نەتەنیاهۆ لە سنوری سوریاوە: ڕووخانی ئەسەد گورزێك بوو لەبەرەی ئێران

سبەی

بنیامین نەتەنیاهۆ سەرۆك وەزیرانی ئیسرائیل لە ناوچەیەكی نزیك لە سنوری سوریاوە یەكەم پەیامی دوای ڕوخانی ڕژێمەكەی ئەسەد ڕاگەیاند، نەتەنیاهۆ وتی "ڕوخانی ڕژێمی ئەسەد بەهۆی گورزەكانی ئیسرائیل بۆسەر حزبوڵڵا و ئێران بوو".

بنیامین نەتەنیاهۆ سەرۆك وەزیرانی ئیسرائیل وتیشی:"ڕوخانی ئەسەد ڕۆژێكی مێژووییە و گورزێكە لە بەرەی ئێران".

سەرۆك وەزیرانی ئیسرائیل ئەوەشی خستەڕوو:"ڕوخانی ڕژێمی ئەسەد هەلێكی نوێ و گرنگە بۆ ئیسرائیل، بەڵام دۆخەكە بێ مەترسی نییە".

نەتەنیاهۆ جەختی كردەوە "ئیسرائیل ڕێگا بە هیچ هێزێكی دوژمن نادات كە جێگەی خۆی لەسەر سنورەكەی بكاتەوە".

"دەستی ئاشتی بۆ دروزەکان، کوردەکان، کریستیانەکان و موسڵمانەکانی نێو سوریا درێژ دەکەین" نەتەنیاهۆ وای وت.

وتەكانی سەرۆك وەزیرانی ئیسرائیل دوای ئەوەدێت، پاش 12 ڕۆژ لە شەڕی نێوان ئۆپۆزسیۆن و سوپای سوریا، ئەمڕۆ هێزەكانی ئۆپۆزسیۆنی سوریا گەیشتنە دیمەشق و پێش ئەوەش بەشار ئەسەد سەرۆكی سوریا وڵاتەكەی جێهێشت.

پێشتریش ئیسرائیل ڕایگەیاندبوو بۆ پاراستنی سنورەکانی لە هەر مەترسییەک 14 کیلۆمەتر چووەتە ناو خاکی سوریاوە.