ئەردۆغان لەبارەی بڕیارەکەی پەکەکە بۆ چەکدانان: گرنگ ئەوەیە جێبەجێ بکرێت و هەر بە قسە نەبێت

سبەی

ڕەجەب تەیب ئەردۆغان، سەرکۆماری تورکیا لەبارەی بڕیاری خۆهەڵوەشاندنەوە و چەکدانانی پەکەکە ڕایگەیاند: "گرنگ ئەوەیە جێبەجێ بکرێت و قسەکان و کردارەکان یەک بگرنەوە، دەزگای هەواڵگری نیشتمانی (میت) بە وردی چاودێری پرۆسەکە دەکات".

سەرکۆماری تورکیا و سەرۆکی گشتی ئاک پارتی لە میانی کۆبوونەوەی ئەمڕۆ چوارشەممە 14ی ئایاری 2025 فراکسیۆنی پارتەکەی لە پەرلەمانی تورکیا، لەبارەی بڕیاری خۆهەڵوەشاندنەوە و کۆتایی هێنان بە خەباتی چەکداری پەکەکە دوا.

ئەردۆغان خەباتی چەکداری پەکەکەی بە 'تیرۆر' و پەکەکە بە 'جوداخواز' ناو دەهێنێت و دەڵێت: "بڕیاری خۆهەڵوەشاندنەوە و ڕادەستکردنەوەی چەک لە لایەن ڕێکخراوی جوداخوازەوە، هەڵدانەوەی لاپەڕەیەکی نوێیە بۆ تورکیای بێ تیرۆر. ئیدی سەردەمی تیرۆر، چەک، توندوتیژی و نایاسایی کۆتایی هات"

ئەردۆغان ئاماژە بەوە دەدات کە گوایە بینینی ئەو ڕاستییانە لە لایەن باڵەکانی ڕێکخراوە لە سوریا و ئەوروپا و بەشداریکردن لە پرۆسەی خۆهەڵوەشاندنەوە و چەکدانان زۆر گرنگ دەبێت و دەڵێت: "خوا یار بێت ئەو دەرفەتە مێژوویییە نابێتە قوربانی حساباتی بچوک و یارییە نێودەوڵەتییەکان و لە کەشێکی گونجاودا پێ دەگات".

ئەردۆغان جەخت لەوە دەکاتەوە کە ئەوان بۆ ئەوەی بگەن بە "تورکیایەکی بێ تیرۆر" پێداگیرانە، بە پشوودرێژی، بە نیازپاکی و بونیادنەرانە بەردەوام دەبن لە هەوڵەکانیان. 

ئەردۆغان جەخت لەوە دەکاتەوە کە ئەوان خوازیارن ناوی تورکیا لەگەڵ پێشکەوتنی تەکنەلۆژیا، گەشەی کلتور و هونەر، بەها باڵاکانی دیموکراسی و مافەکانی مرۆڤ ناوی بهێندرێت نەک لەگەڵ "تیرۆر" و دەڵێت: "ئەگەر ئەو خاڵەی پێی گەیشتووین سەرکەوتنێکی گرنگ بێت، ئەمە تەواوی 86 ملیۆن هاوڵاتییەکەی تورکیا خاوەنیەتی".

ئەردۆغان داوای لە خەڵک کرد بە گەشبینانە و نەرمی نواندن چاودێری پێشهاتەکانی پەیوەندیدار بەو پرۆسە نوێیە بکەن و دەڵێت: " گرنگ ئەوەیە (بڕیارەکەی پەکەکە) جێبەجێ بکرێت و قسەکان و کردارەکان یەک بگرنەوە، دەزگای هەواڵگری نیشتمانی (میت) بە وردی چاودێری پرۆسەکە دەکات".

رۆژى دووشەممە  12ى ئایار، پەكەكە ئەنجامى كۆنگرەی رۆژانی پێنج بۆ حەوتی ئایارى راگەیاند و بڕیارى لەسەر خۆ هەڵوەشاندنەوە و کۆتایی هێنان بە خەباتى چەکدارییدا.

لە ڕاگەیەندراوەکەی پەکەکەدا سەرچاوەی سیاسەتی نکۆڵی و لەناوبردنی گەلی کورد بۆ پەیماننامەی لۆزان و دەستووری 1924 گەڕێندراوەتەوە و تیایدا هاتووە: "پارتی ئێمە پەكەكە؛ وەك بزووتنەوەی ئازادی گەلەكەمان هاتە سەر شانۆی مێژوو دژی سیاسەتی نكۆلی و لەناوبردنی كورد وەستایەوە كە سەرچاوەكەی پەیماننامەی لۆزان و دەستووری 1924 بوو".

جەهەپە جەخت لەوە دەکاتەوە کە مێژووی گەواهی ئەوە دەدات جەهەپە سەرڕاستانە لەگەڵ چارەسەرکردنی پرسی کوردە، بەڵام ئاک پارتی جیدی نییە لەوەدا و دەڵێت: "نابێت متمانە بە ئەردۆغان و ئاک پارتی بکرێت، لەوانەیە سبەی ئەگەر شتەکان بە دڵی ئەوان نەبێت جارێکی دیکە بە کورد بڵێنەوە تیرۆریست. پشتیوانی لە پرۆسەیەک ناکەین کە بۆ درێژکردنەوەی ماوەی حوکمڕانی ئەردۆغان بێت".

پەكەكە داوا لە هێزە نێودەوڵەتییەكان دەكات كە بە بینینی بەرپرسیارێتیان لە سیاسەتەكانی جیینۆساید كە بۆ سەد ساڵە دژی كورد بەڕێوە دەچێت، ڕێگری لە چارەسەری دیموكراتی نەكەن و بەشداری ئەرێنی لە پرۆسەكەدا بكەن.

بڕیارەكەی پەكەكە لەسەر داوای عەبدوڵا ئۆجەلان رێبەری زیندانیكراوی پەكەكەیە كە 26 ساڵە لە ئیمراڵی دەستبەسەرە، یەكەم كاردانەوەش لەلایەن ئاكپارتییەوە بوو كە بڕیارەكەی بە مێژوویی ناوبرد، بەڵام رایگەیاند بە وردی چاودێری جێیبەجێكردنی كرداری بریارەكە دەكەن.

كۆنگرەی خۆهەڵوەشاندنەوەی پەكەكە لەكاتێكدایە، هێشتا هێرشەكانی توركیا بەردەوامن لەكاتێكدا لە یەكی ئاداری ئەمساڵەوە ئاگربەستیان راگەیاندووە.

بەهۆی ئەو شەڕەی لە ساڵی 1984 ەوە لە نێوان پەكەكە و توركیا دەستیپێكردووە، زیاتر لە 40 هەزار كەس لە توركیا و باكوری كوردستان كوژراون، كە بەشێكیان خەڵكی سڤیلی باكوری كوردستانن، پێشتریش دوو هەوڵی ئاگربەست و پرۆسەی ئاشتی شكستیان هێناوە كە یەكێكیان لە ساڵی 2013 تا 2015 ی خایاند و دواتر شەڕ دەستیپێكردەوە.