سەرتاشخانە کوردییەکانى بەریتانیا دەکەونە بەر هەڵمەتى پۆلیس

سبەى

پۆلیسى بەریتانیا هەڵیکوتایە سەر سەدان شوێنی بازرگانی، لەوانە سەرتاش و مینی مارکێت و دوکانی ڤایپ و شوشتنگەى ئۆتۆمبێل، بە تۆمەتى سپیکردنەوەی پارە و تێوەگلان لە کۆچى نایاسایی، لەچوارچێوەى هەڵمەتەکانى ئەو وڵاتە بۆ بەرەنگاربوونەوەى کۆچى نایاسایی.

بەپێی گرتەیەکى ڤیدیۆیی کە پۆلیس بڵاویکردووەتەوە دەردەکەوێت، ئەفسەرانی پۆلیس دەرگای پشتەوەی سەرتاشخانەیەکی ڕووناک و مۆدێرن لە شارۆچکەی بازاڕی شروسبێری دەشکێنن و لە ناوەوە یەکسەر دوو پیاو دەستبەسەر دەکەن کە دەڵێن پەنابەرى کوردن. دواتر هەردوو پیاوەکە ئازاد کران.

ئەمە یەکەم هەڵمەتە لەکۆى شەش هەڵمەت لەماوەى رۆژێکدا کە تێیدا پۆلیس دەستى بەسەر هەزاران پاوەندی کاش و ڤەیپی نایاساییدا گرت.

ئەفسەرەکان پشکنینیان لە شوێنەکان ئەنجامدا بەهۆی گومانی سپیکردنەوەی پارە، فرۆشتنی جگەرە و ڤەیپی نایاسایی و کۆچی نایاسایی و بازرگانیکردن بە ماددە هۆشبەرەکان.

لێکۆڵەرانى پۆلیس گومانیان لەسەرچاوەى داهاتى ئەو شوێنانە لەناویاندا سەرتاشخانەکان هەیە و دەڵێن هەندێک لەو شوێنانە دەلێن داهاتیان مانگانە ١٠٠ بۆ ١٥٠ هەزار پاوەندە، لەکاتێکدا ئەوەندە سەردانیکەریان نییە کە گەرەنتی ئەو بڕە پارەیە بکەن، ئەوەش بەپێی بی بی سی.

هەڵمەتەکە لە شرۆسبێری یەکێک بوو لەو ٢٦٥ هەڵمەتەی کە مانگی ڕابردوو لە سەرانسەری ئینگلتەرا و وێڵز ئەنجامدرا لە چوارچێوەی پشکنین بۆ سەرتاشخانە و دوکانی ڤەیپ و مینی مارکێت و شوشتنگەى ئۆتۆمبێل کە گومانیان لێدەکرێت سەر بە باندە تاوانکارییە نێودەوڵەتییەکان بن.

بەگوێرەی شرۆڤەکارانی موڵک و ماڵی بازرگانی، تێکڕای ژمارەی سەرتاش بۆ هەر کەسێک لە ئینگلتەرا و وێڵز لە ماوەی ١٠ ساڵی ڕابردوودا دوو هێندە زیادیکردووە.