ناردنى غاز لە کۆرمۆرەوە دەستیپێکردەوە

سبەى

ناردنى غاز لە کێڵگەى کۆرمۆرەوە بۆ وێستگەکانى کارەبا دەستیپێکردەوە و وەزارەتى کارەبا دەلێت لە 24 کاتژمێردا کارەبا ئاسایی دەبێتەوە.

وەزارەتی کارەبا لە راگەیەنراوێکدا ئاماژەى بەوەکردووە، کاتژمێر (2:00) بەرەبەیانی ئەمڕۆ، دەست بە گواستنەوەی گاز لە کێڵگەی کۆرمۆر بۆ وێستگەکانی بەرهەمهێنانی کارەبا کرا.

دەشڵێت، وێستگەکانی کارەبا بەگەڕ دەخرێنەوە و لە ماوەی 24 کاتژمێردا، دۆخى کارەبا بە تەواوەتی ئاسایی دەبێتەوە.

دەستکردن بە ناردنەوەى غاز دواى سێ رۆژ هات لە وەستانى بەرهەمهێنانى غاز لە مێڵگەى کۆرمۆر و ناردنى بۆ وێستگەکانى بەرهەمهێنانى کارەبا بەهۆى هێرشى موشەکییەوە.

درەنگانى شەوى رابردوو مەسرور بارزانى سەرۆكی حكومەتی هەرێمی كوردستان رێککەوتنى لەگەڵ لەگەڵ كۆمپانیای دانەگاز راگەیاند، بۆ دووبارە دەستپێكردنەوەی بەرهەمهێنان و گەڕاندنەوەی كارەبا.

هێرشەكەی كۆرمۆر

هێرشەکەى شەوى چوارشەممەى سەر کێڵگەى کۆرمۆر 80%ى بەرهەمهێنانى کارەباى لە هەرێمى کوردستان کەمکردەوە. لەکۆى 13 وێستگەى بەرهەمهێنانى کارەبا، پێنج وێستگەى سەرەکییان بە غاز کاردەکەن و لە کۆرمۆرەوە بە بۆرى غازیان بۆ راکێشراوە کە بریتین لە وێستگەکانى چەمچەماڵ، بازیان، هەولێر و دهۆک وخورمەڵە.

ئەو وێستگانە بەگشتى نزیکەى سێ هەزار مێگاوات کارەبا بەرهەمدەهێنن و لەدواى هێرشەکەى سەر کۆرمۆرەوە لەکارکردن وەستاون بەو پێیەى بەرهەمهێنانى غاز لە کۆرمۆر راگیراوە.

بەڵێنی وەزیری كارەبا

كەمال محەمەد وەزیری كارەبای هەرێمی كوردستان رۆژی چوارشەممە پێشبینیكرد لەماوەی 24 بۆ 48 كاتژمێردا دۆخی كارەبا ئاسایی بێتەوە، ئەگەر هێرشەكە تەنها كۆگای هەڵگرتنی غازی كردبێتە ئامانج، بەڵام لەو ماوەیەدا رەوشى کارەبا ئاسایی نەبووەوە.

بەپێی راگەیەنراوێكی كۆمپانیای دانەغاز، هێرشەكە كە لە رێگەی موشەكەوە ئەنجامدرا كۆگایەكی عەمباركردنی غازی شلی لە كێڵگەكە بە ئامانج گرتووە و هیچ زیانێكی گیانی لێنەكەوتەوە، بەڵام زیانی گەورەی بە كێڵگەكە گەیاند و پرۆسەی بەرهەمهێنان بە مەبەستی كوژاندنەوەی ئاگرەكە بەتەواوەتی راگیرا.

رۆژی هەینی وەزارەتی كارەبا لە راگەیەنراوێكدا رایگەیاند، هەوڵەكان چڕكراونەتەوە بۆ ئەوەی بەزووترین كات كارەبا بگەڕێتەوە، بەبێ ئەوەی هیچ وادەیەكی نوێ بۆ ئاسایی بوونەوەی دۆخەكە رابگەیەنێت.

بەهۆی هێرشەكەوە تەنها 1300-1400  مێگاوات كارەبا لە تۆڕی كارەبای هەرێمی كوردستاندا ماوەتەوە كە لەلایەن دوو كێڵگەی كارۆئاوی دوكان و دەربەندیخان و ئەو وێستگانەی دیكەوە بەرهەمدەهێنرێن كە بە غاز كارناكەن. پێدانی كارەباش بە هاوڵاتییان لە 24 كاتژمێرەوە بۆ 5-6 كاتژمێر كەمبووەتەوە.