وەزارەتی تەندروستی: حاڵەتێكی دیكەی تووشبوون بە تای خوێنبەربوون لە پارێزگای دهۆك دەستنیشانكرا

سبەی

وەزارەتی تەندروستی حكومەتی هەرێمی كوردستان رایگەیاند، حاڵەتێكی دیكەی تووشبوون بە تای خوێنبەربوون لە پارێزگای دهۆك دەستنیشانكراوە.

وەزارەتی تەندروستی لە راگەیەندراوێكدا بڵاویكردەوە:"حاڵەتێكی دیكە بە نەخۆشی تای خوێنبەربوون تۆماركرا ئەویش ئافرەتێكی دانیشتووی سنوری ناحیەی شیلادزێ یە لە قەزای ئامێدی سەر بە پارێزگای دهۆك تەمەنی ( 43 ) ساڵە، پیشەی ئافرەتی ماڵە لە هەمان خێزان خوشكی حالەتی پێشووە كە دوو هەفتەی پێشوو بەداخەوە گیانی لە دەستدا".

وەزارەتی تەندروستی جەخت دەكاتەوە " بەهۆی بەركەوتە و بوونی ئاژەڵی ماڵی و گومانلێكردن بە نەخۆشی تای خوێنبەربوون و چەندین ڕێكاری دەستنیشانكردن و چارەسەری پزیشكی دەگیرێتە بەر". دەشڵێت " ئەو تووشبووە لە ئێستادا لەژێر چاودێری چڕ لە نەخۆشخانە خەوێندراوە و چارەسەر وەردەگرێت".

"تا ئێستا دوای بوونی چەندین حاڵەتی گومانلێكراوی نەخۆشی تای خوێن بەربوون لە هەرێمی كوردستان و هاتنیان بۆ نەخۆشخانە و بەدواداچوون و پشكنین بۆ گومانلێكراوان لەماوەی مانگی ڕابردوو، دەرەنجام تەنها سێ حاڵەت دەسنیشانكراون و پشتڕاستكراونەتەوە كە بەداخەوە حالەتێكیان لەشاری دهۆك بوو كە دوو هەفتەی ڕابردوو لەبەر قورسی باری تەندروستی گیانی لەدەستدا و حاڵەتی دووەم بە تەواوی چاكبووەوە و لە نەخۆشخانە دەرچووە، لەگەڵ حاڵەتێكی دانیشتووی شاری موسڵ كە ئێستا لەشاری هەولێر چارەسەر وەردەگرێت". وەزارەتی تەندروستی وا دەڵێت.

 تای خوێنبەربوون پەتایەكی ڤایرۆسییە و هەندێك نیشانەی پێشوەختەی هەیە، لەوانەش تا و ماندوویەتی و لاوازی هەست كردن بە ناڕەحەتی، ئازاری ماسولكە و جومگەكان، جگە لە سكچوون و ڕشانەوە.

بەرزبونەوەی پلەی گەرمی مەترسی بڵاوبونەوەی تای خوێنبەربوون زیاد دەكات، لایەنە تەندروستییەكان هۆشیاریی و رێنمایی دەدەنە هاوڵاتییان كە خۆپارێزیی زیاتر بكەن، بەتایبەتی لەو ناوچانەی نەخۆشییەكەی تێدا بڵاوبوەتەوە.

تای خوێنبەربوون لە ئاژەڵەوە بۆ مرۆڤ دەگوازرێتەوە، ئەو ڤایرۆسە لە زۆربەی ئاژەڵ و بەشێك لە مێرووەكانیشدا هەیە، پزیشكان ڕێنمایی خەڵك دەكەن دووربكەونەوە لە دەستلێدانی ئاژەڵ و مەڕ و ماڵات، جگە لەوەش ڕێگربن لەوەی مێرووەكان بچنە ناوماڵ و شوێنی كاركردن و دەرمانی قڕكەر و دژەمێروو لەناو ماڵەكان بەكاربهێنن.

بەشێوەیەكی گشتی چارەسەرێكی تایبەت بە تای خوێنبەربوون نییە، تووشبووانی ئەم نەخۆشییە چارەسەری پاڵپشتی وەردەگرن، لەوانە گیراوەكان و یارمەتیدان بۆ هەناسەدان و ئازارشكێن و دەرمانی دژە ڤایرۆسات بۆ چاكبوونەوە.