هەزاران کەس بۆ خوێندن بە زمانی کوردی لە باکووری کوردستان رژانە سەر شەقام

سبەی

ئەمڕۆ هەزاران کەس بۆ خوێندن بە زمانی دایک لە باکووری کوردستان ڕژانە سەر شەقام و داوایان کرد زمانی کوردی وەک زمانی فەرمیی خوێندن لە تورکیا دانی پێدا بندرێت و کۆتایی بە سیاسەتی 100 ساڵەی قەدەغەکردنی زمانی کوردی بهێندرێت.

ئەمڕۆ دووشەممە 8ی ئەیلوولی 2025 لەگەڵ دەسپێکی ساڵی نوێی خوێندن لە تورکیا و باکووری کوردستان و هەزاران هاوڵاتی، چالاکوان، سیاسەتمەدار و نوێنەری ڕێکخراوەکانی کۆمەڵگەی مەدەنی لە شارە گەورەکانی ئامەد، وان، شرنەخ، ئاگری، ئێڵح و سێرت، ڕژانە سەر شەقام و داوایان دەکرد خوێندن بە زمانی دایک بێت و زمانی کوردی وەک زمانی فەرمیی خوێندن لە تورکیا دانی پێدا بندرێت.

ژمارەیەکی زۆر لە پەرلەمانتارانی دەم پارتی، ئەندامانی کۆمەڵە و سەندیکا پەروەردەیی و ڕۆشنبیرییەکان و جەماوەرێکی فراوان بەشدارییان لە خۆپیشاندانەکاندا کرد و بە یەک دەنگ جەخت کرایەوە کە بێبەشکردنی ملیۆنان منداڵی کورد لە خوێندن بە زمانی دایک، "تاوانێکی دژ بە مرۆڤایەتییە" کە ماوەی سەد ساڵە بەردەوامە. 

ڕێکخەرانی خۆپیشاندانەکان و خەمخۆرانی زمانی کوردی جەختیان لەوە دەکردەوە هەر منداڵێک لەم مافە سروشتییە بێبەش بکرێت، لە ڕووی پەروەردەیی و دەروونییەوە زیانی گەورەی بەردەکەوێت و بەرەو پێش ناچێت.

ئەم ناڕەزایەتییە فراوانانە لە کاتێکدایە کە باس لە دەستپێکردنی پرۆسەیەکی نوێ بۆ چارەسەریی پرسی کورد دەکرێت. بەڵام چالاکوانان و سیاسەتمەدارانی کورد ڕەخنەی ئەوە لە حکومەتی تورکیا دەگرن تا ئێستا هیچ "هەنگاوێکی کردەیی" بۆ سەرخستنی پرۆسەکە نەناوە. 

بە وتەی ئەوان، گەورەترین ئاستەنگ لەبەردەم ئاشتییەکی ڕاستەقینە و هەمیشەییدا، بەردەوامیی سیاسەتی نکۆڵیکردن و قەدەغەکارییە لەسەر زمانی کوردی.

ئەوان ئاماژەیان بەوە کرد ئاشتی تەنها بە چەکدانان نایەتە دی، بەڵکوو پێویستی بە داننانە بە مافە بنەڕەتییەکانی گەلی کورددا، کە لە سەرووی هەموویانەوە مافی زمان و ناسنامەیە. 

خەمخۆرانی زمانی کوردی جەختیان لەوە کردەوە تا زمانی کوردی ستاتۆیەکی یاسایی و دەستووریی پێ نەدرێت و دەرگای قوتابخانەکان لە باخچەی ساوایانەوە تا زانکۆ بە ڕووی خوێندن بەم زمانەدا نەکرێتەوە، ناتوانرێت باسی ئاشتییەکی سەربەرزانە و کۆمەڵگەیەکی دیموکراتی بکرێت. 

ئەمەش وەک وەڵام بۆ لێدوانەکانی بەرپرسانی حکومەت لێک دەدرێتەوە کە بانگەشەی ئەوە دەکەن گوایە "هیچ داواکارییەک بۆ خوێندن بە کوردی پێشکەش نەکراوە".