کێشە لە ئۆتۆمبێلە کارەباییەکەی براندە بەناوبانگەکەی چیندا دەرکەوت: زیاتر لە 100 هەزار ئۆتۆمبیل لە بازاڕ دەکێشێتەوە!

سبەی

کۆمپانیای تەکنەلۆژیی چینی، شیاومی دوای ڕووداوێکی هاتوچۆی کوشندە، بڕیاری دا 116,887 ئۆتۆمبیل لە مۆدێلی SU7 لە بازاڕ بکێشێتەوە. ئەم ژمارەیە یەکسانە بە یەک لەسەر سێی هەموو ئەو ئۆتۆمبیلانەی کە فرۆشراون.

کۆمپانیا زەبەلاحەکەی چین، شیاومی، کە بە خێراییەکی زۆرەوە هاتە نێو کەرتی ئۆتۆمبیلەوە، ڕایگەیاند کە پڕۆگرامێکی گەورەی کێشانەوەی بۆ ئۆتۆمبیلە کارەباییە بەناوبانگەکەی، SU7، دەستپێکردووە.

پڕۆگرامەکە 116,887 ئۆتۆمبیل دەگرێتەوە، کە دەکاتە یەک لەسەر سێی هەموو ئەو ئۆتۆمبیلانەی SU7 کە تا ئێستا ڕادەستی کڕیاران کراون.

سەرچاوەی کێشەکە: سیستەمی یارمەتیدەری شۆفێر

شیاومی، هۆکاری بڕیارەکەی بۆ ئەوە گەڕاندووەتەوە کە کێشە لە "سیستەمی پێشکەوتووی یارمەتیدەری شۆفێر" ADAS ی ئەو جۆرە ئۆتۆمبێلەدا هەیە.

بەپێی لێکۆڵینەوەکان، ئەم تەکنەلۆژیایانە لە هەندێک حاڵەتدا وەک پێویست کار ناکەن و مەترسیی ڕووداوی هاتوچۆ زیاد دەکەن.

هەروەها ئاماژە بەوەش کراوە کە ئەم پڕۆگرامی کێشانەوەیە دوای ڕووداوێکی هاتوچۆ دەستیپێکردووە کە بووەتە هۆی گیانلەدەستدان.

چارەسەرەکە: نوێکردنەوە لە ڕێگەی ئینتەرنێتەوە

بۆ چارەسەرکردنی کێشەکە، پێویست ناکات ئۆتۆمبیلەکان ببرێنە سەنتەری خزمەتگوزاری. شیاومی، 

لە ڕێگەی ئینتەرنێتەوە (OTA) نەرمەئامێرەکە (software update) ئەبدێت دەکاتەوە و بەمەیش "سیستەمی پێشکەوتووی یارمەتیدەری شۆفێر" باشتر کار دەکات.

هەرچەندە کێشانەوەکە تەنها بۆ Xiaomi SU7ـە، بەڵام کۆمپانیاکە هاوکات نوێترین نەرمەئامێری ADAS کە HyperOS 1.10.0  لەخۆدەگرێت، بۆ مۆدێلی YU7 SUVیش دەنێرێت بۆ ئەوەی پێشوەختە ڕێگە لە ڕوودانی هەر کێشەیەکی نەخوازراو بکاتەوە.

ڕووداوە کوشندەکەی شەقامی ووهان

لە 12ی ئەیلوولی 2025 واتە ڕێک 11 ڕۆژ لەمەوبەر، لەسەر یەکێک لە شەقامە خێراکانی شاری ووهانی چین، ئۆتۆمبێلێکی Xiaomi SU7 کە لەسەر سیستەمی لێخوڕینی ئۆتۆماتیکی (ADAS) بوو، نەیتوانی بە شێوەیەکی دروست کاردانەوەی هەبێت بەرامبەر بە وەستانی لەناکاو و پێکدادانێکی زنجیرەیی لەپێشییەوە. 

لە ئەنجامدا، ئۆتۆمبێلەکە بە خێراییەکی زۆرەوە خۆی کێشا بە چەند ئۆتۆمبێلێکی وەستاودا، کە بووە هۆی گیانلەدەستدانی دوو کەس و برینداربوونی پێنج کەسی دیکە. 

گرتە ڤیدیۆییەکانی ڕووداوەکە بە خێرایی لە تۆڕە کۆمەڵایەتییەکاندا بڵاوبوونەوە و پرسیاری جددییان لەسەر سەلامەتیی سیستەمە زیرەکەکەی شیاومی دروست کرد.

لێکۆڵینەوەکان و دانپێدانانی شیاومی

دەستبەجێ، دەسەڵاتدارانی چین دەستیان بە لێکۆڵینەوەیەکی ورد کرد. ئەنجامە سەرەتاییەکان دەریانخست کە لە هەندێک حاڵەتی تایبەتدا (وەک تێکەڵبوونی تیشکی خۆری بەهێز و سێبەری لەناکاو)، سیستەمی  ADASی ئۆتۆمبێلەکە تووشی "سەرلێشێواوی" دەبێت و ناتوانێت بە خێرایی پێویست بڕیار بدات. 

دوای فشارێکی زۆری میدیایی و حکومی، کۆمپانیای شیاومی ناچار بوو دان بەم "کەلێنەی نەرمەئامێرییە"دا بنێت و وەک هەنگاوێکی پێشوەختە و بۆ پاراستنی ناوبانگی خۆی، بڕیاری کێشانەوەی ئەو ئۆتۆمبێلانەی دا.

شیاومی: لە بەرهەمهێنانی مۆبایلەوە بۆ شۆڕش لە جیهانی ئۆتۆمبێلی کارەباییدا

کۆمپانیای شیاومی (Xiaomi)، کە زیاتر بە مۆبایلە زیرەکەکانی ناسراوە، یەکێکە لە گەورەترین کۆمپانیاکانی تەکنەلۆژیای چین و جیهان. 

ئەم کۆمپانیایە لە ساڵی 2021دا بە فەرمی هاتنە ناوەوەی خۆی بۆ جیهانی ئۆتۆمبێلی کارەبایی ڕاگەیاند و بەڵێنی دابوو کە ئۆتۆمبێلێکی "شۆڕشگێڕانە" بە تەکنەلۆژیای بەرز و نرخی کێبڕکێکارانە بخاتە بازاڕەوە. 

لە کۆتاییی ساڵی 2023دا، یەکەم بەرهەمی خۆی بە ناوی Xiaomi SU7، نمایش کرد کە بە دیزاینە سەرنجڕاکێشەکەی و تایبەتمەندییە تەکنەلۆژییە پێشکەوتووەکانییەوە، دەنگدانەوەیەکی گەورەی لە جیهان لێ کەوتەوە. 

تا ناوەڕاستی 2025، شیاومی توانیویەتی زیاتر لە 350 هەزار ئۆتۆمبێلی SU7 بفرۆشێت و داهاتی کەرتی ئۆتۆمبێلەکەی چاوەڕوان دەکرێت لە کۆتاییی ئەمساڵدا بگاتە نزیکەی 10 ملیار دۆلار. 

شیاومی بەمەش بووەتە یەکێک لە 10 گەورەترین بەرهەمهێنەرانی ئۆتۆمبێلی کارەبایی لە جیهاندا و پلانی هەیە لە ساڵی داهاتوودا دووەم مۆدێلی خۆی بە ناوی YU7 SUV، بخاتە بازاڕەوە.