لە چەند كاتژمێری داهاتوودا كارەبا دەگەڕێتەوە؛ مەسرور بارزانی: لەگەڵ هاوبەشەكانمان كاردەكەین بۆ پاراستنی گەلەكەمان

سبەی

سەرۆكی حكومەتی هەرێمی كوردستان پەیامێكی بڵاوكردەوە و رایگەیاند،" لەگەڵ كۆمپانیای دانا گاز گەیشتینە ڕێككەوتن بۆ دووبارە دەستپێكردنەوەی بەرهەمهێنان و گەڕاندنەوەی كارەبا لە چەند كاتژمێری داهاتوودا". دەشڵێت " لەگەڵ هاوبەشە نێودەوڵەتییەكانمان كار دەكەین لە پێناو دابینكردنی پێداویستییەكانی پاراستنی گەلەكەمان و ژێرخانی ئابووری و وەبەرهێنانمان".

مەسرور بارزانی سەرۆكی حكومەتی هەرێمی كوردستان پەیامێكی بڵاوكردەوە و رایگەیاند:" سوپاسی خەڵكی كوردستان دەكەم بۆ پشوودرێژی و خۆڕاگرییان كە لە دوای هێرشە تیرۆریستییەكەی چەند رۆژی ڕابردوو بۆ سەر ژێرخانی گازی هەرێمی كوردستان، تووشی كەمیی كارەبا بوونەوە. خەڵكی نیشتیمانپەروەری كوردستان بەگشتی ئەم هێرشەیان شەرمەزار كرد كە دژی بەرژەوەندیی هەموو هاووڵاتییان بوو و بووە هۆی بڕینی كارەبای ملیۆنان كەس لە هەرێمی كوردستان و عێراقدا".

"لەگەڵ كۆمپانیای دانا گاز گەیشتینە رێككەوتن"

مەسرور بارزانی راشیگەیاند:"ئەمڕۆ لەدوای ئامادەكارییە تەكنیكییەكان، لەگەڵ كۆمپانیای دانا گاز گەیشتینە رێككەوتن بۆ دووبارە دەستپێكردنەوەی بەرهەمهێنان و گەڕاندنەوەی كارەبا لە چەند كاتژمێری داهاتوودا. لەگەڵ بەڕێوەبەرایەتی كۆمپانیاكە قسەم كرد و سوپاسی بەڕێوەبەرایەتی و گشت كارمەندەكانم كرد بۆ خۆڕاگری و ئیرادەی بەهێزیان. ئەمە یازدەمین هێرشە بۆ سەر كێڵگەكە و ئامادەیی ئەوانیش بۆ بەردەوامبوون لەسەر كارەكەیان، نیشاندەری خۆڕاگرییانە. دڵنیاشم كردنەوە كە لەگەڵ حكومەتی فیدراڵ، هەموو هەوڵێك دەدەین بۆ كۆتاییهێنان بە هێرشە تیرۆریستییەكان و بەسزاگەیاندنی ئەنجامدەرانی هێرشەكە و ڕێگەگرتن لە دووبارەبوونەوەی لە داهاتوودا. لە هەمان كاتدا لەگەڵ هاوبەشە نێودەوڵەتییەكانمان كار دەكەین لە پێناو دابینكردنی پێداویستییەكانی پاراستنی گەلەكەمان و ژێرخانی ئابووری و وەبەرهێنانمان".

"ئەم هێرشە نابێت بەبێ لێپرسینەوە تێپەڕێت"

"ئەم هێرشە نابێت بەبێ لێپرسینەوە تێپەڕێت و نابێت هێرشەكان ببنە رووداوی ئاسایی، دیار بوو كە دوژمن و ناحەزان و بەكرێگیراوەكانیان چاویان بە پێشكەوتنی كوردستان و ئاسوودەبوونی خەڵك هەڵنایەت و بە شێوەیەكی ترسنۆكانە و نامەردانە، ئەم هێرشەیان كرد و دژی ڕووناكی وەستانەوە و هەوڵیان دا تاریكی بگەڕێننەوە، لەگەڵ سەرۆك وەزیرانی فیدراڵ بەرێز محەممەد شیاع سودانی باسمان كردووە كە دەبێت ئەنجامدەرانی ئەم هێرشە هەر لایەن و گروپێك بن و لە هەر كوێ بن لێپرسینەوەیان لەگەڵدا بكرێت و ڕادەستی یاسا بكرێن. ئەوە تاكە رێگرییە و چاوەڕوانین ڕێوشوێنی جیددی و كردارەكی بگیرێتەبەر. چونكە عێراق ناتوانێت وەبەرهێنانی بیانی بۆ خۆی رابكێشێت لە كاتێكدا میلیشیا و گرووپە چەكدارییە لە یاسا دەرچووەكان و مافیا گەندەلەكان بە بێ هیچ سزا و لێپێچینەوەیەك، هێرش بكەنە سەر ژیرخانی ئابووری وڵات و دڵیان بە ئازاری خەڵكی كوردستان خۆش بكەن". مەسرور بارزانی وا دەڵێت.

"داوا لە خەڵكی كوردستان دەكەم بەردەوام بن لە پشتگیریكردنی حكومەتەكەیان"

لە كۆتایی پەیامەكەی سەرۆكی حكومەتی هەرێمی كوردستاندا هاتووە:"سوپاسی تیمی تەكنیكیی هەردوو وەزارەتی سامانە سروشتییەكان و وەزارەتی كارەبا و هێزە ئەمنییەكان دەكەم بۆ كاركردن و ماندووبوونیان لە چەند ڕۆژی رابردوودا، دووپاتی دەكەینەوە، ئەم هێرشە ترسنۆكانە لە باشتركردنی ژیانی هاووڵاتیان نامانوەستێنن. ئێمە بەردەوام دەبین لە كاركردن و درێژەدان بە كاروانی پێشكەوتن و ئاوەدانی و داوا لە خەڵكی كوردستان دەكەم بەردەوام بن لە پشتگیریكردنی حكومەتەكەیان".

هێرشەكەی كۆرمۆر

هێرشەكەی سەر كۆرمۆر كاتژمێر 11:30ی درەنگانی شەوی چوارشەممە 26 تشرینی دووەمی 2025 لە رێگەی موشەكەوە ئەنجامدرا كە بەهۆیەوە بەرهەمهێنانی غاز بەتەواوەتی لە كێڵگەكە وەستا و كوژانەوەی گشتی كارەبا لە هەرێمی كوردستان روویدا، بەو پێیەی 80%ی وێستگەكانی كارەبا پشت بە بەرهەمی غازی كێڵگەكە دەبەستن.

هەر بەهۆی هێرشەكەوە ناردنی 1200 مێگاوات كارەبا لە هەرێمی كوردستانەوە بۆ عێراق راگیرا، ئەوەش بەپێی راگەیەنراوێكی وەزارەتی كارەبای عێراق.

بەڵێنی وەزیری كارەبا

كەمال محەمەد وەزیری كارەبای هەرێمی كوردستان رۆژی چوارشەممە پێشبینیكرد لەماوەی 24 بۆ 48 كاتژمێردا دۆخی كارەبا ئاسایی بێتەوە، ئەگەر هێرشەكە تەنها كۆگای هەڵگرتنی غازی كردبێتە ئامانج، بەڵام دوای نزیكەی 48 كاتژمێر لە هێرشەكە هێشتا رەوشی كارەبا ئاسایی نەبووەتەوە. 

بەپێی راگەیەنراوێكی كۆمپانیای دانەغاز، هێرشەكە كە لە رێگەی موشەكەوە ئەنجامدرا كۆگایەكی عەمباركردنی غازی شلی لە كێڵگەكە بە ئامانج گرتووە و هیچ زیانێكی گیانی لێنەكەوتەوە، بەڵام زیانی گەورەی بە كێڵگەكە گەیاند و پرۆسەی بەرهەمهێنان بە مەبەستی كوژاندنەوەی ئاگرەكە بەتەواوەتی راگیرا.

رۆژی هەینی وەزارەتی كارەبا لە راگەیەنراوێكدا رایگەیاند، هەوڵەكان چڕكراونەتەوە بۆ ئەوەی بەزووترین كات كارەبا بگەڕێتەوە، بەبێ ئەوەی هیچ وادەیەكی نوێ بۆ ئاسایی بوونەوەی دۆخەكە رابگەیەنێت.

بەهۆی هێرشەكەوە تەنها 1300-1400  مێگاوات كارەبا لە تۆڕی كارەبای هەرێمی كوردستاندا ماوەتەوە كە لەلایەن دوو كێڵگەی كارۆئاوی دوكان و دەربەندیخان و ئەو وێستگانەی دیكەوە بەرهەمدەهێنرێن كە بە غاز كارناكەن. پێدانی كارەباش بە هاوڵاتییان لە 24 كاتژمێرەوە بۆ 5-6 كاتژمێر كەمبووەتەوە.