ئەم هەفتەیە یەکلایی دەکرێنەوە؛ کۆمسیۆن هۆکارى زیادبوونى تانەکانى سەر ئەنجامى هەڵبژاردن دەخاتەڕوو

سبەى

کۆمسیۆنى باڵاى سەربەخۆى هەڵبژاردنەکان رایگەیاند، ژمارەى تانەکانى کاندید و قەوارە سیاسیەکان لە ئاستى پێشبینیکراودایە و مەترسی بۆ سەر رێڕەوى پێکهێنانى کابینەى نوێ دروستناکەن.

عیماد جەمیل سەرۆکى تیمى راگەیاندنى کۆمسیۆن رایگەیاند، کۆمسیۆن پێشبینى دەکرد ژمارەى تانەکان بگاتە ئاستى ئێستا، لە هەڵبژاردنى 2021 یش نزیکەى 1400 تانە پێشکەشکران سەرەڕاى ئەوەى 3300 کاندید هەبوو، کە نزیکەى نیوەى ژمارەى کاندیدەکانى هەڵبژاردنى ئەمساڵ بوو.

وتیشى بەرزبوونەوەى ژمارەى تانەکان پەیوەستە بە نەبوونى رۆشنبیرى قبوڵکردنى دۆڕان لاى هەندێ کاندید، کە پەنا بۆ پێشکەشکردنى تانە دەدەن لەگەڵ راگەیاندنى ئەنجامى هەڵبژاردن، ئەوەش کاتێک دەنگەکانیان لەگەڵ پێشبینییەکانیان یەکناگرێتەوە. 

سەرۆکى تیمى راگەیاندنى کۆمسیۆن دەڵێت، زۆربەى تانەکان پەیوەستن بە جیاوازى ژمارەى دەنگەکان بەبێ بوونى بەڵگەى پێویست، لەکاتێکدا کۆمسیۆن شریتى ئەنجامەکانى رادەستى هەموو کاندید و قەوارەکان کردووە.

بەپێی ئامارەکانى کۆمسیۆن، لەماوەى یاسایی تۆمارکردنى تانەدا لەسەر ئەنجامى هەڵبژاردن، 872 تانە پێشکەشکراون.

پێنج شەممەى رابردوو کۆمسیۆن دوایین قۆناغى تانەکانى رەوانەى دەستەى دادوەرى کرد بۆ بڕیاردان لەسەریان.

حەسەن سەلمان راوێژکارى راگەیاندنى کۆمسیۆن رایگەیاند، دەستەى دادوەرى لەماوەى حەوت رۆژدا وەڵامى تانەکان دەداتەوە.

وتیشى زۆربەى تانەکان کاریگەرى لەسەر ئەنجامى هەڵبژاردن دروستناکەن.

 کۆمسیۆنی باڵای هەڵبژاردنەکانی عێراق، ئێوارەی رۆژی دووشەممە (17ـی تشرینی دووەمی 2025) ئەنجامی کۆتایی هەڵبژاردنی خولی شەشەمی ئەنجومەنی نوێنەرانی عێراقی راگەیاند، کە رۆژی سێشەممە (11ـی تشرینی دووەمی 2025) بەرێوەچوو.

کۆمسیۆن دواتر سێ رۆژ دەرفەتیدا بە قەوارە و کاندید و لایەنەکان بۆ پێشکەشکردنی تانەکانیان لەسەر ئەنجامی هەڵبژاردنەکان.

بەپێی رێکارەکان، کۆمسیۆن دواى وەرگرتنیان راسپاردەى هونەرى و یاسایی لەبارەى تانەکانەوە بۆ دەستەى دادوەرى بەرزدەکاتەوە بەمەبەستى سەیرکردنیان. دواتر دەستەى دادوەرى کۆمسیۆن لە ئەنجامى تانەکان یەکلایی دەکاتەوە، پاشان ناوى کاندیدە دەرچووەکان رەوانەى دادگاى فیدراڵى دەکرێن بۆ پەسەندکردنیان.

یەکلانەکرنەوەى تانەکان لەسەر ئەنجامى هەڵبژاردن لەکاتێکدایە، کۆمسیۆن بەردەوامە لە دوورخستنەوەى کاندیدەکان و یەکلایکردنەوەى سکاڵاى لایەنەکان.