رۆحانى بەرانبەر خامنەیی؛ هەڵسەنگاندنى تواناى سەربازى ئێران مشتومڕ دروستدەکات

سبەى

حەسەن رۆحانی، سەرۆک کۆماری پێشترى ئێران زیادەڕەویکردن سەبارەت بە دەسەڵاتی سەربازی ئێران بە "خیانەت" ناودەبات و هۆشداریدا لەوەی ئەم کردەوەیە دەبێتە هۆی لێکدانەوەی هەڵە لە ڕووبەڕووبوونەوەی ئیسرائیل و ئەمەریکادا.

ماوەیەکە لەناو بەرپرسانی باڵای کۆماری ئیسلامی ئێران سەبارەت بە دۆخی وڵاتە و هەروەها شکست یان سەرکەوتن لە جەنگی 12 رۆژەی دژ بە ئیسرائل ناکۆکی و لێدوانی جیاواز هەیە و بەشیک لە شارەزایانی سیاسیی دۆخەکە بە جۆرێک لە دووبەرەکی لەناو دەسەڵاتدارانی ئێران باس دەکەن.

لەو نێوانەشدا حەسەن روحانی سەرۆک کۆماری پێشووتری ئێران کە بۆ ماوەی هەشت ساڵ سەرۆکایەتی وڵاتەکەی بەدەستەوە بووە دەستی کردوە بە رەخنەی توند و بەبێ ناو هێنانى عەلی خامنەیی ڕێبەری کۆماری ئیسلامی ئێران ناوبراو بە لێکدانەوەی هەڵە و هۆکارى دۆخی ئێستا تۆمەتبار دەکات.

هەر لەو پەیوەندییەدا ماڵپەڕی حەسەن ڕۆحانی ڕۆژی شەممە 29ی تشرینی دوەم، ڤیدیۆی کۆبوونەوەیەکی ئەم دواییانەی سەرۆکی پێشووتری ئێرانی بە ئامادەبوونی وەزیر و جێگرەکانی کابینەکەی بڵاوکردەوە کە تێیدا بە وردی باسى دۆخی ئێستای ئێران و ناوچەکە دەکات.

رۆحانى لە بەشێکی کۆبوونەوەکەدا سەبارەت بە دوایین رووداوەکانی ئێران دەڵێت "دوای پێنج مانگ تێپەڕین بە شەڕی 12 ڕۆژە لەگەڵ ئیسرائیل، هێشتا لە دۆخێکی نە شەڕ و نە ئاشتی داین و هیچ هەستێکی ئاسایش لە وڵاتدا نییە".

لە بەشێکی دیکەی قسەکانیدا سەرۆکی پێشووی ئێران ئاماژە بۆ ئەوە دەکات کە دەستەبەرکردنی ئاسایشێکی درێژ مەودا و ڕەواندنەوەی ترس لە سەرهەڵدانەوەی جەنگ پێویستی بە گەڕاندنەوەی بەرگرییەکی بەهێزە بۆ وڵاتەکە.

دەشڵێت "بەهێزکردنەوەی هێزی بەرگری پێویستی بە بەهێزکردنەوەی دەزگا هەواڵگرییەکان، هاوکاریکردن لەگەڵ دەزگا هەواڵگرییەکانی وڵاتانی دیکە، هاوکاریکردنی هەواڵگری لە لایەن خەڵکەوە هەیە".

سەرۆکی پێشووتری ئێران لە بەشێکی دیکەی قسەکانیشیدا جەختی لەوە کردەوە کە ئاسمانی ناوچەکە لە ئیسرائیلەوە تا ئێران بە تەواوەتی  لەدەستی دوژمندایە.

لە درێژەی قسەکانیدا وتی "ئێمە لە ئێستادا ڕێگرییەکی فراوانمان لە ناوچەکەدا نییە و ئاسمانی وڵاتانی دراوسێی وەک عێراق، سوریا، لوبنان و ئوردن بە تەواوی لە دەستی ئەمریکا و ئیسرائیلدایە".

ئاماژەی بۆ ئەوەش کرد، هێزە سەربازییەکان لە بەرەنگاربوونەوەی هێرشی ئیسرائیل سەرکەوتوونەبووە و هێرشەکە زیانی پێگەیاندین، ئەگەرچی نەیانتوانی لە رووخاندن و گۆڕینی حکومەتدا سەرکەوتووبن و بەشێکی زۆری شکستی دوژمن ئەوە بوو خەڵک لە ئێران یەکگرتووبوون.

لە بەشێکی دیکەی قسەکانیدا رۆحانی بە پێویستى دەزانێت لە ڕیگەی ڕێککەوتن لەسەر بەرنامەی ئەتۆمی ئێران بەرگری بکرێت لە هێرشی سەربازی لەلایەن ئیسرائیل و ئەمەریکا بۆ سەر وڵاتەکەی و کوژرانی فەرماندە سەربازییەکان و گەڕانەوەی سزاکانی نەتەوە یەکگرتوەکان بۆ سەر وڵاتەکەی.

قسەکانی رۆحانی دوای ئەوە هات کە عەلی خامنەیی ڕێبەری کۆماری ئیسلامی لە دوایین پەیامیدا بۆ خەڵک ئێران باسی لە سەرکەوتنی هێزە سەربازییەکانی وڵاتەکەی و شکستی ئیسرائیل و ئەمریکا لە گەیشتن بە ئامانجەکانیان لە هێرش بۆ ئێران کرد.