قەرەسوو: ئاكەپە و مەهەپە دوودڵن

سبەی

ئەندامێكی كۆنسەی بەڕێوەبەری كەجەكە، رەخنە لە رۆڵی پەرلەمانی توركیا لە پرۆسەی ئاشتی دەگرێت، دەشڵێت "ئیرادەیەكی روون نییە بۆ پرۆسەكە و ئاكەپە و مەهەپە دوودڵن".

موستەفا قەرەسوو، ئەندامی كۆنسەی بەڕێوەبەری كەجەكە لە چاوپێكەوتنێكدا لەگەڵ "مەدیا خەبەر تیڤی" رایگەیاند:" پار مانگی تشرینی یەكەم دەوڵەت باخچەلی بانگەوازێكی كرد. وتی با ئۆجەلان بێت لە پەرلەمان قسە بكات، كۆتایی بە هەموو كار و چالاكییەكی رێكخستن بهێنێت و سوود لە مافی هیوا وەربگرێت، ئەم قسانە تۆماركراوە، رێبەر ئاپۆش وتی، من دەتوانم ئەم پرسە، ببەمە سەر زەمینەی یاسایی و سیاسی. 27ـی شوباتیش بانگەوازێكی كرد، بانگەوازی 27 شوبات و قسەكانی سری سورەییا ئۆندەر، ئاكەپە، دەوڵەت باخچەلی و مەهەپەش بەئەرێنی بینیان. پارتەكانی تریش، چەند پارتێكی فاشیست نەبێت، هەمووان هەڵوێستیان ئەرێنی بوو".

وتیشی:" پێویستە بەردەنگیی رێبەر ئاپۆ قبوڵ بكرێت، بۆئەوەی بتوانێت لەم پرۆسەیەدا بە رۆڵێكی كاریگەر هەستێت، پێویستە هەلومەرجەكانی ژیان و كاركردنی ئازادی بۆ ئامادە بكرێت. ئەوەی پێی دەوترێت 'مافی هیوا'، پێویستە بخرێتە بەرنامەی كارەوە،   راگرتنی رێبەر ئاپۆ لەناو هەلومەرجی گۆشەگیریدا بەمانای مامەڵەیەكی كەموكورت دێت لەگەڵ پرۆسەكە، مامەڵەیەكی نادروست لەگەڵ ڕێبەرێكی لەو شێوەیە، بە مانای مامەڵەیەكی نادروست لەگەڵ پرۆسەكە دێت. باسی پرۆسەكە دەكرێت. دەڵێن 'توركیای بێ تیرۆر'، بێگومان ئێمە بەو شێوەیە قبوڵمان نییە، ئاكەپە و مەهەپە، ئەوانەی كە بەردەنگی پرۆسەكەن، ئیرادەیەكی روونیان نییە بۆ بەرەوپێشبردنی پرۆسەكە، نیشاندەری ئەوەیە كە دوودڵن".

قەرەسوو: مامەڵەی جەهەپە زۆر دواكەوتووانەیە

ئەو ئەندامەی كۆنسەی بەڕێوەبەری كەجەكە دەشڵێت:" جەهەپە خۆی نەچووە ئیمراڵی، باسی دیموكراسی دەكرد. مەگەر دیموكراسی بەبێ كورد دەبێت؟ مامەڵەی جەهەپە بە راستی زۆر دواكەوتووانەیە. رەخنەی لە ئاكەپە و مەهەپە دەگرت، دەركەوت ئەو رەخنانە هیچ مانایەكیان نییە. ئەو هەموو رەخنەیە بگریت، باسی دیموكراسی بكەیت، دواتریش لەسەر سەرەكیترین پرسی توركیا راپۆرتێك ئامادە بكرێت، باسی نەكەیت، ئەمە خەمساردییە، ئێمە لە ئێستاوە هیچ شتێكی نەرێنی ناڵێین، بەڵام ناتوانین بڵێین كە یەك بە یەكی راپۆرتەكان ئەرێنین"

"رێكارەكانی گەریلا لە پێناو بەرەوپێشچوونی پرۆسەكەدایە"

مستەفا قەرەسوو لە درێژەی چاوپێكەوتنەكەدا وتویەتی:"ئەو پرۆسەیە كە تێیدا باسی دیموكراسی، پشتیوانیی نەتەوەیی و خوشك و برایەتی دەكرێت، چۆن دەبێت؟ هەنگاو نران، چەكەكان سووتێنران، هێزەكانی ناو سنووری توركیا كشانەوە، لەو شوێنانەی كە مەترسیی شەڕی لێیە، گەریلا كشاوەتەوە بۆئەوەی رێ لە شەڕ بگرن، بۆئەوەی پرۆسەكە بەڕێوەبچێت، هەندێك گۆڕەپانیان چۆڵكرد. لەناو توركیاش لە ئاستێكی گرنگدا كشانەوە روویدا. باشە وەڵامێكی چۆنی ئەمە دەدرێتەوە؟ دەڵێن 'بێچەكبوون'، 'كۆتاییهێنان بە تیرۆر'. دەبووایە سیاسەتی دیموكراتیك پەیڕەو بكرایە. هێشتا لە توركیا هەزاران زیندانی هەن. هێشتا یاسای تیرۆر هەیە. باسی كورد و كوردستان بكە، دەتخەنە زیندان. واتا دەرفەتی سیاسەتی دیموكراتیك بوونی نییە".

"پەرلەمانی توركیا لە پرسە سەرەكییەكاندا خاوەن ئیرادە نییە "

"مێژووی توركیا نیشانیدا كە پەرلەمانی توركیا لە پرسە سەرەكییەكاندا خاوەن ئیرادە نییە. لەبری ئەوە باسی دەوڵەتی قووڵ دەكرێت، كۆمیسیۆن دامەزرا، گفتوگۆی فراوان دروستبوون، ئاخۆ پەرلەمان ئیرادەی چارەسەركردنی كێشەكانی توركیا دەستنیشان دەكات. سیاسەت ئەمە دەستنیشان دەكات؟ یاخود كێشە سەرەكییەكانی توركیا جارێكی تر بۆ هێزەكانی دەرەوەی سیاسەت، بۆ دەوڵەتی دەرەوەی نۆرم، بۆ دەوڵەتی قووڵ جێدەهێڵدرێت؟" . مستەفا قەرەسوو وا دەڵێت.

"دەبێت توركیا كۆتایی بە مامەڵە ئاژاوەگێڕییەكانی لە سوریا بهێنێت"

موستەفا قەرەسوو، ئەندامی كۆنسەی بەڕێوەبەری كەجەكە لە كۆتایی چاوپێكەوتنەكەیدا دەڵێت: "توركیا لە لوبنان ئاشتی دەوێت، لە سوریا ئاشتی دەوێت، بەڵام لە بەرانبەر كورد شەڕی دەوێت. لەوێ كورد و حكومەتی دیمەشق دەتوانن پرسەكانیان چارەسەر بكەن. دەتوانن گفتوگۆی چارەسەری بكەن. پرسی ناوخۆیی سوریایە. كورد ناڵێت با دابەشی بكەین، نزیكایەتییەكی وەها نییە. بێگومان زۆر هێز تێوەگلاون. بەڵێ هێزی جیاواز هەیە. تەنها توركیا نییە، هێزە جیاوازەكانیش لە سوریا پشێویی دروست دەكەن. راستترین شت بەدیهێنانی سەقامگیرییە بۆ سوریا. سەقامگیرییش بەم شێوەیە بەدی نایەت.  دەبێت دەوڵەتی توركیا سیاسەتی خۆی بگۆڕێت".