بەرپرسێكی پێشووی سی ئای ئەی: بەرپرسانی ئێران هەڵنایەن و تا دوا ساتەكان شەڕ دەكەن

سبەی

بەرپرسێكی پێشووی سی ئای ئەی بە ماڵپەرێكی ئۆپۆزسیۆنی ئێرانی راگەیاندووە" كۆماری ئیسلامی ئێران بە هۆی شەڕەوە ماندوو و لاواز بووە، بەڵام هێشتا حكومەت توانای سەركوتكردنی هاوڵاتیانی وڵاتەكەی هەیە و هەر جۆرە جووڵەیەك بۆ رووخاندنی، سەركوت دەكات".

"بەرپرسانی كۆماری ئیسلامی ئێران تا دواساتەكان شەڕ دەكەن"

ریول مارك گرشت، بەرپرسی پێشووی ئێران لە دەزگای ناوەندی هەواڵگریی ئەمەریكا (CIA) لە گفتوگۆیەك لەگەڵ ماڵپەری ئێران ئینتەرنەشناڵی ئۆپۆزسیۆنی ئێرانی رایگەیاند:" بەرپرسانی ئێران بەپێچەوانەی دەسەڵاتدارانی پێشووی ئێران بەرەو ئەوروپا هەڵنایەن و تا دوا ساتەكان شەڕ دەكەن".

ئەو بەرپرسەی پێشووەی سی ئای ئەی پێی وایە "كۆماری ئیسلامی ئێران بەدەست ناسەقامگیری بنەڕەتییەوە دەناڵێنێت و شەڕ لەگەڵ ئەمەریكا و ئیسرائیل لە مانگی حوزەیران وەك شۆكێك بووە بۆ ئەو وڵاتە، ئێستاش بە قووڵی گومانی لە دزەكردنی هەواڵگریی دوژمنەكانی هەیە".

"پێگەی رێبەری كۆماری ئیسلامی ئێران لاواز بووە"

گرشت لە بەشێكی دیكەی چاوپێكەوتنەكەیدا باسی لەوە كردووە، " شەڕی 12 رۆژە لەگەڵ ئیسرائیل گورزێكی كوشندە بووە بۆ سەر رێبەری كۆماری ئیسلامی ئێران، پێگەی ئەو رێبەرە تەمەن 86 ساڵە لاواز بووە و لە دابەزیندایە".

بەرپرسەكەی پێشووی هەواڵگری ئەمەریكا دەشڵێت" گومان هەیە لەوەی خامنەیی لە ئێستادا وڵاتەكە بەڕێوە بەرێت".

ئەو بەرپرسەی پێشووی دەزگای هەواڵگری ئەمەریكا كە ماوەیەكی زۆر لە سی ئای ئەی بەرپرسی ناسینەوە و دامەزراندنی هاووڵاتیانی ئێرانی بووە بۆ هاوكاریی هەواڵگریی دەڵێت "پێویست ناكات ژمارەیەكی زۆر لە هێزەكانی ئیسرائیل بەشداربن بۆ تیرۆركردنی فەرماندە باڵاكان".

" پرسی ئەتۆمی ئێران بەچارەسەرنەكراوی ماوەتەوە"

سەبارەت بە پرسی بەرنامە ئەتۆمییەكەی ئێران، گرشت ئاماژە بۆ ئەوە دەكات "سەرەڕای بانگەشەكانی دۆناڵد ترەمپ بۆ لەناوچوونی دامەزراوە ئەتۆمییەكانی ئێران، بەڵام تا ئێستا پرسی ئەتۆمی ئێران بەچارەسەرنەكراوی ماوەتەوە".

دەشڵێت" لە كاتێكدا گەمارۆ نێودەوڵەتییەكان ئابوریی وڵاتەكەیان پەكخستووە و تێچووی ژیان بەرز بووەتەوە و پشتیوانی گشتیی لە حكومەت لەناو هاولاتیانی ئێرانیدا دابەزیوە، خامنەیی و بەرپرسانی باڵای دیكە لە كۆماری ئیسلامی ئێران پێشمەرجەكانی ئەمەریكایان بۆ دەستپێكردنەوەی دانوستانەكان رەتكردووەتەوە".

"حكومەتی ئێران تا ئەو كاتەی توانای سەركوتی بمێنێت لە دەسەڵات دەمێنێتەوە"

بە وتەی گرشت "كۆماری ئیسلامی ئێران دەزانێت كە پێگەیان لەناو خەڵك بە شێوەیەكی بەرچاو لاواز بووە ، بەڵام  حكومەت تا ئەو كاتەی بتوانێت لە رێگەی هێزەكانییەوە خەڵك سەركوت بكات لە دەسەڵاتدا دەمێنێتەوە".

" بە ئەگەرێكی زۆرەوە ئەمەریكا لە رێگەی گوشارەوە رێبازی رووخاندنی كۆماری ئیسلامی ئێران ناگرێتەبەر، لە ئێستادا هیچ فشارێكی جددی بۆ گۆڕینی حكومەتی ئێران نییە، ترەمپ ستراتیجێكی بۆ رووخانی نییە و رەوتە سیاسییەكانی ئەمەریكاش وەك رابردوو دژی رێبازێكی لەو شێوەیەن". گرشت وا دەڵێت.

ئەو بەرپرسەی پێشووی سی ئای ئەی جەخت لەوە دەكاتەوە "رەنگە رووداوی چاوەڕواننەكراو لە هەر ئاراستەیەكەوە سەرهەڵبدات و پێشبینی نەكراوبوونی رووداوەكان حكومەتی ئێران نیگەران دەكات".

"حكومەتی ئێران كاتێك دەرووخێت كە دابەشبوون لەناو هێزە ئەمنییەكانی پەرەبستێنێت"

بە وتەی گرشت، "حكومەتی ئێران شەرعیەتی خۆی لەدەستداوە، بەڵام دەسەڵاتە سەركوتكەرانەكەی وەك خۆی ماوەتەوە، گۆڕانكاری راستەقینەی حكومەت نە لە رێگەی گوشاری دەرەكی و نە لە رێگەی گواستنەوەی ئاشتیانە دێت، بەڵكو تەنها كاتێك دەبێت، دابەشبوون لەناو هێزە ئەمنییەكانی دڵسۆزی حكومەت پەرەبستێنێت".