توڕەترین وڵاتەکانی جیهان کوێن و بۆچی هێندە توڕەن؟

سبەی

بەپێی نوێترین ڕاپۆرت، توڕەترین وڵاتانی جیهان دەکەونە خۆرهەڵاتی ناوەڕاست و لوبنان و تورکیا لە ڕیزی یەکەم و دووەمدا دێن و عێراقیش لە ڕیزی چوارەمدا جێ دەگرێت.

ناوەندی Gallup کە کۆمپانیایەکی شیکاری و ڕاوێژکاری ئەمەریکییە سالانە ڕاپۆرتێک لەبارەی ڕێژەی توڕەیی لە وڵاتان بە ناوی 'Global Emotions Report'  بڵاو دەکاتەوە.

کۆمپانیایەکە بۆ ڕاپۆرتەکە ئەزموونی ژیانی ڕۆژانە لە خەڵک دەپرسێت و دواتر هەستە خۆش و ناخۆشەکانیان بەسەر دوو کاتەگۆریدا پۆلین دەکات و لێیان دەپرسێت کە ڕۆژێک پێشتر تا چەند هەستیان بە ئازاری جەستەیی، خەمباری، سترێس و توڕەیی کردووە.

ڕاپۆرتەکە لە 100 وڵات ئەنجام دراوە و دەرکەوتووە لوبنان کە لەم چەند مانگەی دواییدا دوچاری هێرشەکانی ئیسرائیل بووەتەوە و چەندین ساڵە بە دەست قەیرانی دارایییەوە دەناڵێنێت لە ریزی یەکەمدا جێ دەگرێت.

تورکیایش لە ڕیزی دووەمی وڵاتانی جیهان و لە ڕیزی یەکەمی وڵاتانی ئەوروپا جێ دەگرێت و ئاماژە بەوە دراوە هەڵاوسانی ئابوری، بوونی تورکیا بە وڵاتێکی پۆلیسی و دیکتاتۆری ڕۆڵی هەبووە لەوەی خەڵک زوو زوو توڕە ببن.

دوا بە دوای تورکیا ئەرمینیا لە ڕیزی سێیەم و عێراقیش لە ڕیزی چوارەمدا دێت.

ئەفغانستان، ئوردن، مالی و سریلانکا لە ڕیزبەندی پێنجەم تا هەشتەمی لیستەکەدا جێ دەگرن.

لە کاتەگۆری هەستە ئەرێنییەکانیشدا، ئاماژە بەوە دراوە دڵخۆشترین و ئەرێنیترین وڵات سلڤادۆرە.