ئەمەریکا: گروپەکانی سەر بە ئێران لە پشتی هێرشەکانی سەر هەرێمی کوردستانەوەن

سبەی

وتەبێژی وەزارەتی دەرەوەی ئەمەریکا هۆشداریی دەدات لە تێپەڕاندنی یاسای حەشدی شەعبی و بەدووری نازانێت بەهۆیەوە سزای ئابوری بەسەر عێراقدا بسەپێنێت، لەبارەی هێرشەکانی سەر هەرێمی کوردستانیشەوە رایگەیاند: ئێران دژی بەرژەوەندییەکانی ئەمەریکایە و لە پشت ئەو هێرشانەوەیە.

هێرشەکانی سەر هەرێمی کوردستان

سەبارەت بەو هێرشانەی لە ماوەی رابردوودا لە رێگەی فڕۆکەی بێفڕۆکەوانی خۆکوژەوە کرایە سەر هەرێمی کوردستان و بەتایبەتی کێڵگە نەوتییەکان، مایکڵ میچڵ، وتەبێژی عەرەبی وەزارەتی دەرەوەی ئەمەریکا بۆ کاروباری رۆژهەڵاتی ناوەڕاست رایگەیاند: هێرشەکان بۆ سەر بەرژەوەندییەکانی ئەمەریکا و دژی بەرژەوەندییەکانی گەلی عێراق نوێ نییە، ئەوە دیاردەیەکی بەردەوامە، پرسی نەگۆڕ ئەوەیە کە هەژموونی ئێران نوێ نییە و بەردەوامە، ئێران دەیەوێت جارێکی دیکە هەڵوێستی جیۆستراتیژی خۆی لە رێگەی پاڵپشتی کردنی ئەو "گروپە تیرۆریستییانە" بەهێزبکاتەوە، ئەمەریکاش دژی ئەو بیرۆکەیەیە.

جەختی کردوەتەوە، ناکۆکی لەناوخۆی عێراق هەیە، ئەمەریکا وەبەرهێنانی گەورەی لە سەرتاسەری عێراق هەیە، بە هەڵسەنگاندنی واشنتن، عێراق پێویستی بەو وەبەرهێنانەی ئەمەریکا و وڵاتانی دیکە هەیە بە ئامانجی گەشەی ئابوری و خۆبژێوی، لەو بوارەشدا دەستکەوتی گەورەیان بەدەستهێناوە.

ئاماژەی بەوەکردووە: ئەمەریکا نیگەرانە لە نەبوونی هەماهەنگی و سازان لەنێوان بەغداد و هەرێمی کوردستان، ئەوەش کاریگەریی خراپی لەسەر گەشەی ئابوری هەیە، سەرۆکی ئەمەریکا سەرنجی زیاتر لەسەر ئەو پرسەیە، چونکە پێمانوایە کە گەشەی ئابوری کاریگەریی ئەرێنی لەسەر سەقامگیری هەیە، لە پێچەوانەشەوە وایە، بۆیە پێویستە ئەو کێشانە تێپەڕێندرێن لەپێناو بەدەستهێنانی ئامانجە ئابورییەکان لە کۆتایدا.

یاسای حەشدی شەعبی

مایکڵ میچڵ، وتەبێژی عەرەبی وەزارەتی دەرەوەی ئەمەریکا بۆ کاروباری رۆژهەڵاتی ناوەڕاست دەڵێت: لە ئەگەری تێپەڕاندن و دەنگدان لەسەر یاسای حەشدی شەعبی لەلایەن پەرلەمان، دوورنییە ئەمەریکا سزای ئابوری بەسەر عێراقدا بسپەێنێت، لە چوارچێوەی ئەوپەڕی فشار لەسەر ئێران، چونکە سەرۆکی ئەمەریکا دوو دڵ نییە لە گرتنەبەری هەر رێکارێکی پەیوەست بە سزای ئابوری بۆ سەر هەر دەوڵەت و کیانێک کە لە دەرەوەی یاسا پەیوەندیی لەگەڵ ئێران هەبێت.

میچێڵ لە لێدوانێیکیدا بۆ پێگەی "جیبالی عێراقی" رایگەیاندووە: وەزارەتی دەرەوەی ئەمەریکا ئەوپەڕی نیگەرانە لە پەسەندکردنی یاسای حەشدی شەعبی لە عێراق، ئێستا گۆڕانکاریی لە هاوسەنگی هەرێمی رویداوە، ئێران تاڕادەیەکی زۆر لاواز بووە، بەڵام پەسەندکردنی یاساکە زیان بە سەروەری عێراق دەگەیەنێت و هیچ ئەنجامێکی باشی نییە بۆ گەلی عێراق.

وتەبێژە عەربیزانەکەی وەزارەتی دەرەوەی ئەمەریکا رایگەیاند: گروپی تیرۆریستی لە چوارچێوەی حەشدی شەعبیدایە، بەشدارییان کردووە لە هێرش کردنە سەر سوپا و کۆمپانیا ئەمەریکییەکان، ئەو یاسایەش کاردانەوەی خراپی بۆ سەر عێراق دەبێت. لە چوارچێوەی هەڵمەتەکانی دۆناڵد ترەمپ سەرۆکی ئەمەریکا بۆ ئەوپەڕی فشار لەسەر ئێران، چونکە سەرۆک دوو دڵ نییە لە گرتنەبەری هەر هەڵوێستێک لە چوارچێوەی سزای ئابوری دژی هەر قەوارە و دەوڵەتێک کە لەدەرەوەی یاسا پەیوەندی لەگەڵ ئێران هەبێت.

ئاماژەی بەوەکردووە؛ گرنگترین خاڵ لای ئەوان سەروەری عێراقە، ئەو یاسایە زیان بە سەروەرییەکەی دەگەیەنێت و ئەمەریکاش دژی ئەو بیرۆکەیەیە.

سەبارەت بە سزادانی عێراقیش دەڵێت: ئەگەری زۆر ئەوە روبدات، ناتوانین پێشبینی بکەین لە داهاتوودا چی روودەدات، هەر بڕیارێک لەوبارەیەوە راستەوخۆ کۆشکی سپی دەری دەکات. داهاتووی عێراق پەیوەندی بە گەلەکەیەوەیەتی، ئەمەریکا لە سەردەمی ئیدارەی دووەمی ترەمپ هانی عێراق دەدات دەسەڵاتی بەسەر خاکەکەیدا هەبێت بەبێ هەژموونی ئێران، لەگەڵ روبەڕوبوونەوەی داعش و رێگریی لە گەڕانەوەی و رێگریی کردن لە سەرهەڵدانی هەر گروپێکی تیرۆیستی دیکە. عێراق پێویستی بە گەشەی ئابوری هەیە، میلیشیا توندڕەوەکان کاریگەریی خراپیان لەسەر گەشەی ئابوری عێراق هەیە.

قاچاخچێتی نەوت

وتەبێژی عەرەبی وەزارەتی دەرەوەی ئەمەریکا، سەبارەت بە قاچاخبردنی نەوتی ئێران لە رێگەی بەندەرەکانی عێراقەوە، هۆشداریی دەدات لەو بابەتە و دەڵێت: ئەو دۆسیەیە بەلای ئیدارەی ترەمپەوە زۆر گرنگە، بەتایبەتی دوای ئەوی لەنێوان ئێران و ئیسرائیل و ئەمەریکا رویدا، ئەمەریکا بەهۆی کڕینی نەوتی ئێرانەوە سزای ئابوری بەسەر هندستاندا سەپاند. دەشڵێت: “ئێمە پابەندین بە پرۆسەی ئەوپەڕی فشار بۆ سەر ئێران و سزادانی ئابوری و پاشگەزبوونەوە لەو بابەتە نییە تا ئامانجەکان بەدەست دەهێنرێت.”