چارەنوسی ملیۆنان سەگی بەڕەڵا لە تورکیا و باکوری کوردستان لە پەرلەمان بڕیاری لەسەر دەدرێت

سبەی

حکومەتی تورکیا مەزەندە دەکات نزیکەی چوار ملیۆن سەگی بەرەڵا لە تورکیا و باکوری کوردستان هەبن و لە ئەگەری پەسەندکردنی پڕۆژەیاساکەیشدا ڕێگە بەوە دەدرێت ئاژەڵە نەخۆشەکان و ئەوانەی هەڵسوکەوتی پەلاماردەرانە دەکەن بەبێ ئازاردان لەناو ببردرێن.

لای خۆیەوە لایەنە ئۆپۆزسیۆنەکانی تورکیا و بە تایبەت جەهەپە ڕایگەیاندووە ئەگەر پڕۆژەیاساکە لە پەرلەمانیش تێ بپەڕێت ئەوا لە دژی دەوەستنەوە چۆک دانادەن بەرامبەری و شارەوانییەکانی ئەوان پڕۆژەیاساکە جێبەجێ ناکەن.

بەپێی یاسا کارپێکراوەکان پاراستنی ژیانی گیانلەبەران لە ئەستۆی شارەوانییەکاندایە و لە پڕۆژەیاساکەدا ئاماژە بەوە دراوە هەر بەرپرسێکی شارەوانی پڕۆژەیاساکە جێبەجێ نەکات بە دوو ساڵ زیندانیکردن سزا دەدرێت.

ئەوا لە کاتێکدایە لە دوایەمین هەڵبژاردنی شارەوانییەکان، جەهەپە توانی بە بەدەستهێنانی لە سەدا 37.77ی دەنگەکان پلەی یەکەم بەدەست بهێنێت لە سەر ئاستی تورکیا و بە پێش ئاک پارتیی دەسەڵاتدار بکەوێتەوە کە لە سەدا 35.49ی دەنگەکانی بەدەست هێنا.

بەم جۆرەیش جەهەپە توانی شارەوانیی 14 گەورەشار، 21 پارێزگا، 337 قەزا و 61 ناحیە بەدەست بهێنێت و شارەوانییەکانی ئیستانبوڵ، ئەنقەرە، ئیزمیر، بورسا و ئادانا کە بە دوای یەکدا لە ڕیزی یەکەم تاکوو پێنجەم گەورەترین شارەکانی تورکیادان لە بەردەستی جەهەپەن.

لە پڕۆژەیاساکەدا سزای بەرەڵڵاکردنی سەگ لەلایەن خاوەنەکانیانەوە، 30 هێندە زیاتر کراوە و گەیەندراوەتە 60 هەزار لیرەی تورکی (هەزار و 800 دۆلار).

سەرکۆماری تورکیا، ڕەجەب تەیب ئەردۆغان هەفتەی ڕابردوو لەبارەی سەگە بەرەڵاکانەوە ڕایگەیاند: "تورکیا دوچاری کێشەیەک بووەتەوە کە هیچ وڵاتێکی مەدەنی توشی نەبۆتەوە و دۆخەکە بەرەو خراپتر دەڕوات".

زیادبوونی حاڵەتەکانی توشبوونی نەخۆشیی هاری بە هۆی قەپاڵگرتنی سەگی بەرەڵڵاوە حکومەتی زۆر نیگەران کردووە، هاوکات ئاماژە بەوە دەدات کە ئەوان لەگەڵ لەناوبردنی بە کۆمەڵی سەگەکاندا نین و ئۆپۆزسیۆن و گروپەکانی داکۆکیکردن لە مافەکانی ئاژەڵان پرۆژەیاساکە بە "کۆمەڵکوژی" ناو دەبەن.

گروپەکانی داکۆکیکردن لە مافەکانی ئاژەڵان داوا دەکەن هەڵمەتی بەرفراوان دەست پێ بکات بۆ ڕێگەگرتن لە تێپەڕاندن و کارکردن بە پڕۆژەیاساکە. 

لەو ماوەیەی دواییدا لە دەرەوە و لە ناو پەرلەمانیش دەنگی ناڕەزایەتی زۆر بەرز بۆتەوە لە دژی پڕۆژەیاساکە.