردی پێشكەش كرد. 

سێ هەوڵی تیرۆركردن لە ماوەی15 ساڵدا

ئەبو عوبەیدە لە ساڵی 2004 بووە وتەبێژی باڵی سەربازی بزووتنەوەی حەماس.

ئەو پێگەی خۆی وەك وتەبێژی فەرمی سەربازی رێكخراوەكە بەدەستهێنا، كاتێك لە پەیامێكی تۆماركراودا، رفاندنی جەلعاد شالیتی راگەیاند.

لەو كاتەوە ئەبو عوبەیدە بووە بە رووخساری پەیامە گرنگەكانی باڵی سەربازی حەماس و ئەو جەنگە دەروونییەی رێكخراوەكە هەوڵی بەرەوپێشبردنی داوە.

لە چوارچێوەی ئۆپەراسیۆنەكەدا هێرشێكی گەورە كرایە سەر باڵەخانەیەك كە وتەبێژی باڵی سەربازی حەماس تێیدا نیشتەجێ بوو، كە زیاتر لە 15 ساڵ دەزگای ئاسایشی گشتیی ئیسرائیل بەدوایدا دەگەڕا.

روسیا تودەی لە زاری سەرچاوە ئەمنییەكانەوە لە رادیۆی سوپای ئیسرائیل رایگەیاندووە، لە سەرەتای جەنگەوە ئەمە سێیەمجارە ئیسرائیل هەوڵی تیرۆركردنی بدات. هەوڵەكانی پێشوو شكستیان هێنا، بەڵام ئەمجارەیان ئۆپەراسیۆنەكە سەركەوتوو بوو.