- نوری مالیکی هۆشداریی دەدات، بەعسییەکان لە رێگەی پەرلەمان و پێگەکانی دەسەڵاتەوە بگەڕێنەوە، بیری بەعس لە رێگەی کەناڵەکانی یاسادانان، یان ئاسایش و ئابورییەوە بگەڕێتەوە بۆ عێراق.
سبەی
نوری مالیکی هۆشداریی دەدات، بەعسییەکان لە رێگەی پەرلەمان و پێگەکانی دەسەڵاتەوە بگەڕێنەوە، بیری بەعس لە رێگەی کەناڵەکانی یاسادانان، یان ئاسایش و ئابورییەوە بگەڕێتەوە بۆ عێراق.
ئەمڕۆ هەینی (8ـی ئابی 2025) نوری مالیکی سەرۆکی هاوپەیمانیی دەوڵەتی یاسا لە بەیاننامەیەکدا بڵاوی کردەوە: مادەی حەوتی دەستور بەعسی قەدەغەکردووە، رێگریی دەکات لە گەڕانەوەیان بۆ ژیانی سیاسی لە ژێر هەر ناو و ناونیشانێکدا بێت. ئینتیما بۆ ئەو حیزبە تاوانە، ئەوەش وەڵامدەرەوەیەک بووە بۆ سەردەمێکی تاریکی مێژووی عێراق کە گەل چەندین ساڵی لەژێری سایەی کوشتن و سەرکوتکاریی و جیاکاریی و خوێندا بەسەر برد، لەسەر دەستی رژێمێکی سەرکوتکار کە هەڵگری بیری رەگەزپەرستی و تیرۆر و مەزهەبی بوو.
مالیکی بەبیری دەهێنێتەوە، کە یاسای ریشەکێشکردنی بەعس و دروستکردنی دەستەی لێپرسینەوە و دادپەوەری لایەنی پەیوەندیداری دۆسیەی بەعسییەکانە بۆ کۆکردنەوەی بەڵگە و زانیارییەکان و گرتنەبەری رێکاری یاسایی بەرامبەریان.
سەرۆکی هاوپەیمانیی دەوڵەتی یاسا دەڵێت: بەپێی یاسا رێگە بە خۆکاندیدکردن، یان بەشداریی کردنی بەعسییەکان لە پرۆسەی سیاسی نادرێت، دەستەی لێپرسینەوە و دادپەروەری تەنها دەستەیەکی یاسایی نییە، بەڵکو لایەنی جێبەجێکاریشە بۆ جێبەجێکردنی یاسا و دەستور. بڕیارەکانی پابەندکارە و هیچ لایەنێکی سیاسی، حکومی و یاسادانان ناتوانێت دەستوەردانی تێدا بکات.
نوری مالیکی ئاماژەی بەوەکردووە؛ هەر هەوڵێک بۆ کارئاسانی یان چاوپۆشی مانای کردنەوەی دەرگایە بۆ دزەکردنە ناو دامەزراوەکانی دەوڵەت، گەڕانەوەی بیری بەعس لە رێگەی کەناڵەکانی یاسادانان، ئاسایش و ئابوری هەڕەشەیەکی راستەوخۆیەوە لەسەر رێڕەوی دەوڵەتی دیموکراتی، بێ بەهاکردنی قوربانیدانی ئەو عێراقیانەیە کە دژی ستەمکاریی وەستانەوە و باجی قورسیاندا لە پێناو عێراقێکی نوێدا.
مالیکی داوا دەکات هاوشانی دەستەی لێپرسینەوە و دادپەروەری بوەستنەوە بۆ بەجێگەیاندنی ئەرکەکانی بەبێ هیچ لەمپەر و فشارێک، ئەگەر دەرکەوت هەر کەسێک دزەی کردوەتە ناو پەرلەمان یان دەوڵەت و پێشتر ئینتیمای بۆ حیزبی بەعس هەبووە، پێویستە رێکاری یاسایی بەرامبەر بگیرێتەبەر، بەبێ لەبەرچاوگرتنی پێگەی ئێستای یان ئەو رێگەیەی پێی گەیشتوەتە ئەو پۆست و بەرپرسیارێتییە.
لە کۆتایی راگەیەندراوەکەدا نوری مالیکی پارێزگاریی کردن لە پیس نەبوونی پرۆسەی سیاسی بە بەعسییەکان نەک تەنها بە ئەرکێکی دەستوری و نیشتیمانی دەزانێت، داوا دەکات لە هیچ دۆخێکدا سازشی سیاسی نەکرێت لەسەر خوێنی عێراقییەکان و ئایندەی وڵاتەکەیان.