پسپۆڕان هۆشداری دەدەن.. بە مۆبایلەوە مەچنە ئاودەست!

سبەی

پسپۆڕان هۆشداری دەدەن لەوەی بەکارهێنانی مۆبایل لە ئاودەست، بەکتریا زیانبەخشەکان لە مۆبایل کۆدەکاتەوە و ئەوەش دەبێتە هۆی سکچوونی توند، گرژبوونی گەدە و هەوکردنی خوێن و سییەکان.

دکتۆر پریمرۆز فریستۆن پڕۆفیسۆر لە کلینیکی وردبینەزیندەوەرناسی لە زانکۆی لێنستەر بە دەیلی مەیلی ڕاگەیاندووە نابێت کەس بە مۆبایلەوە بچێتە ئاودەست.

ئەو پسپۆڕە ئاماژە بەوە دەدات بردن و بەکارهێنانی مۆبایل بۆ ئاودەست، ئاو ئامێرە دەکاتە هێلانەی چەندین جۆری بەکتریای زیانبەخش.

بەکارهێنانی مۆبایل دەبێتە هۆی ئەوەی کۆبوونەوە و لێنیشتنی بەکتریا مەترسیدارەکانی وەک E. coli (Escherichia coli) و Pseudomonas aeruginosa.

E. coli دەبێتە هۆی سکچوونی توند و گرژبوونی گەدە، Pseudomonas aeruginosaیش دەبێتە هۆی هەوکردنی خوێن و سییەکان. 

بەپێی ئەنجامەکانی توێژینەوەیەکی زانکۆی کۆلۆرادۆ بۆڵدەر هەر بە دروستبوونی دڵۆپە وردبینەکان لە کاتی ڕاکێشانی سیفۆنی ئاودەست، بەکتریاکان تا 1.5 مەتر بڵاو دەبنەوە.

تەنیا هەشت خولەکیش دوای ڕاکێشانی سیفۆنی ئاودەست، ئەم دڵۆپە وردبینانە مەودای 1.5 مەتر دەبڕن و تەنانەت ئەگەر سەرقاپی ئاودەست داشدرابێتەوە، بەکتریاکان دەگەنە دەرەوە.

هەموو شتێکی ناو ژووری ئاو دەست پیسە و پێویستە زوو زوو پاک بکرێنەوە
دکتۆر پریمرۆز فریستۆن جەخت لەوە دەکاتەوە کە ژووری ئاودەست ئێجگار پیسە و دەڵێت: "زۆربەی شتەکان ناو ئاودەست هەر لە دەستشۆر و سابوونەوە بگرە تا دەگاتە دەسکی دەرگای ئاودەست و ڕاخەری ژووری ئاودەست، ئەو بەکتریایانەیان لێ کۆ دەبنەوە کە لەناو پاشەڕۆوە هاتوون".

ئەم پسپۆڕە بە پێویستی دەزانێت زوو زوو توالێت بە باشی پاک بکرێتەوە و تەنانەت بۆ مانەوە بۆ ماوەیەکی کەمیش مۆبایل لە توالێت بەکار نەهێنرێت و لە گیرفان نەهێندرێتە دەرەوە. 

دکتۆر پریمرۆز فریستۆن جەخت لەوە دەکاتەوە بۆ پاککردنەوەی مۆبایل پێویستە ئەو دەستەسڕە تەڕانە بەکار بهێندرێن کە ڕێژەی کحول تیایاندا لە سەدا 70یە.