لە 40% ی پاشماوەكانی عێراق پلاستیكن

سبەی

وەزارەتی ژینگەی عێراق هۆشداری لە رێژەی پاشماوە پلاستیكیەكان دەدات، دەشڵێت گەیشتۆتە ئاستێكی مەترسیدار و دەبێتە هۆی بڵاوبوونەوەی ماددەی شێرپەنجەیی.

وەزارەتی ژینگەی عێراق لە راگەیەندراوێكدا رایگەیاند: عێراق بەدەست بەرزیی رێژەی پاشماوەكانەوە دەناڵێنێت و سیستمی جیاكردنەوە و ریسایكلینی نییە، بەشێوەیەك رێژەی پاشماوەی پلاستیكی 40%ی كۆی پاشماوەكان پێكدەهێنێت، ئەمەش وایكردووە بەشێوەیەكی كراوە بسوتێنرێن و ماددەی دیۆكسینی شێرپەنجەیی لێ دەربچێت.

وەزارەتی ژینگەی عێراق ئاماژەی بەوەشكردووە: پێویستە خۆراك، ئاو و یاریی منداڵان لە مادە پلاستیكییەكان بپارێزرێن، چونكە سەرەڕای ئەوەی عێراق وڵاتێكی نەوتییە، بەڵام پیشەسازیی پترۆكیمیایی لاوازە و زۆربەی پلاستیك هاوردە دەكرێت و تەنها بۆ یەكجار بەكاردەهێنرێت.

"لەسەر راسپاردەی سەرۆكایەتیی ئەنجومەنی وەزیران و وەزارەتی ژینگە، كار بۆ دەركردنی بڕیارێك دەكرێت، بە مەبەستی سنورداركردنی هاوردەكردن و بەكارهێنانی پلاستیكی یەكجار بەكارهاتوو". وەزارەتی ژینگەی عێراق وا دەڵێت.

پلاستیك كێشەیەكی گەورەی پیسبوونە، بەرهەمهێنانی ئاسان و هەرزانە. پاشماوەی پلاستیك گیانلەبەرەكان پیس دەكات و ملیۆنان زیندەوەری دەریایی دەكوژێت.

پلاستیك زیانێكی زۆری هەیە بۆ تەندروستی مرۆڤ و ئاژەڵ. گەردیلە بچووكەكان، كە بە مایكرۆ و نانۆپلاستیك ناسراون، لە خوێنبەرەكان و مێشك و دڵ و ئەندامەكانی زاوزێدا دەبینرێن. ئەم تەنۆلكانە پەیوەندییان بە شێرپەنجە، شەكرە، نەخۆشییەكانی دڵ و تەندروستی ریخۆڵەوە هەیە.

كەیت سپێنسەر كە شارەزایەكی ژینگەییە دەڵێت، توێژینەوەكان جەخت لەسەر ئەو كێشەیە دێرینە دەكەنەوە، كە مرۆڤ خۆی دروستی كردووە و ئێستا بووەتە قەیران و هەڕەشەیەكی جیهانی.

رێكخراوی پاراستنی ئۆقیانوس و بەرگەهەواش (NOAA) ئاشكرایكردووە، هەندێك جۆری پلاستیك مادەی كیمیاییان تێدایە، كە وایان لێدەكات زیاتر بەرگریان هەبێت بەرامبەر شیبوونەوە.