نامەکەی ئۆجەلان؛ سەرۆک هۆز و شێخە عەرەبەکانی سوریا لەوبارەیەوە هەڵوێستی خۆیان دەردەبڕن

سبەی

عەبدوڵڵا ئۆجەلان رێبەری زیندانیكراوی "پەكەكە" پەیامێكی ئاڕاستەی سەرۆك هۆز و شێخەكانی عەرەب لە باكور و رۆژهەڵاتی سوریا كرد، كە پشتیوانی هێزەكانی سوریای دیموكرات بكەن، ئەمەش لەلایەن بەشێك لە سەرۆك هۆز و شێخەكانی عەرەب لە ناوچەكە رەتكراوەتەوە، جەختیان كردۆتەوە "لەگەڵ یەكچارچەیی سوریا و دژی تیرۆر و توندوتیژین"، بەڵام بەشێكیشیان پشتیوانی پەیامەكەیان كردووە و پشتیوانی ئەو رایە دەكەن كە "هەسەدە بڕبڕەی پشتی پاراستنی ناوچەكەیانە".

لە پەیامەكەی ئۆجەلاندا كە لە زیندانی ئیمراڵییەوە نوسیویەتی و رۆژی یەكشەممەی رابردوو بڵاوكرایەوە، دەڵێت "یەكێتی عەرەبی و كورد لەسەر بنەمای گەلی دیموكراتیك دەبێتە یەكێك لە پایەكانی بنیاتنانی سوریای دیموكرات و ئارام".داواش دەكات پشتیوانی هەسەدە بكرێت بۆ بەرەنگاربوونەوەی ئاڵنگارییەكان.

نامەكەی ئۆجەلان لە 27 ی تەموزی ئەمساڵ نوسراوە، بەپێی هەواڵی بەشێك لە میدیا كوردیەكانی باكور و رۆژئاوا، ئاڕاستەی سەرۆك هۆز و شێخی عەشائیرەكانی باكور و رۆژهەڵاتی سوریا كراوە، بەتایبەتیش دێرەزو و رەقە و تەبقە، داوا دەكات "برایەتی مێژوویی نێوان پێكهاتەكان پتەوبكرێت و پشتیوانی هێزەكانی سوریای دیموكرات بكرێت بۆ بەرەنگاربوونەوەی ئاستەنگەكان".

یەكێك لەو شێخانەی پەیامەكەی ئۆجەلانی رەتكردۆتەوە ناوی شێخ موزر حەماد ئەسعەدە و وەك سەرۆكی ئەنجومەنی باڵای هۆزەكانی سوریا خۆی بە رۆژنامەی "شەرقلولئەوسەت" ناساندووە و دەڵێت "ئۆجەلان دڵنیا دەكەینەوە كە خەڵكی ناوچەی جزیرە و فوڕات بەتەواوی پەیامەكەی رەتدەكەینەوە و پشتیوانی هەسەدە و حزبەكەشی ناكەین".

ئەو شێخەی قسەی بۆ "شەرقولئەوسەت" كردووە، ئێستا لەهەوڵدایە كۆدەنگی بەشێك لە سەرۆك هۆز و عەشائیرەكانی باكور و رۆژهەڵاتی سوریا كۆبكاتەوە، بەو پاساوەی ناوچەكە 

زۆرینەی عەرەب و موسوڵمانە كانتۆن و دەوڵەتی دیكە دروست ببێت.

دەشڵێت "ئەو سەرۆك هۆزانەی پشتیوانی هەسەدە دەكەن كەمن و نوێنەرایەتی ناوچەكانیان ناكەن، بەتایبەت هۆزەكانی جبور و شەمەر و عكێدات و بو شەعبان".

كاتێكی سەرنجڕاكێش

ئەوەی تێبینی دەكرێـت، نامەكەی ئۆجەلان لەكاتێكدایە گفتوگۆكانی نێوان ئیدارەی خۆبەڕێوەبەری كورد لە رۆژئاوای كوردستان و دەسەڵاتدارانی دیمەشق لە قۆناغێكی چەقبەستوودایە، سەبارەت بە جێبەجێكردنی رێككەوتنی 10 ی ئاداری ئەمساڵ كە لەنێوان ئەحمەد شەرع سەرۆكی سوریا و مەزڵوم عەبدی فەرماندەی گشتیی هەسەدە واژۆكرا.

پەیامەكەی ئۆجەلان پێچەوانەی خواستی توركیا و سوریایە، لەكاتێكدا لە 27 ی شوباتی رابردوو داوای چەكدانان و هەڵوەشاندنەوەی پەكەكەی كرد، بەڵام دەیەوێت لە سوریا پشتیوانی هەسەدە بكرێت و هەر چەك بەدەست بێت، هەروەها ئیدارەی خۆبەڕێوەبەری زیاتر بچەسپێت.

رای پێچەوانەش هەیە

هەرچەندە بەشێك لە سەرۆك هۆزەكان و شێخەكانی عەرەب دژی پەیامەكەی ئۆجەلان وەستاونەتەوە و تەنانەت بەشێكیان بە "ساختە" ناوی دەبەن. بەڵام بەشێك لە سەرۆك هۆز و شێخە عەرەبەكان پشتیوانی پەیامەكەی ئۆجەلان دەكەن، یەكێك لەوانەش "هەفل عەبود جەدعان" ە كە وەك یەكێك لە شێخەكانی هۆزی "عكێدات" لە شاری زیبانی درێرەزور خۆی ناساندووە و دەڵێت "نامەكە زۆر مانا هەڵدەگرێت، بەتایبەت كە باس لە پتەوكردنی پەیوەندیەكانی هەردوو گەلی عەرەب و كورد دەكات".

هەفل لە نامەیەكدا دەشڵێت "ئێمە وەك عەشائیرە عەرەبەكان جەخت لە پەیوەندی و هاوپەیمانی نێوان كورد و عەرەب دەكەینەوە، كە بنەمایەكی مێژوویی و كۆمەڵایەتی و سیاسییە بۆ بنیاتنانی سوریایەكی دیموكرات و ئارام و یەكگرتوو، وە گرنگیشە پشتیوانی هەسەدە بین كە بڕبڕەی پشتی پاراستنی ناوچەكەیە".

لەلایەكی دیكەوە، بەپێی هەواڵێكی ئاژانسی "هاوار" ی رۆژئاوای كوردستان، نامەكەی ئۆجەلان لەرێگەی لیژنەیەكەوە دەگەیەنرێتە هەموو سەرۆك هۆز و شێخە عەرەبەكانی ناوچەكانی ژێر دەسەڵاتی هەسەدە.

تائێستا ئامارێكی فەرمی ورد نییە سەبارەت بە قەبارەی هۆز و عەشیرەتەكانی سوریا، كە لە پارێزگاكانی حومس، حەما، دێرەزور، رەقە، حەسەكە، سوەیدا و دەرعا و قونەیتەرەن، بەڵام هەڵسەنگاندنەكان باس لەوەدەكەن 25 بۆ 30 هۆز و عەشیرەت هەن.

سوپای رژێمی پێشووی سوریا لەسەرەتای سەرهەڵدانی ناڕەزایەتیەكانی سوریا لە ساڵی 2011 لە بەشێكی زۆری ناوچەكانی باكور و رۆژهەڵاتی سوریا كشایەوە، دواتر و لە ساڵی 2014 هێزە كوردیەكان بەتایبەتیش یەپەگە كە دواتر بووە بەردی بناغەی هەسەدە، چەندین ناوچەیان كۆنترۆڵ كرد، تا لە ساڵی 2015 هەسەدە دامەزرا و بەشێكی زۆری پێكهاتەكانی باكور و رۆژهەڵاتی سوریای لەخۆگرت، دواتریش وەك هاوپەیمانی ئەمەریكا بۆ شەڕی داعش ناسرا، هەرچەندە تائێستاش توركیا دژایەتی دەكات و بە درێژكراوەی پەكەكەی ناودەبات، داواش دەكات هاوشێوەی پەكەكە پرۆسەی چەكدانان جێبەجێ بكات، بەڵام بەرپرسانی هەسەدە ئەوە رەتدەكەنەوە.

ناوچەكانی ژێر دەسەڵاتی هێزەكانی سوریای دیموكرات "هەسەدە" بەشێكی زۆری كێڵگە نەوتیی و غازیەكانی تێدایە، لەگەڵ ئەوەش بووەتە سەبەتەی خۆراكیی سەرەكیی سوریا.