دوای 17 ساڵ سۆراخکردن، دایکێکی کورد لە ئامەد بۆی دەردەکەوێت منداڵەکەی نەمردووە

سبەی

چیرۆکێکی سەرسوڕهێنەر لە ئامەدی باکوری کوردستان، گومانی دایکێکی کرد بە ڕاستی. 

فاتمە ئەسڵان کە 17 ساڵ بوو باوەڕی نەدەکرد ئەو منداڵەی لە نەخۆشخانە بە "مردوویی" پێیان دابووەوە هی ئەو بێت، دواجار پشکنینی DNA گومانەکەی بە ڕاست گەڕاند. ئەنجامەکان دەریانخست ئەو منداڵەی لە گۆڕدایە، جگەرگۆشەی ئەو نییە و ئێستا ئەو دایکە بە دوای کوڕە ونبووەکەیدا دەگەڕێت.

رۆژی (5ـی شوباتی 2008) خێزانی فاتمە و ئەرجان ئەسڵان کوڕێکیان دەبێت و ناوی دەنێن محەممەد فورقان. بەهۆی ئەوەی منداڵەکە لە ماڵەوە لەدایک دەبێت، دەیبەنە نەخۆشخانەی گشتیی بسمیل و لەوێ بەڵگەنامەی لەدایکبوونی بۆ دەردەهێنن و بەڕێوەبەرایەتیی ئەو نەخۆشخانەیەش بە پێویستی دەزانێت لەوێوە بیبەن بۆ نەخۆشخانەی منداڵانی "داغ قاپی" لە ئامەد.

ئەرجان ئەسڵان، باوکی منداڵەکە، چیرۆکەکەی بەم جۆرە دەگێڕێتەوە: "17 ڕۆژ لە نەخۆشخانە هێڵدرایەوە. هەڵسوکەوتی تیمی نەخۆشخانەکە لەو ماوەیەدا زۆر جێی گومان بوو؛ ڕێگەیان نەدەدا شیری دایکی پێبدرێت، نەشیانهێشت من و دایکی بیبینن. دواجار شەوێکیان کاتژمێر سێی بەرەبەیان تەلەفۆنیان کرد و وتیان: بۆ خۆتان خۆش بن، منداڵەکەتان مردووە.

باوکەکە باس لەوە دەکات کە تەرمەکەیان لەناو کارتۆنێکدا پێداونەتەوە و ئەوانیش لە گۆڕستانی یەنیکۆی ناشتوویانە. بەڵام شۆک بوون بەوەی دواتر بەڕێوەبەرایەتیی گۆڕستانەکان پێیان ڕاگەیاندوون کە هیچ تۆمارێک نییە بیسەلمێنێت ئەوان لەوێ تەرمێکیان ناشتووە، ئەمەش ئەوانی زیاتر خستە گومانەوە.

"دڵم هەر دەیگوت کوڕەکەم زیندووە"

فاتمە ئەسڵان، دایکی منداڵەکە کە دوو منداڵی دیکەیشی هەیە و 17 ساڵە بە ئاگری ئەو گومانەوە دەسووتێت، بە چاوی پڕ لە فرمێسکەوە دەڵێت: "لەو 17 رۆژەدا چەند جارێک چوومە بەر دەرگای نەخۆشخانە، بەڵام دەیانگوت 'قەدەغەیە، ناتوانیت بیبینیت'. کاتێکیش ووتیان مردووە، هەرگیز هەستم بەوە نەدەکرد ئەمە ڕاست بێت. تەنانەت لۆمەی خۆشم دەکرد و دەمگوت بۆچی دڵتەنگ نیم؟ بە هاوسەرەکەمم دەگوت دڵنیام کوڕەکەم زیندووە."

ئەم هەستە بەهێزەی دایکایەتی وای لەو دایک و باوکە کرد دوای 14 ساڵ، بڕیار بدەن پەنا بۆ یاسا ببەن.

هەڵدانەوەی گۆڕەکە و ئەنجامە شۆکهێنەرەکەی DNA

دوای پەنابردنی خێزانەکە بۆ سەرۆکایەتیی داواکاری گشتی، لە یەکی تشرینی دووەمی 2024، دادگا بڕیاری هەڵدانەوەی گۆڕەکەی دا. دوای وەرگرتنی نموونە لە ئێسک و پروسکی منداڵەکە و لە دایک و باوکەکە، ئەنجامی پشکنینی DNA لە پزیشکی دادیی ئەستەنبوڵەوە گەڕایەوە و ڕاستییەکی شۆکهێنەری ئاشکرا کرد: منداڵی نێو گۆڕەکە هی ئەو خێزانە نییە!

فاتمە ئێستا بە دڵنیاییەوە دەڵێت: "دڵنیام کوڕەکەم زیندووە و لای خێزانێکی ترە، هەستیش دەکەم لەوێ دڵخۆش نییە. داوا لە لایەنە پەیوەندیدارەکان دەکەم یارمەتیم بدەن تا کوڕەکەم بدۆزمەوە. داواکاریم لەو خێزانانە ئەوەیە کە لەو کاتەدا لەو نەخۆشخانەیە منداڵیان بووە، پەنا ببەنە بەر یاسا."

زەکی ئۆران، پارێزەری خێزانەکە ڕایگەیاند دۆسیەکە کراوەتەوە و لێکۆڵینەوەکان بەردەوامن بۆ دۆزینەوەی منداڵە ونبووەکە و سزادانی ئەوانەی لەم ڕووداوەدا کەمتەرخەم بوون.