کاردانەوە خێراکان؛ لیستی تیرۆری ئەمەریکا گروپە چەکدارە شیعەکان دەباتە کۆبوونەوە داخراوەکان

سبەی 

لە ساتێکی سەرەکیی ململانێی ئەمەریکا و ئێران لە عێراق، واشنتۆن بۆمبێکی سیاسی و ئەمنیی تەقاندەوە و چوار گروپی چەکداری دیاری عێراقی وەک "رێکخراوی تیرۆریستی" دەستنیشان کرد. ئەمەش  قۆناغێکی نوێی گرژییە، کە دەتوانێت وڵات بگەڕێنێتەوە بۆ کەشێکی رووبەڕووبوونەوەی ئاشکرا. 

ئەو گروپانە کە خوویان بە بژاردەکانی هێرشکردن گرتووە، خۆیان بۆ کۆبوونەوەیەکی بەپەلە ئامادە دەکەن، کە رەنگە وەڵامدانەوەیەک بۆ بڕیارەکەی ئەمەریکا بخاتەڕوو، لە کاتێکدا هۆشدارییەکان لە هێرشێکی نزیکی ئیسرائیل لە ناو خاکی عێراقدا روو لە زیادبوونە.

سەرچاوە ئاگادارەکان بە پێگەی عالەم جەدیدیان راگەیاندووە "لە ماوەی دوو رۆژی داهاتوودا لیژنەی هەماهەنگی مقاوەمە (گروپە چەکدارە شیعەکان) کۆبوونەوەیەک ئەنجام دەدات، پێشبینیش دەکرێت کۆبوونەوەکە بکەوێتە ئێوارەی شەممەوە".

لە کۆبوونەوەکەدا بڕیارەکەی واشنتۆن تاوتوێ دەکرێت

سەرچاوەکان ئاماژەیان بەوەشکردووە، "لە کۆبوونەوەکەدا بڕیارەکەی واشنتۆن بۆ پۆلێنکردنی چوار گروپی چەکداری عێراقی وەک رێکخراوی تیرۆریستی تاوتوێ دەکرێت، بە ئامانجی لێکۆڵینەوە لە کاردانەوەکان و پەرەپێدانی میکانیزمەکان بۆ وەڵامدانەوەیان".

ئەمەش هاوکاتە لەگەڵ لێدوانێکی کازم فەرتوسی وتەبێژی کەتەیبەکانی سەید شوهەدا سەبارەت بە بڕیارەکەی ئەمەریکا و وتی: "ئەمەریکا سزای هەرکەسێک دەدات کە دژایەتی سیاسەتەکانی بکات، ئێمە هیوامان بەو جۆرە سزایانە لەلایەن ئەمەریکاوە نەدەخواست، بەڵام پێدەچێت هەرکەسێک سیاسەتەکانی ئیسرائیل رەت بکاتەوە، سزا بدرێت".

فەتوسی لە درێژەی قسەکانیدا وتی: "ئێمە شانازی دەکەین ئەگەر هۆکاری سزادانمان رەتکردنەوەی دەوڵەتی ئیسرائیل و داگیرکاری ئیسرائیل بێت و هەڵوێست و لێدوانی فەرمیمان دەبێت سەبارەت بەو سزایانە".

بزووتنەوەی نوجەبا، کە یەکێکە لەو گروپەی کە لەلایەن وەزارەتی دەرەوەی ئەمەریکاوە وەک "رێکخراوی تیرۆریستی" دەستنیشانکراون، لێدوانی لەسەر ئەو بڕیارە دا. عەبدولقادر کەربەلایی، فەرماندەی سەربازی بزووتنەوەی نوجەبا بڕیارەکەی ئەمەریکای بە بێ بەها وەسفکردو رایگەیاندووە، "پیلانەکانتان دابڕێژن و هەوڵبدەن بۆ ئامانجەکانتان. هەموو بڕیارەکانتان لای ئێمە، بێ بەهان". 

لە بەرامبەردا ئەبو عەلی کەروی، فەرماندە لە لیواکانی ئیمام عەلی رایگەیاند: ئەمەریکا لە رێبازە دوژمنکارانەکەی بەردەوامە و دەشڵێت: بە هەموو تواناوە پێیان دەڵێین، لە رێگەی نزیکبوونەوەی عەلی و خۆڕاگریی حوسێن و بوێری و تێگەیشتنی عەباس و ئیرادەی موهەندیس و سولەیمانی، سەرکەوتو دەبین.

ئەمەریکا  چوار گروپی عێراقی وەک "رێکخراوی تیرۆریستی بیانی" دەستنیشان کردووە

وەزارەتی دەرەوەی ئەمەریکا رۆژی چوارشەممە رایگەیاند:کە چوار گروپی عێراقی وەک "رێکخراوی تیرۆریستی بیانی" دەستنیشان کردووە. ئەم گروپانە بریتین لە بزووتنەوەی نوجەبا، کاتیبەکانی سەید شوهەدا، ئەنسارئەڵڵا ئەوفیا و کەتیبەکانی ئیمام عەلی، هەنگاوێک کە دەرگا بەڕووی کاردانەوەی سیاسی و ئەمنی لە ناوخۆ و دەرەوەی عێراق دەکاتەوە.

ئەمە پێشهاتێکی نوێیە، دەتوانێت رێگا بۆ قۆناغێکی مەترسیدارتر خۆش بکات. هاوکات چاودێرانی عێراقی پێشبینی دەکەن ئەم هەنگاوەی ئێستای ئەمەریکا، رەنگدانەوەی رووبەڕووبوونەوەیەکی پێشبینیکراو بێت، یان رەنگە گڵۆپی سەوزی ئەمەریکا بێت بۆ ئیسرائیل بۆ لێدانی سەربازی لەو گروپانە، بەتایبەتی کە دەکەونە ناو لیستی ئامانجەکانی حکومەتەکەی بنیامین نەتەنیاهۆ.

هێرشی چاوەڕوانکراوی ئیسرائیل

جۆ ویڵسن سیناتۆری کۆماریخوازی ئەمەریکا لە پۆستێکدا لە ئەکاونتی ئێکس "سوپاسی خۆی بۆ دۆناڵد ترەمپ سەرۆکی ئەمەریکا، مارکۆ روبیو، وەزیری دەرەوەی ئەمەریکا و سێباستیان گۆرکا، بەڕێوەبەری بەرەنگاربوونەوەی تیرۆر لە کۆشکی سپی دەربڕی، بۆ پشتگیریکردنیان بۆ ئەم هەنگاوە".

ئاماژەی بەوەشکرد، "ئەم دەستنیشانکردنە ئامرازی یاسایی بۆ داواکارانی گشتی ئەمەریکا دەڕەخسێنێت، بۆ وشککردنی ئەو سەرچاوە داراییانەی کە ئەو گروپانە بەکاریدەهێنن"، جۆ ویڵسن داوای دەستنیشانکردنی رێکخراوی بەدریش دەکات، کە بە بۆچوونی ئەو سیناتۆرە گەورەترین رێکخراوی تیرۆریستییە لە عێراقدا کە لەلایەن ئێرانەوە پاڵپشتی دەکرێت، چونکە رۆڵی سەرەکی دەگێڕێت لەوەی کە بە پەرەسەندنی کاریگەریی و هەژموونی ئێران لە ناوخۆی عێراقدا وەسفیکردووە.

ئەمەش دوای ئەوە هات، کە ئەمەریکا لە رێگەی جوشوا هاریس بەرپرسی کاروباری ئەمەریکا لە بەغداد هۆشداری داوە، لە ئەگەری ئەنجامدانی هێرشی سەربازی ئیسرائیل لە ناو خاکی عێراقدا و پێکانی ئۆفیسەکانی پەیوەست بە گروپە چەکدارەکان.

رادەستنەکردنی چەکەکان

لە 17ی ئابدا، لە چاوپێکەوتنێکی تەلەفزیۆنیدا مەهدی کەعبی، ئەندامی بزووتنەوەی نوجەبا، دووپاتیکردەوە کە "چەکەکانی مقاوەمە رادەست ناکرێن، نە لە لوبنان و نە لە عێراق"، ئەوەش ئاماژەیە بۆ ئەوەی "چەکەکانی گروپەکان تەنانەت لەگەڵ کشانەوەی ئەمەریکییەکان دەمێننەوە".

بەپێی وتەی سەرچاوەیەکی بەرپرسیار لە یەکێک لە گروپەکان، سەرجەم گروپەکان پابەندن بەم پرەنسیپە، بەو پێیەی هیچ چارەسەرێک بۆ "دووفاقی" فشاری ئەمەریکا نابینن جگە لە پاراستنی هەڵوێستی خۆیان و "رووبەڕووبوونەوە ئەگەر پێویست بکات".

ئەمەش لەکاتێکدایە قۆناغی یەکەمی رێککەوتنی کشانەوەی هێزەکانی هاوپەیمانی نێودەوڵەتی لە عێراق دەستیپێکردووە. یەکەمین هێزی ئەمەریکی لە بنکەی عەین ئەسەد لە ئەنبار بەرە و هەولێر بەڕیکەوتن، هەندێکیان رویانکردە کوەیت، هەندێکیشیان دەچنە بنکەی تەنەف لە سوریا. ئەم کشانەوە قۆناغبەندییە تا مانگی ئەیلولی 2026 بەردەوام دەبێت.