ئەڵمانیا دیپۆرتکردنەوەی تاوانبارە ئەفغانی و سورییەکان چڕدەکاتەوە

سبەی

لە هەنگاوێکی نوێ بە ئاراستەی بەرەنگاربوونەوەی تاوانکاری و پاراستنی زیاتری ئاسایشی وڵاتەکەیان، حکومەتی ئەڵمانیا لە هەوڵدایە بۆ چڕکردنەوەی دیپۆرتکردنەوەی تاوانبارە ئەفغانی و سورییەکان بۆ وڵاتەکانیان، ئەویش دوای بەسەربردنی ماوەی زیندانیکردنیان.

ئەلێکساندەر دۆبریندت وەزیری ناوخۆی ئەڵمانیا رایگەیاند: لە هەوڵداین بۆ دیپۆرتکردنەوەی ئەو پەنابەرە ئەفغانی و سورییانەی کە تاوانیان ئەنجامداوە.

لە وتارێکی لە کۆنفرانسی ناوچەیی پارتی دیموکراتی مەسیحی لە هەرێمی ساکسۆنیا لە رۆژهەڵاتی ئەڵمانیا، وەزیری ناوخۆی حکومەتی ئەو وڵاتە رایگەیاند: لە کارداین بۆ رێکخستنی خشتەی گەشتە فرۆکەوانییەکان بەمەبەستی ناردنەوەی ئەو پەنابەرە ئەفغانی و سورییانەی تاوانیان ئەنجامداوە و ئێستا لە زینداندان.

دۆبریندت ئاشکرایکردووە حکومەتی ئەڵمانیا لە گفتوگۆدایە لەگەڵ لایەنی سوری و ئەفغانی، بۆئەوەی دیپۆرتکردنەوەی تاوانبارەکان بە بێ هیچ کێشەیەک و بەربەستێک بەڕێوەبچێت.

لە بەشێکی دیکەی وتارەکەیدا ئەلێکساندەر دۆبریندت ئاماژەی بۆ ئەوە کردووە، "ئەڵمانییەکان دەیانەوێت دڵنیاببنەوە، کە تاوانبارەکان جارێکی تر لە شار و ناوچەکانیان نابیننەوە. بەڵام ئێمە دڵنیاییان پێدەدەین، کەسانی تاوانبار لە ئەڵمانیادا جێگەیان نابێتەوە و دەبێت وڵاتەکەمان بەجێبهێڵن".

هاوکات باسیشی لەوە کردووە، لەسەر هەنگاوەکانیان بەو ئاراستەیەدا بەردەوام دەبن و پەشیمانیش نابنەوە، دیپۆرتکردنەوەی تاوانبارانیش بۆ سوریا و ئەفغانستان، دورخستنەوەی ئەو تاوانبارانەیە، کە مەترسین بۆ سەر کۆمەڵگەی ئەڵمانی.

لە کۆتاییدا دووپاتیکردووەتەوە، تاوانباران دوای بەسەربردنی ماوەی سزاکانیان لە زینداندا، بۆ وڵات و شارە رەسەنەکانی خۆیان دەگەڕێندرێنەوە.

هاوپەیمانی دەسەڵاتداری ئەڵمانیا، لە نێوان پارتی دیموکراتی مەسیحی و یەکێتیی مەسیحییەکانی باڤاریا دروستبووە، کە بە یەکێتیی مەسیحی ناسراوە و فریدریچ میرتس راوێژکاری ئەڵمانیا سەرۆکایەتی دەکات.

هاوپەیمانییەکە لە رێگەی حکومەتەوە و لە مانگی ئەیلولی ساڵی رابردوەوە رێوشوێنەکانی دژ بە کۆچی نایاسایی توندترکردووەتەوە، بەپێی ئامارەکانیش هەنگاوەکانی حکومەتی ئەڵمانیا، ژمارەی کۆچبەرانی نایاسایی بەشێوەیەکی بەرچاو لەو وڵاتەدا کەمکردووەتەوە.