یەکێتیی ئەوروپا لە ڕێگای پێدانی ڤاکسینەوە هەوڵ دەدات بەرەنگاری شێرپەنجە ببێتەوە

سبەی

کۆنسەی ئەوروپا لە ماڵپەڕی فەرمیی خۆی ڕایگەیاندووە پێشوازی دەکات لەوەی وڵاتانی ئەندام لە یەکێتیی ئەوروپا ئەمڕۆ ڕەزامەندییان دەربڕیووە لەسەر گرتنەبەری ژمارەیەک ڕێوشوێن بۆ ئەوەی لە ڕێگای وەرگرتنی ڤاکسینەوە بەرەنگاری شێرپەنجە ببنەوە لە ئەوروپا. 

کۆنسەی ئەوروپا کانونی دووەمی ئەمساڵ پێشنیازی کردبوو بە مەبەستی ڕێگەگرتن لە بڵاوبوونەوەی ڤایرۆسەکانی وەک HPV و HBV کە دەبنە هۆی توشبوون بە چەند جۆرێکی شێرپەنجە، هەڵمەتەکانی وەرگرتنی ڤاکسین زیاتر بکرێن.

بەم جۆرەیش وڵاتانی ئەندام لە ڕێگای زیادکردنی هەڵمەتەکانی وەرگرتنی ئەم جۆرە ڤاکسینانەوە، ڕێگە لەو ڤایرۆسانە دەگرن کە دەبنە هۆی شێرپەنجە. 

ئەمەیش ژیانی هاوڵاتییان ڕزگار دەکات و بارگرانیی زۆریش ناخاتە سەر سیستەمی تەندروستیی وڵاتانی ئەندام.

لە میانی هەڵمەتەکەدا چاودێری ئەوە دەکرێت، کە ڕێژەی وەرگرتنی ڤاکسین چەند زیاد دەکات و کەموکوڕییەکانی دابینکردنی ڤاکسینیش چارەسەر دەکرێن. 

لە میانی بەرنامەی بەرەنگاربوونەوەی شێرپەنجە لە ئەوروپا پلان بۆ ئەوە دانراوە وڵاتانی ئەندام ڕێژەی وەرگرتنی ڤاکسینی HPV بۆ کچان تاکوو 2030 بگەیەننە لە سەدا 90 و بۆ کوڕانیش ڕێژەکە زۆر بەرز بکەنەوە. 

ئەم ڤایرۆسە دەبێتە هۆی توشبوون بە چەند جۆرێکی شێرپەنجە بە شێرپەنجەی ملی منداڵانیشەوە لە ڕەگەزی مێینەدا.

کۆمیسیۆنی ئەوروپا لە میانی بەرنامەی کاری EU4Health 2024دا هاوکاری وڵاتانی ئەندام دەکات بۆ جێبەجێکردنی پێشنیازەکانی و پێدانی ڤاکسین بێ بەرامبەر و دابینکردنی 20 ملیۆن یۆرۆ بۆ پلانی کاری هاوبەش.