حکومەتی هەرێم رەزامەندی دا لەسەر لەیەکترتێگەیشتنی نوێ لەگەڵ بەغداد تایبەت بە مووچە و شایستە داراییەکان
سبەی
ئەنجومەنی وەزیرانی هەرێمی کوردستان بڕیاریدا بە جێبەجێکردنی ناوەڕۆکی لەیەکترتێگەیشتنە ئەو هاوبەشەی کە دوێنێ لە بەغدا تایبەت بە دابینکردنی شایستە داراییەکانی هەرێمی کوردستان و پابەندییەکانی هەرێم هاتووەتە ئاراوە.
بەپێی راگەیەندراوێکی حکومەتی هەرێمی کوردستان، ئەمڕۆ چوارشەممە 16ـی تەممووزی 2025، بە سەرپەرشتيی سەرۆک وەزیران ئەنجومەنی وەزیرانی هەرێمی کوردستان کۆبووەوە، لە دەستپێکی کۆبوونەوەدا، ئەنجومەنی وەزیران بە توندترین شێوە، هێرشە تیرۆریستییەکانی سەر هەرێمی کوردستان و بە تایبەتی کێڵگە نەوتییەکانی هەرێمى شەرمەزار کرد، کە زیانێکی زۆری ماددیان بە پرۆسەی بەرهەمهێنانی نەوت گەیاندووە و ئامانجی ئەم هێرشانە، لێدانە لە ژێرخانی ئابووری و وزەی هەرێمی کوردستان.
ئەنجومەنی وەزیران داوا لە حکومەتی فیدراڵ دەکات کە ئەرکی خۆی بەجێ بگەیەنێت، بۆ ئەوەی سنوورێک بۆ ئەو هێرشانە دابنرێت و ڕێکاری یاساییش بەرانبەر ئەو تێکدەرانە بگیرێتە بەر.
دواتر ئەنجومەنی وەزیران، گفتوگۆی لەبارەی تەوەر و بابەتی کۆبوونەوەکە کرد، کە تایبەت بوو بە تاووتوێکردنی بارودۆخی دارایيی هەرێمی کوردستان و ڕێڕەوی دانوستان و گفتوگۆکان لەگەڵ حکومەتی فیدراڵ، سەبارەت بە مووچە و شایستە داراییەکانی هەرێمی کوردستان.
سەرۆک وەزیران و جێگری سەرۆک وەزیران، وردەکاريی ئەو لەیەکترتێگەیشتنە هاوبەشەی کە دوێنێ لە بەغدا تایبەت بە دابینکردنی شایستە داراییەکانی هەرێمی کوردستان و پابەندییەکانی هەرێم هاتووەتە ئاراوە خستەڕوو.
دوای گفتوگۆ و ڕاگۆڕینەوە، ئەنجومەنی وەزیران پێشوازیی لەو لەیەکترتێگەیشتنە کرد و بڕیاری دا بە جێبەجێکردنی ناوەڕۆکی ئەو لەیەکترتێگەیشتنە، کە بڕیارە لە بەرانبەردا حکومەتی فیدراڵ، مووچە و شایستە داراییەکانی هەرێمی کوردستان بنێرێت.
سبەینێ كۆبوونەوە نا ئاساییەكەی ئەنجومەنی وەزیرانی عێراق بەڕێوەدەچێت؛ بڕیار لەبارەی هەرێمی كوردستان دەدرێت
ڕاگەیەندراوێكی دیكە لە وەزارەتی سامانە سروشتییەكانەوە؛هێرشە درۆنییەكانی 14و 15و 16 ی تەموز زیانی ماددی گەورەی دروست كردووە
ئاماژەكانی رێككەوتن لەنێوان بەغداد و هەولێر؛ لە ژێر فشاری درۆنەكاندا