كاتژمێری زۆری كاركردن دەرەنجامی خراپی لەسەر مێشك هەیە

سبەی

كاركردنی رۆژانەی زۆر دەكرێت كاریگەریی نەرێنی لەسەر تەندروستی هەبێت و ببێتە هۆی فشاری دەروونی، تێكدانی دڵ و دروستكردنی كێشەی دەروونی وەك دڵەڕاوكی و خەمۆكی.

بەپێی توێژینەوەكی نوێ لە گۆڤاری (بی ئێم جەی) بڵاوكراوەتەوە، دەركەوتووە كە مێشكی ئەو كەسانەی كاتژمێری زیاتر كار دەكەن جیاوازە لەو كەسانەی كاتژمێری كەمتر كاردەكەن.

توێژینەوەكە لەلایەن پسپۆڕانی زانكۆی سیئۆل لە كۆریای باشوور ئەنجامدراوە لەسەر 110 كارمەند (كرێكار)، لەو ژمارەیە 32 كەسیان هەفتانە 52 كاتژمێر دەكەن (ئەو رێژەیە زیاترە لە رێژەی ستانداری كۆریا)، هەروەها 78 كارمەندی دیكە لە 52 كاتژمێری هەفتانە كەمتە كاردەكەن.

توێژەرانی توێژینەوەكە بۆ بەراوردی مێشكی كرێكارەكان، تاقیكردنەوەی (MRI)ـیان بۆ ئەنجامدان. لە تاقیكردنەوەكە دەركەوت كە مێشكی ئەو دوو كۆمەڵە كرێكارە كە كاتژمیری جیاواز كاردەكەن جیاوازە.

وەك لە توێژینەوەكەدا هاتووە، ئەو كەسانەی رۆژانە زیاتر كاردەكەن، 17 جێگەی مێشكیان جیاوازترە لەو كەسانەی كەمتر كاردەكەن. ئەو جێگەیانەی جیاوازترن بەرپرسیارن لە ئەركە جێبەجێكارییەكانی وەك بیركردنەوەی لۆژیكییانە و بەڕێوەبردنی هەست و سۆزەكان.

گۆڕانكارییەكان لە مێشكی ئەو كەسانەی كاتژمێری زیاتر كاردەكەن دەبێتە هۆی دروستبوونی فشاری دەروونی، دڵەڕاوكێ، خەمۆكی و ژمارەیەك دەرەنجامی نەرێنی دیكە.

جگە لە دەرەنجامە نەرێنییانە، گۆڕانكارییەكان لە مێشكی ئەو كەسانەی زیاتر كاردەكەن بەپرسیارە لە یادگە، بڕیاردان، سەرنجدان، پلانداننان و چارەسەكردنی كێشە.

پسپۆڕان پێشنیاز دەكەن بۆ ئەو كەسانەی ناتوانن كاتژمێرەكانی كاركردنیان كەمبكەنەوە، بۆ كەمكردنەوەی بەشێك لە دەرەنجامە خراپەكانی كاركردنی رۆژانەی زۆر پێویستە خەوی پێویستیان هەبێت، چالاكی جەستەیی و وەرزشكردنی بەردەوامیان هەبێت، هەروەها تەكنیكە جیاوازەكانی پشوودان بەكاربهێنن.