وردەکاریی کەوتنەخوارەوەى دوو درۆن لە سنورى سلێمانى؛ وتەبێژى هێزەکانى حەفتا: درۆنەکان خراونەتە خوارەوە

سبەى

دوو درۆن لە سنورى سلێمانى کەوتنەخوارەوە، کە یەکێکیان نزیک بووە لە بارەگاى فەرماندەیی هێزەکانى حەفتاى یەکێتى، وتەبێژى هێزەکانى حەفتا دەڵێت هەردوو درۆنەکە خراونەتە خوارەوە.

ئەمشەو دوو دەنگى بەهێز لە سنورى تاسڵوجە و لە نزیک بارەگاى فەرماندەیی هێزەکانى حەفتاى یەکێتى بیسترا و بەپێی گرتەیەکى ڤیدیۆیی دەردەکەوێت کە دوکەڵ لە شوێنەکان بەرزدەبێتەوە.

ئەحمەد لەتیف وتەبێژى هێزەکانى حەفتا لە سلێمانى بە "سبەى" راگەیاند، دەنگەکان دەنگى خستنەخوارەوەى دوو درۆن بوون لە نزیک تاسڵوجە  و بارەگاى فەرماندەیی هێزەکانى حەفتا، بەبێ ئەوەى هیچ زیانێکى گیانى و ماددیان لێبکەوێتەوە.

هاوکات، سەرچاوەیەکى ئەمنى بۆ "سبەى" ئاماژەى بەوەدا، لێکۆڵینەوە لە رووداوەکە بەردەوامە.

لاى خۆیەوە، عەقید سەلام عەبدولخالق  وتەبێژی دەزگای ئاسایشی هەرێم لە راگەیەنراوێکدا رایگەیاند، "کەمێک لەمەوبەر دوو درۆن لەناوچەی تاسڵوجەی سنوری سلێمانی کەوتنە خوارەوە و دەستبەجێ تیمەکانی لێکۆڵینەوەی دەزگای ئاسایشی هەرێم گەیشتنە شوێنی ڕووداوەکە و لێکۆڵینەوە ئەنجام دەدەن و ڕووداوەکە هیچ زیانێکی گیانی لێنەکەوتووەتەوە".