حەوت كه‌س به‌ ڕووداوی هاتوچۆ لە نزیك خەلەکان برینداربوون

سبه‌ی

ڕووداوێكی هاتوچۆ له‌سه‌ر ڕێگای نێوان دوكان و خه‌له‌كان ڕوویدا و به‌هۆیه‌وه‌ حه‌وت كه‌س برینداربوون كه‌ شه‌شیان خوێندكارن.

مەڵبەند حەمەد مستەفا لێپرسراوی مەڵبەندی فریاگوزاریی خەلەکان له‌ لێدوانێكدا بۆ "سبه‌ی" ڕایگه‌یاند، به‌هۆی پێكدادانی مینی پاسێکی گواستنەوەی خوێندكاران و بارهه‌ڵگرێك لە نزیك گوندی قامیشە له‌سه‌ر ڕێگای دوکان – خەلەکان، حه‌وت كه‌س برینداربوون.

وتیشی، شه‌ش له‌ برینداره‌كان خوێندكاری په‌یمانگه‌ی ته‌كنیكیی دوكانن و خه‌ڵكی ڕانیه‌ن، له‌ كاتی گه‌ڕانه‌وه‌یاندا له‌ دوكانه‌وه‌ بۆ زێدی خۆیان تووشی ڕووداوه‌كه‌ بوون، برینداره‌كه‌ی دیكه‌ش منداڵی شۆفێری مینی پاسه‌كه‌یه‌ و سه‌رجه‌میان دۆخی ته‌ندروستییان جێگیره‌، ته‌نها یه‌ك له‌ خوێندكاره‌كان بۆ دڵنیابوونی زیاتر ڕه‌وانه‌ی نه‌خۆشخانه‌ی فریاكه‌وتنی سلێمانی ده‌كرێت.

بۆ زانینی ورده‌كاریی ڕووداوه‌كه‌ و چۆنێتیی ڕوودانی، "سبه‌ی" په‌یوه‌ندیی كرد به‌ عه‌‌قید - ئومێد عه‌بدوڵڵا به‌ڕێوه‌به‌ری هاتوچۆی دوكانه‌وه‌ و ناوبراو ئاماژه‌ی بۆ ئه‌وه‌ كرد كه‌ تیمیان ڕه‌وانه‌ی شوێنی ڕووداوه‌كه‌ كردووه‌ و وتی، "هێشتا نازانین كێ خه‌تاباره‌ و له‌ ڕووداوه‌كه‌ ده‌كۆڵینه‌وه‌".